កាលពីថ្ងៃសៅរ៍ លោក ហោ ណាំហុង រដ្ឋមន្ត្រីការបរទេសកម្ពុជាបានចុះទៅសួរសុខទុក្ខកងទ័ពកម្ពុជាដែលឈរជើងនៅតំបន់ប្រាសាទព្រះវិហារ ហើយលោកបានពន្យល់អំពីសាលក្រមនាពេលថ្មីនេះរបស់តុលាការយុត្តិធម៌អន្តរជាតិពាក់ព័ន្ធនឹងតំបន់ជម្លោះជាប់ព្រំដែនជាមួយប្រទេសថៃ។
ទាហានប្រហែល១.០០០នាក់ ដែលឈរជើងនៅប្រាសាទព្រះវិហារបានមកចូលរួមស្តាប់ការពន្យល់របស់លោក ហោ ណាំហុង ដែលអំឡុងពេលនោះលោករដ្ឋមន្ត្រីការបរទេសបានក្រើនរំឭកកងទ័ពកុំឲ្យមានជម្លោះម្តងទៀត ហើយបានពន្យល់ថា សេចក្តីសម្រេចរបស់តុលាការយុត្តិធម៌អន្តរជាតិ (ICJ) នៅក្នុងទីក្រុងឡាអេបានសម្រេចប្រគល់តំបន់ជុំវិញប្រាសាទទាំងមូលមកឲ្យកម្ពុជា។
លោក ហោ ណាំហុង បានប្រាប់កងទ័ពទាំងនោះថា “ប្រជាជនកម្ពុជាដឹងថា សង្គ្រាមផ្តល់ផលវិបាកអ្វីខ្លះដល់យើង។យើងមិនចង់ដោះស្រាយបញ្ហាតាមរយៈសង្គ្រាមនោះទេ។យើងស្រឡាញ់សន្តិភាព”។ លោកបានបន្ថែមថា ហេតុនេះហើយបានជារាជរដ្ឋាភិបាលបានដាក់ពាក្យបណ្ដឹងសុំបកស្រាយសាលក្រមទៅតុលាការយុត្តិធម៌អន្តរជាតិកាលពីឆ្នាំ២០១១ដើម្បីសម្រេចថា តើដីនៅតំបន់ជម្លោះនេះជាកម្មសិទ្ធិរបស់ប្រទេសណា។
លោករដ្ឋមន្ត្រីការបរទេសមានប្រសាសន៍ថា “សាលក្រមកាលពីខែវិច្ឆិកាឆ្នាំ២០១៣មានសារៈសំខាន់ខ្លាំងណាស់ ក្នុងការកំណត់តំបន់ជុំវិញប្រាសាទព្រះវិហារ”។លោក ហោ ណាំហុង បានមានប្រសាសន៍បន្តថា “ការតស៊ូក្តីនៅតុលាការយុត្តិធម៌អន្តរជាតិចាប់តាំងពីថ្ងៃទី២៨ខែមេសាឆ្នាំ២០១១ រហូតដល់ថ្ងៃទី១១ ខែវិច្ឆិកាឆ្នាំ២០១៣ គឺក្នុងរយៈពេលជាងពីរឆ្នាំនេះពិតជាពិបាកខ្លាំងណាស់។ខ្ញុំសូមជំរាបជូនកងទ័ពទាំងអស់នៅទីនេះថា ថៃបានជំទាស់ដាច់ខាត ហើយស្នើកុំឲ្យតុលាការយុត្តិធម៌អន្តរជាតិបកស្រាយសាលក្រមនេះ”។
កាលពីថ្ងៃទី១១ខែវិច្ឆិកា សេចក្តីសម្រេចរបស់តុលាការអន្តរជាតិបានកំណត់ថា ទឹកដីទាំងមូលជុំវិញប្រាសាទព្រះវិហារ ស្ថិតក្រោមអធិបតេយ្យភាពរបស់ប្រទេសកម្ពុជាហើយបានបង្គាប់ឲ្យប្រទេសថៃដកកងទ័ពរបស់ខ្លួនចេញពីតំបន់នោះ។ ទោះជាយ៉ាងណា នេះមិនមែនជាជ័យជម្នះទាំងស្រុងសម្រាប់ប្រទេសកម្ពុជាទេ ដោយសារតុលាការច្រានចោលសំណើរបស់ប្រទេសកម្ពុជាស្នើឲ្យកំណត់ព្រំដែនផ្លូវការនៅក្នុងតំបន់នោះឬក៏ផ្តល់តំបន់ភ្នំមួយទៀតនៅក្បែរនោះមកឲ្យខ្លួន។
ភ្លាមៗបន្ទាប់ពីតុលាការប្រកាសសាលក្រម លោក ហោ ណាំហុង បានហៅសេចក្តីសម្រេចរបស់តុលាការថា ជា “កាដូ” សម្រាប់ព្រះរាជាណាចក្រកម្ពុជា ប៉ុន្តែបានទទួលស្គាល់ថា សាលក្រមនេះមិនសម្រេចបំណងកម្ពុជា១០០ភាគរយទេ។ កាលពីថ្ងៃសៅរ៍ លោក ហោ ណាំហុង បាននិយាយថា តំបន់ភ្នំដែលតុលាការអន្តរជាតិមិនបានសម្រេចនោះនឹងត្រូវលើកយកមកពិភាក្សានាពេលអនាគត។លោកថ្លែងដោយមិនបរិយាយលម្អិតថា “យើងនឹងជជែកគ្នាអំពីបញ្ហាភ្នំទ្រព្យនាពេលអនាគត”។
លោកឧត្តមសេនីយ៍ទោ ស្រី ឌិក មេបញ្ជាការកងអន្តរាគមន៍កងពលធំលេខ៣ប្រចាំតំបន់ប្រាសាទព្រះវិហារបានមានប្រសាសន៍កាលពីម្សិលមិញថា វាជារឿងធម្មតាដែលរដ្ឋមន្ត្រីនៅក្នុងជួររដ្ឋាភិបាលចុះមកសួរសុខទុក្ខនិងសំណេះសំណាលជាមួយកងទ័ព។លោកបានពន្យល់បន្ថែមពាក់ព័ន្ធនឹងសាលក្រមរបស់តុលាការយុត្តិធម៌អន្តរជាតិនេះថា “រដ្ឋាភិបាលប្រទេសទាំងពីរ [ថៃនិងកម្ពុជា] កំពុងតែប្រឹងប្រែងធ្វើការរួមគ្នាដើម្បីរក្សាស្ថានការណ៍ឲ្យនៅដដែល”៕សូនី