26 C
Phnom Penh

អាជ្ញាធរ​ និង​មន្ត្រី​សង្ឃ​បានចត​រថ​​​យន្ត​​​​បិទ​ផ្លូវ​មិន​​ឲ្យ​អ្នក​ដើរ​ធម្មយាត្រា​ចូលស្នាក់នៅក្នុង​វត្ត​

ដោយ ឌឹ ខេមបូឌា ដេលី

បទវិភាគ

ការ​យាយី​ព្រះសង្ឃ​ និង​អ្នក​គាំទ្រ​​ព្រះ​សង្ឃ​ដែល​កំពុង​និមន្ត​ និង​ដើ​រ​ក្បួន​មក​កាន់​រាជធានីភ្នំពេញ ដើម្បី​ចូល​រួម​ក្នុង​ពិធី​ជួប​ជុំ​ក្នុង​ទិវា​សិទ្ធមនុស្ស​អន្តរជាតិ​ បាន​បន្ត​កើត​មាន​កាល​​ពីថ្ងៃ​សុក្រ​ នៅ​ពេល​រថយន្ត​ស៊េរីទំនើប​បី​​​​​​​គ្រឿ​ង​ត្រូវ​បាន​ប្រើ​ប្រាស់​ដើម្បី​បិទ​ច្រក​ចូល​ទៅកាន់​វត្ត​មួយ​ក្នុង​ខេត្ត​កំពង់​ស្ពឺ​ ជា​​​ទី​​​ដែល​អ្នក​ដើរ​ធម្មយាត្រា​គ្រោង​នឹង​ចូលទៅ​​​សម្រាក​​​​​​​​​​មួយ​យប់​។

ការ​ប្រើ​រថយន្ត​បីគ្រឿង​ ក្នុង​នោះ​មាន​រថ​យន្ត​លុច​ស៊ីស​ រថយន្ត​មីតស៊ុយ​ប៊ីស៊ី ប៉ាហ្ស៉ឺរ៉ូ​ និង​រថយន្ត​តូយ៉ូតា ហាយលែន​ឌ័រ ដែល​ជា​កម្មសិទ្ធិ​របស់​មន្ត្រី​សង្ឃ​ជាន់​ខ្ពស់​នៅ​ក្នុង​ខេត្ត​នេះ ដើម្បី​​​បិទ​ផ្លូវ​ចូល​ទៅកាន់​វត្ត​សាឡូន ពោធិ​​វង្ស​ ​បាន​បណ្ដាល​ឲ្យ​អ្នក​​ដើរ​ធម្មយា​ត្រា​​​ប្រមាណ​៦៥នាក់​បិទ​កំណាត់​ផ្លូវ​ជាតិ​លេខ​៤​ ដែល​តភ្ជាប់​រាជធានីភ្នំពេញទៅកាន់​ខេត្ត​ព្រះ​​សីហនុ អស់​រយៈ​ពេល​​​៧ម៉ោង​។

ព្រះតេជគុណ​ ព្រីម ហួន ព្រះជន្ម​២៥​វស្សា​ ដែល​កំពុង​ដឹកនាំ​ការ​ដើរ​ធម្មយាត្រា​ពី​ខេត្ត​កំពង់ស្ពឺ មកកាន់​រាជធានីភ្នំពេញ​​បាន​មាន​សង្ឃ​​​ដីកា​ថា ព្រះចៅអធិកា​រ​វត្ត​សាឡូន ពោធិ​​វង្ស បាន​អនុញ្ញាត​ឲ្យ​អ្នក​ធម្មយាត្រា​ទាំង​នេះ​ស្នាក់​នៅ​មួយ​យប់​។ ព្រះតេជគុណ​ ព្រីម ហួន មាន​សង្ឃដីកា​ថា “ប៉ុន្តែ​​ មន្ត្រី​សង្ឃ​ មន្ត្រី​ និង​អាជ្ញាធរ​ថ្នាក់​ស្រុក​ និង​ខេត្ត​ មិន​បាន​អនុញ្ញាត​ឲ្យ​ពួក​យើង​សម្រាក​នៅទីនោះ​ឡើយ​”។ ព្រះអង្គ​បាន​ពន្យល់​ថា មន្ត្រី​មូល​ដ្ឋាន​ និង​មន្ត្រី​សង្ឃ​បាន​ប្រាប់​អ្នក​បើក​រថយន្ត​ឲ្យ​បិទ​ច្រក​ចូលទៅ​កាន់​វត្ត​ខាង​លើ​នេះ​។

ព្រះអង្គ​បា​ន​មាន​សង្ឃដីការ​ទៀត​ថា “អ្នក​​​ដើរ​ធម្មយាត្រា​​បាន​បិទ​កំណាត់​ផ្លូវ​ជាតិ​លេខ​៤​ដើម្បីសុំ​ឲ្យ​អាជ្ញាធរ​ចរចាស្វែង​រក​ដំណោះ​ស្រាយ​។ យើង​​មិន​ចង់​ឲ្យអាជ្ញាធរ​ទាំង​នោះ​ដាក់​សម្ពាធ​លើ​ចៅ​អធិការ​វត្ត​នេះឡើយ​”។ ព្រះតេជគុណ​ ហឿង ស៊ីថា ព្រះចៅអធិ​ការ​វត្ត​សាឡូន ពោធិវង្ស បាន​បញ្ជាក់​ថា ព្រះ​អង្គ​បាន​អនុញ្ញា​ត​ឲ្យអ្នក​ធម្មយាត្រា​ទាំង​នេះ​ចូល​ក្នុង​វត្ត​របស់​​ព្រះអង្គ​។

ព្រះតេជគុណ​មាន​សង្ឃដីកា​ថា “អាត្មា​បារម្ភ​ខ្លាច​មន្ត្រី​សង្ឃ និង​មន្ត្រី​ថ្នាក់​ស្រុក​ និង​ខេត្ត​ នឹង​ចោទ​ប្រកាន់​អាត្មា​ចំពោះ​ការ​អនុ​​ញ្ញាត​ឲ្យ​អ្នក​ដើរ​ធ​ម្មយា​ត្រា​សម្រាក​នៅ​ក្នុង​វត្ត​របស់​អាត្មា​។ អាត្មា​អនុញ្ញាត​ឲ្យពួក​គាត់​សម្រាក​នៅ​ក្នុង​វត្ត​របស់​អាត្មា​ ពីព្រោះ​អាត្មា​យល់​ថា យើង​ទាំង​អស់​គ្នា​សុទ្ធ​តែ​ជា​ខ្មែរ​”។

លោក ឃុត សុផល អធិការ​ស្រុក​សំរោង​ទង បាន​បញ្ជាក់​ថា អ្នក​​​​ដើរ​​​ធម្មយាត្រា​បាន​បិទ​​​​​​​ផ្លូវ​ដើម្បី​សង​សឹក​ចំពោះ​ការ​បិទ​ផ្លូវ​មិន​ឲ្យ​ចូល​ទៅ​ក្នុង​វត្ត​នេះ​។ លោក​ក៏​មាន​ប្រសា​​​សន៍​​ដែរ​ថា អភិបាល​ស្រុក​បាន​ចរចា​ជាមួយ​អ្នក​​​​ដើរ​​​ធម្មយាត្រា​ទាំង​នេះ​ដើម្បី​ឲ្យ​ពួកគាត់​ឈប់​​​​បិទ​ផ្លូវ​ ប៉ុន្តែ​លោក​បាន​បដិសេធ​មិន​ឆ្លើយ​បំភ្លឺ​បន្ថែម​ទៀត​ទេ។

អ្នកស្រី​ សុង ស្រីលាភ សកម្មជន​​ប្រឆាំង​​ការ​​​បណ្ដេញ​ចេញ​ម្នាក់​មកពី​សហគមន៍​បឹង​កក់​ ក្នុង​រាជធានីភ្នំពេញ ក៏​កំពុង​ចូល​រួម​នៅ​ក្នុង​ធម្ម​យាត្រា​ពី​ខេត្ត​កំពង់​ស្ពឺដែរ​​​នោះ​​​ បាន​លើក​ឡើង​​​​​ថា ក្រោយ​​​​ពីការ​ចរចា​ជាមួយ​លោក​​​​អភិ​បាលរួច​​​​ អ្នកស្រី​និង​អ្នក​ដើរ​ធម្មយាត្រា​ជាមួយ​​​​គ្នា​រួម​ទាំង​​ព្រះ​សង្ឃ​ផង​ត្រូវ​បាន​អនុញ្ញាត​ឲ្យ​ចូល​ទៅ​ក្នុង​វត្ត​នេះ​។ អ្នកស្រី​បាន​ចោទ​សួរ​ថា “ហេតុអ្វី​បានជាពួកគេ​​មិនអនុញ្ញាត​ឲ្យ​​​​​​ពួក​យើង​សម្រាក​នៅ​ក្នុង​វត្ត​នេះ​ នៅ​ពេល​ដែល​​​​ព្រះចៅអធិការ​អនុញ្ញាត​ឲ្យពួក​យើង​ហើយ​នោះ?”។

ព្រះ​សង្ឃ​ និង​អ្នក​គាំទ្រ​ដែល​កំពុង​ដើរ​ធម្មយាត្រា​តាម​បណ្ដោយ​ផ្លូវ​ជា​តិ​លេខ​៥ និង​ផ្លូវ​ជាតិ​លេខ​៦ ឆ្ពោះ​មក​កាន់​រាជធានី​ភ្នំ​ពេញ ក៏បាន​រាយការណ៍​ពីការ​យា​យី​ស្រដៀង​​​​​​គ្នា​នេះ​ដែរ​។ព្រះ​សង្ឃ​ប្រហែល​១០០​អង្គ​កំពុង​ដឹក​នាំ​ការ​ដើរ​ធម្មយាត្រា​រយៈ​ពេល​១០​​​​ថ្ងៃ​ ដែល​បាន​ចាប់​ផ្ដើម​កាលពីថ្ងៃ​អាទិត្យ​មក​កាន់​រាជ​ធានីភ្នំពេញ នៅ​​តាម​ចំណុច​ផ្សេង​ៗ​គ្នា​តាម​បណ្ដោយ​ផ្លូវ​ជាតិ​ចំនួន​ប្រាំ​ឆ្ពោះមក​កាន់​រាជ​ធានីភ្នំពេញ​។

អ្នក​ចូល​រួម​កំពុង​តែ​អំពាវ​នាវ​ឲ្យ​រដ្ឋា​ភិបាល​​​គោរព​សិទ្ធិ​មនុស្ស​ និង​ការ​បណ្ដេញ​ចេញពី​ដី​ធ្លី​ និង​ស៊ើប​អង្កេត​ភាព​មិន​ប្រក្រតី​នៅ​ក្នុង​ការ​​​បោះ​ឆ្នោត​ជាតិ​កាលពីខែ​កក្កដា ដែល​បាន​​ធ្វើ​​ឲ្យ​​គណបក្ស​ប្រជា​ជន​កម្ពុជា​​ របស់​លោក​នាយក​​​រដ្ឋ​មន្ត្រី​ ហ៊ុន សែន ទទួល​ជ័យ​ជម្នះពីគណ បក្ស​សង្គ្រោះជាតិ នៅ​ក្នុង​ការ​បោះ​ឆ្នោត​៕សុខុម

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស