31 C
Phnom Penh

ប្រជាពល​រដ្ឋ​ដែល​ត្រូវ​បាន​​ជម្លៀ​ស​ចេញ​​​​ដោយសារ​ទឹក​ជំនន់​ឆ្នាំនេះ​​​មាន​​​ចំនួន​៣១​ពាន់​គ្រួសារ​​​​

ដោយ ឌឹ ខេមបូឌា ដេលី

បទវិភាគ

យោង​តាម​​វេទិកា​ឆ្លើយ​តប​មនុស្ស​ធម៌​ (Humanitarian Response Forum) ហៅ​​​កាត់​​​ថា​​​ HRF ដែល​បាន​​​ចេញ​​​​ផ្សាយ​​​របាយការណ៍​ចុង​ក្រោយ​របស់​ខ្លួន​ស្តី​ពី​ទឹក​ជំនន់​​​​​​​ កាល​ពីម្សិល  មិ​ញបាន​​ឲ្យ​ដឹង​ថា ប្រជាពល​រដ្ឋ​ជាង​៣១.០០០​​គ្រួសារ​ត្រូវ​បាន​ជម្លៀស​ចេញ​ ខណៈ​​​មនុស្ស​១៦៨​នាក់​បាន​ស្លាប់​​ដោយសារ​​​ទឹក​ជំនន់​​​​​​ឆ្នាំនេះ​នៅ​ខេត្ត​ចំនួ​ន​២០។

ជាទូទៅ​ ទឹក​​​ជំនន់​​​ឆ្នាំ​​​នេះ​​​​មិន​បាន​បង្ក​​​ផល​​​ប៉ះពាល់ខ្លាំង​​​លើ​​​កម្ពុជា​ដូច​ឆ្នាំ​២០១១​​ ​​ពេល​ប្រជា​ពល​រដ្ឋ​ជាង​៥០.០០០​គ្រួសារ​ត្រូវ​បាន​ជម្លៀស​ចេញ​​​​ទេ​​​ នេះបើ​យោង​តាម​វេទិកា​​​​HRF ដែល​ជា​បណ្តាញ​មួយ​របស់​ទីភ្នាក់​ងារ​អង្គការ​សហ​ប្រជាជាតិ​ និង​អង្គការ​ផ្តល់​​​ជំនួយ​​ក្រៅ​រដ្ឋាភិបាល​។ របាយការណ៍​នេះ​​​​មាន​​​ខ្លឹមសារ​​​ថា “បើ​ធៀប​​នឹង​ឆ្នាំ​២០១១​ ទឹក​​​​​​ជំនន់​ក្នុង​ឆ្នាំ​២០១៣​​​​នេះ​​​​មាន​វិសាលភាព​​​តូច​ជាង​​​​​ ​ទោះបី​​​ជា​ផល​ប៉ះពាល់​​​​​នៅ​ក្នុង​ខេត្ត​ខ្លះ​មាន​ទំហំ​​​ធំ​​​ជាងឆ្នាំ​​​២០១១​​​​​​​​​ក៏​​​ដោយ​​​។​​​ ​ផល​​​ប៉ះពាល់​​​ខ្លាំង​​​ជាង​​​ឆ្នាំ​​​២០១១​​​​នេះ​​​គឺ​​​ដោយ​សារ​​កក្តា​មួយ​ចំនួន​ ដូចជា ​ទឹក​ជំនន់​​​ខ្លាំង​​​ជាង​​​ការ​​​​​​រំពឹង​​​ទុក​​​…​ទឹក​​​ស្រក​​​យឺត​​​ជាង​ឆ្នាំ​​​មុនៗ​​​​​ ទឹក​ជំនន់​ម្តង​ហើយ​ម្តង​ទៀត​​ និង​​​ទឹក​​​ជំនន់​​​លឿន​​​ដូច​​​ផ្លេក​​​បន្ទោរ​​​​​​ ការ​​​ត្រៀម​​​ទុក​​​ជា​​​មុន​​​នៅ​​​មាន​​​កម្រិត​​​ និង​​​ការ​​​ព្រមាន​​​ទុក​​​មុន​​​​​​នៅ​​​មាន​​​កម្រិត​​​ដែរ​​​”។

នៅក្នុង​ខេត្ត​បាត់​ដំបង​ ស្ទឹង​ត្រែង​ សៀម​រាប​ រតនគិរី បន្ទាយ​មាន​ជ័យ និង​ខេត្ត​ប៉ៃលិន​​​ ​​​​​ប្រជាពល​រដ្ឋ​ដែល​​​ត្រូវ​​​បាន​​​ជម្លៀស​​​​​​ចេញ​​​​​​​មាន​​​ចំនួន​​​ច្រើន​​ជាង​​​​កាលពី​​​​ពីរឆ្នាំ​​​​មុន​​​ ហើយ​​​នៅ​​​ទូទាំង​ប្រទេស គ្រួសារ​​​​ប្រជា​ពល​រដ្ឋ​ដែល​​​ រង​​​​ផល​​​ប៉ះពាល់ដោយ​សារ​ទឹក​ជំនន់​មាន​ចំនួន​​​ច្រើន​​​ជាង​​​មុន​​​ គឺ​​​​ប្រហែល​៣៧០.០០០​គ្រួសារ​ បើ​ប្រៀប​ធៀប​នឹង​​​ឆ្នាំ​២០១១​​​ដែល​​​​មាន​៣៥០.០០០ គ្រួសារ​ ។​​​ នៅ​​​​ក្នុង​​​​​​ខេត្ត​បាត់​ដំបង​ ប្រជាពល​រដ្ឋ​ដែល​​​រង​​​ផល​​​​ប៉ះពាល់ ​​​នៅ​​​ក្នុង​ឆ្នាំ​នេះ​​​មាន​​​ចំនួន​​​ច្រើន​​​ជាង​​​ឆ្នាំ​​​នោះ​​​៦០.០០០គ្រួសារ​​​​​។

អង្គការ​ទស្សនៈ​ពិភពលោក​ (World Vision) ដែល​បាន​​​ផ្តល់​​ជំនួយដល់​ប្រជាពល​រដ្ឋ​ចំនួន​ប្រហែល​១២.០០០គ្រួសារ​ បាន​​លើកឡើង​​​​កាល​ពី​ម្សិល​មិញ​ថា ប្រទេស​កម្ពុជា​​​ចាំបាច់​​​ត្រូវ​​​ត្រៀម​ខ្លួន​​​ទប់ទល់​​​​​​​នឹង​​​​ទឹក​ជំនន់​​​​​នៅឆ្នាំ​​​ខាង​​​​មុខ​​​ឲ្យ​បាន​ល្អ​ជាង​មុន​​​​​ ប៉ុន្តែ​ បាន​​​គូស​​​បញ្ជាក់​​​ថា កង្វះ​ការ​សម្រប​សម្រួល​ គឺ​ជា​កត្តា​​​ចម្បង​​​​ ដែល​​​បាន​​​ធ្វើ​​​ឲ្យ​​​កិច្ច​​​​​​​ប្រឹង​ប្រែង​​​​​​​​​ផ្តល់​​​ជំនួយ​​​មាន​​​ភាព​​​យឺតយ៉ាវ​​​​​។

លោក ឡេង​ វីរៈ អ្នក​គ្រប់​គ្រង​​​ការ​​​​ឆ្លើយ​តបនឹង​​​​គ្រោះ​មហន្តរាយ​នៅ​​​​​អង្គការ​ទស្សនៈ​ពិភពលោក​​ បាន​​​​​​មាន​​​ប្រសាសន៍​​​ថា “ខ្ញុំ​គិត​ថា វា​​​ពាក់ព័ន្ធ​​​នឹង​​​​តួ​នាទី​ដឹក​នាំ​របស់​​គណៈ​កម្មា​ធិការ​ជាតិ​គ្រប់​គ្រង​គ្រោះមហន្ត​រាយ​​​​ច្រើន​​​ជាង​​​។ យើង​ចង់​​​ឲ្យ​​​មាន​​ការ​សម្រប​សម្រួល​​​​ប្រសើរ​​​ជាង​​​នេះ​​​​​ក្នុ​ងចំណោម​អ្នក​ដើរ​​​តួ​​​​សំខាន់​ៗ​​​។ ​​​​​​​កន្លង​​​មក​​​​នេះ​  ម្នាក់​​​ៗ​​​​​​ធ្វើ​ការ​រៀង​​​ៗ​​​ខ្លួន​​​” ដោយ​​​បាន​​​​បន្ថែម​ថា លោក​សង្ឃឹម​ថា ផែនការ​សកម្មភាព​ថ្មី​មួយ​សម្រាប់​រយៈពេល​បួន​ឆ្នាំ​បន្ទាប់​​​នេះ​​​នឹង​ធ្វើ​ឲ្យ​កិច្ច​​​សហ​ប្រតិបត្តិ​ការ​​​​មាន​​​ភាព​​​ប្រសើរ​​ឡើង​។

របាយការណ៍​មួយ​របស់​​​​ធនាគារ​អភិវឌ្ឍន៍​អាស៊ី​​​ ស្តីពី​ការងារ​​​​របស់​​គណៈកម្មាធិការ​ជាតិ​គ្រប់​គ្រង​គ្រោះ​មហ​ន្ត​រាយ​ មាន​​​ការ​​​គូស​​​បញ្ជាក់ ​​​ថា​​​ គណៈកម្មាធិការ​នេះ​ខ្វះ​បុគ្គលិក​ច្រើន ​ហើយ​​​ជារឿយៗ​​​ ​បុគ្គលិក​​​មិន​ទាំង​​​ដឹង​​​​ថា​​​ មុខ​ងារ​របស់​ខ្លួន​​​​ជា​​​អ្វី​​​ផង​​​ទេ​​​។​​​ គណៈ​កម្មាធិការ​នេះ​ក៏​​​មិន​បាន​ជួប​ប្រជុំ​ជា​​​​ទៀង​ទាត់​​​ដែរ​​​​ ហើយ​​​​ពុំ​​​​​​មាន​​​​ថវិកា​ប្រចាំឆ្នាំ​​​ឡើយ​​​។

លោក កែវ​ វី ប្រធាន​ខុទ្ទកាល័យ​​​គណៈ​កម្មាធិការជាតិ​គ្រប់​គ្រង​គ្រោះ​មហន្ត​រាយ​បាន​ច្រាល​ចោល​ការ​រិះគន់​នេះ​​​កាល​ពីម្សិល​មិញ ដោយ​លោក​បាន​អះអាង​​​​ថា គណៈកម្មា​ធិការ​នេះបាន​បំពេញ​កាតព្វកិច្ច​របស់​ខ្លួន​ឲ្យ​​បាន​ត្រឹម​​​ត្រូវ​​​ និង​​​​ថាខ្លួន​បាន​សម្រប​សម្រួល​ការ​ងារ​របស់​អង្គការ​ក្រៅ​រដ្ឋាភិបាល​​​​យ៉ាង​​​សមស្រប​​​។ លោកបាន​​​មាន​​​ប្រសាសន៍​​​ថា “អង្គការ​ទាំង​នេះ​បាន​សហការ​ជាមួយ​​កាកបាទ​ក្រហម​​កម្ពុជា និង​គណៈកម្មាធិការ​ជាតិ​​គ្រប់​គ្រង​គ្រោះ​ហន្តរាយ​”៕​ប៊ុននី/សេរី​​​វុធ​​​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស