30 C
Phnom Penh

គ្លីនិក​ព្យាបាល​ជំងឺ​មហារីក​​ដែល​មិន​ទាន់​មាន​អាជ្ញាប័ណ្ណ​នៅ​តែ​បើក​ដំណើរ​ការ​ព្យាបាល​អ្នក​ជំ​ងឺ​

ដោយ ឌឹ ខេមបូឌា ដេលី

បទវិភាគ

កាលពីម្សិលមិញ​​មន្ទីរ​សុខាភិបាល​​រាជ​ធានី​ភ្នំពេញ បាន​ឲ្យ​ដឹង​ថា ខ្លួន​​អនុញ្ញាត​ឲ្យ​គ្លីនិក​​​មួយ​​​​ដែល​អះអាង​ថា ព្យាបាល​ជំងឺ​នានា​ដូច​ជា​ ជំងឺ​មហារីក និង​ជំងឺ​ទឹក​នោម​ផ្អែម ​តាម​រយៈ​ការ​ព្យាបាល​ដោយ​ការ​បំបាត់​ជាតិ​ពុល​នោះ​នៅ​បើក​ដំណើរ​ការ​ដដែល​ ថ្វី​បើ​មាន​ការ​អះអាង​កាលពីមុន​ថា គ្លីនិក​នេះ​បាន​បិទ​រួច​ហើយ​ក៏ដោយ​។

លោក សុខ សុគន្ធ ប្រធាន​មន្ទីរ​សុខាភិ​បាល​រាជធានី​បាន​មាន​​ប្រសាសន៍​កាលពី​ម្សិល​មិញ​ថា វា​ជា​កំហុស​របស់​ក្រសួង​សុខាភិបាល​ដែល​​​គ្លីនិក​ Immanuel Bicom True Healing បាន​បើក​ដំណើរ​ការ​ដោយ​គ្មាន​អាជ្ញាប័ណ្ណ​ ដោយ​លោក​បាន​​ដក​ពាក្យ​សម្ដី​ដែល​លោក​បាន​​មាន​ប្រសាសន៍​​កាលពី​សប្ដាហ៍​មុន​ថា គ្លីនិក​នេះ​ត្រូវ​បាន​អាជ្ញាធរ​បិទ​រួច​ហើយ​។

លោក សុគន្ធ​ ​​មាន​ប្រសាសន៍​ថា “ហេតុ​​​ផល​ដែល​គ្លីនិក​នេះ​មិន​ទាន់​ទទួល​បាន​អាជ្ញា​ប័ណ្ណ​នោះ​ គឺដោយ​សារ​ក្រសួង​សុខាភិបាល​យឺត​យ៉ាវ​ពេក”។ លោក​​បាន​បន្ថែម​ថា គ្លីនិក​នេះ​កំពុង​ដំណើរ​​​​​ការ​ធ្វើ​អាជ្ញាប័ណ្ណ​ ប៉ុន្តែ​គ្លីនិក​នេះ​មិន​អាច​បង្ហាញ​ថា ខ្លួន​បាន​ជួល​បុគ្គលិក​ពេទ្យ ឬ​វេជ្ជ​បណ្ឌិត​ដែល​មាន​ការ​បណ្ដុះ​បណ្ដាល​ត្រឹម​ត្រូវ​ទេ។

លោកស្រី ហេលីណា គុណ​លឹម ​ម្ចាស់​គ្លីនិក​​​នេះ​បាន​និយាយ​ថា គ្លីនិក​ដែល​បាន​បើក​​​​​ដំណើរ​ការ​អស់​រយៈ​ពេល​ជិត​បី​ខែ​នេះ​​​​​​​បាន​ព្យាបាល​អ្នក​ជំងឺ​មួយ​ចំនួន ​រួម​ទាំង​អ្នក​ជំងឺ​មហារីកផង​ដែរ​។ លោក​ស្រី​ គុណ​លឹម អះ​អាង​ថា ជំងឺ​ទាំង​អស់​បង្ក​​ឡើង​ដោយ​​​​​ជាតិ​ពុល​នៅ​ក្នុង​ខ្យល់​ នៅ​ក្នុង​ទឹក​ និង​នៅ​ក្នុង​អាហារ​ ហើយ​អាច​ព្យាបាល​បាន​ដោយ​ប្រើ​ម៉ាស៊ីន​ដើម្បី​យក​ជាតិ​ពុល​ទាំង​នេះ​ចេញ។

លោក សុគន្ធ ​មាន​ប្រសាសន៍​ថា ប្រសិន​បើ​គ្លីនិក​នេះ​ជួល​វេជ្ជ​បណ្ឌិត​ គ្លីនិក​នេះ​នឹង​ទទួល​បាន​អាជ្ញាប័ណ្ណ​ ហើយនៅ​បើក​បាន​។ លោក​បាន​មាន​ប្រសាសន៍​ថា “ ពួកគេ​ត្រូវ​មាន​វេជ្ជ​បណ្ឌិត​ត្រឹម​ត្រូវ​មុន​ពេល​ទទួល​បានអាជ្ញាប័ណ្ណ​”។ ទោះ​ជា​យ៉ាង​ណា លោក សាំង សារី ​ប្រធាន​​​នាយក​ដ្ឋាន​មន្ទីរ​ពេទ្យ​​នៃ​ក្រសួង​សុខាភិបាល​បាន​មាន​ប្រសាសន៍​កាលពីម្សិលមិញ​ថា គ្លីនិក​នេះ​មិន​គួរ​ចាប់​ផ្ដើម​ព្យាបាល​អ្នក​ជំងឺ​ទេ​ ព្រោះ​​​ត្រូវ​ទទួល​អាជ្ញាប័ណ្ណ​ជាមុន​សិន​។

លោក សារី បាន​មាន​ប្រសាសន៍​ថា “ទោះ​​​បីជា​ពួកគេ​កំពុ​ង​ដំណើរ​ការ​ធ្វើ​អាជ្ញា​ប័ណ្ណ​ក៏ដោយ​ ក៏ពួក​គេ​មិន​​អាច​បើ​ក​ធ្វើ​អាជីវកម្ម​ ឬ​​ព្យាបាល​ជំងឺ​បានដែរ​​នៅ​ពេល​នេះ​​”។ លោក​​មាន​ប្រសាសន៍​ថា គ្លីនិក​ Immanuel Bicom ដែល​ស្ថិត​នៅ​សង្កាត់​បឹង​កេង​កង​នេះ​ខ្វះ​បុគ្គលិក​សុខាភិបាលដែល​មាន​វិជ្ជា​ជីវៈ​​ និង​​មិន​មាន​ឧបករណ៍​ត្រឹម​ត្រូវ​ដើម្បីព្យាបាល​អ្នក​ជំងឺ​ដែល​មាន​ស្ថាន​ភាព​ធ្ងន់​បានទេ។ លោក សារី បាន​​មាន​ប្រសាសន៍​ថា “ ការ​បើក​គ្លីនិក​ឥត​ច្បាប់​បែ​ប​នេះ​ដូច​ជា​សម្លាប់​មនុស្ស​អ៊ីចឹង”​។ ប្រសិន​បើ​មន្ទីរ​សុខាភិបាល​រាជ​ធានី​ភ្នំពេញ មិន​បិទ​គ្លីនិក​នេះ​ទេ​ នាយក​​ដ្ឋាន​មន្ទីរ​ពេទ្យ​នៃ​ក្រសួង​សុខាភិបាល​នឹង​បិទ​​គ្លីនិក​នេះ​ដោយ​ផ្ទាល់៕ គឹមហឿន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស