លោក ស ខេង ដែលជារដ្ឋមន្ត្រីក្រសួងមហាផ្ទៃបានបញ្ជាឲ្យប្រធានពន្ធនាគារ មណ្ឌលឃុំឃាំងនិងមណ្ឌលស្តារនីតិសម្បទាទាំងអស់អនុញ្ញាតឲ្យគណៈប្រតិភូមកពីអនុគណៈកម្មការបង្ការការធ្វើទារុណកម្មរបស់អង្គការសហប្រជាជាតិដែលបានចាប់ផ្តើមបំពេញបេសកកម្មរយៈពេលប្រាំថ្ងៃរបស់ខ្លួនចូលវាយតម្លៃពីការប្រើទារុណកម្មអំពើឃោរឃៅនិងការធ្វើបាបគ្មានមនុស្សធម៌ផ្សេងៗទៀតនៅក្នុងប្រទេសកម្ពុជាកាលពីម្សិលមិញ។
យោងតាមលិខិតចុះកាលបរិច្ឆេទថ្ងៃសុក្រ លោក ស ខេង ដែលជាប្រធានយន្តការបង្ការថ្នាក់ជាតិដើម្បីទប់ស្កាត់ការធ្វើទារុណកម្ម អំពើឃោរឃៅ ការធ្វើបាប និងការធ្វើទារុណកម្ម បានមានប្រសាសន៍ថា ក្រុមនេះនឹង “ឃ្លាំមើល ហើយប្រមូលព័ត៌មានតាមមណ្ឌលឃុំឃាំងដែលមានការបំបិទសិទ្ធិសេរីភាព”។
លោក ស ខេង បានមានប្រសាសន៍ថា បទបញ្ជារបស់លោកជាការឆ្លើយតបទៅនឹងសំណើសុំចូលពិនិត្យមើលមណ្ឌលបែបនេះដោយគ្មានការរឹតបន្តឹងនិងគ្មានការប្រកាសពីសំណាក់ ម៉ាលខូម អុីវែន(Malcolm Evans) ប្រធានអនុគណៈកម្មការបង្ការការធ្វើទារុណកម្មដែលមានភារកិច្ចវាយតម្លៃថា តើភាគីនៃពិធីសារអនុសញ្ញាប្រឆាំងការធ្វើទារុណកម្មកំពុងតែអនុវត្តតាមឬក៏អត់។
លោកបានមានប្រសាសន៍ “អាជ្ញាធរដែលគ្រប់គ្រងមណ្ឌលទាំងនោះនឹងស្វាគមន៍ពេញទំហឹង ហើយធ្វើសហប្រិតបត្តិការជាមួយគណៈប្រតិភូ ហើយនឹងអនុញ្ញាតឲ្យគណៈប្រិតភូទាំងនោះឃ្លាំមើល និងធ្វើសម្ភាសន៍ដោយសម្ងាត់ជាមួយអ្នកដែលត្រូវបានបំបិទសិទ្ធិសេរីភាព រួមទាំងពិរុទ្ធជន ទណ្ឌិត ដោយគ្មានការដាក់កំហិតផងដែរ”។
កាលពីខែមិថុនា គណៈកម្មការសិទិ្ធមនុស្សអាស៊ីបានលើកឡើងថា ការធ្វើទារុណកម្មនៅក្នុងប្រព័ន្ធពន្ធនាគារក្នុងប្រទេសកម្ពុជា “មានលក្ខណៈជាប្រព័ន្ធ”ហើយបានលើកឡើងពីតួលេខបានពីអង្គការសិទ្ធិមនុស្សអាដហុក ដែលកត់ត្រាករណីធ្វើទារុណកម្មយ៉ាងហោចណាស់ចំនួន១៤១ករណីនៅមន្ទីរឃុំឃាំងរបស់នគរបាលចាប់តាំងពីឆ្នាំ២០១០មក។
លោក គុយ ប៊ុនសន អគ្គនាយកនៃអគ្គនាយកដ្ឋានពន្ធនាគារបានមានប្រសាសន៍ថាកាលពីម្សិលមិញលោកបានជួបជាមួយគណៈប្រតិភូទាំងនេះដែលមកពិនិត្យតាមដានទស្សនកិច្ចមួយក្នុងឆ្នាំ២០០៩ដើម្បីពិនិត្យមើលថា តើស្ថានភាពរបស់អ្នកទោសបានប្រសើរឡើងហើយឬនៅ។ ប្រធានពន្ធនាគារនានាទទួលបានការជូនដំណឹងអំពីដំណើរទស្សនកិច្ចនេះអំឡុងសិក្ខាសាលាមួយរៀបចំឡើងកាលពីសប្តាហ៍មុន ដោយអំឡុងពេលនោះមានការពិភាក្សាគ្នាអំពីផែនការយុទ្ធសាស្ត្រសម្រាប់ការគ្រប់គ្រងពន្ធនាគារ។
នៅក្នុងសេចក្តីថ្លែងការណ៍មួយចេញកាលពីថ្ងៃអាទិត្យអង្គការសហប្រជាជាតិបានលើកឡើងថា អនុគណៈកម្មការបង្ការការធ្វើទារុណកម្មនឹងបង្ហាញលទ្ធផលរបស់ខ្លួនដល់អាជ្ញាធរ នៅពេលបេសកកម្មរបស់ខ្លួនឈានដល់ទីបញ្ចប់។ សេចក្តីថ្លែងការណ៍នេះមានខ្លឹមសារដូច្នេះថា “សម្រាប់អនុគណៈកម្មការបង្ការការធ្វើទារុណកម្មដែលមានសារៈសំខាន់ក្នុងការបង្ការការធ្វើទារុណកម្ម និងការធ្វើបាបកំពុងស្ថិតក្នុងដំណាក់កាលបង្កើតទំនាក់ទំនងជាមួយស្ថាប័នរដ្ឋពាក់ព័ន្ធ ហើយគោលការណ៍ណែនាំរបស់ខ្លួនគឺជាកិច្ចសហប្រតិបត្តិការនិងជាការសម្ងាត់”។
សេចក្តីថ្លែងការណ៍នេះបានលើកឡើងថា គណៈប្រតិភូរបស់អង្គការសហប្រជាជាតិក៏នឹងពិភាក្សារិះរកវិធីធ្វើយ៉ាងឲ្យយន្តការបង្ការថ្នាក់ជាតិរបស់រដ្ឋាភិបាលអាចអនុវត្តតាមវិធីសារនេះបាន៕សុខុម
(រាយការណ៍បន្ថែមដោយ Lauren Crothers)