28 C
Phnom Penh

ប្រធាន​អង្គការ​គ្រី​ស្ទាន​​ត្រូវ​បាន​នគរបាល​ចាប់ខ្លួន​នៅ​ក្នុង​ខណ្ឌ​មាន​​ជ័យ​ រាជធានីភ្នំពេញ​

ដោយ ឌឹ ខេមបូឌា ដេលី

បទវិភាគ

កាល​ពីម្សិលមិញ នគរបាល​ប្រឆាំង​​ការ​ជួញដូរ​មនុស្ស​បាន​ចាប់​ខ្លួន​​ជន​ជាតិ​អាមេរិក​កាំង​អាយុ​៣៥​ឆ្នាំម្នាក់​​ ដែល​​​មាន​​​តួនាទី​​​ជា​ប្រធាន​​​អង្គការ​គ្រិស្ទាន​​​​មួយ​​​នៅ​ក្នុង​​ខណ្ឌ​មាន​ជ័យ​​​​ ​រាជធានី​ភ្នំពេញ​ ​ប៉ុន្តែ​​​​ មិន​​​បាន​​​​បញ្ជាក់​​​ថា  តើជន​ជាតិ​អាមេរិកកាំង​រូប​នេះ​​​ជាប់​​​​​​សង្ស័យ​ថា បាន​ប្រព្រឹត្ត​​​​​​​​បទ​ល្មើស​​​​​អ្វី​​​នោះ​ទេ​។

គេ​ហទំព័រ​ព័​ត៌មាន​ក្នុង​ស្រុក​ Cambodia Express News ហៅកាត់​​​ថា​​​ CEN បាន​ឲ្យ​​​ដឹង​​​ថា ជន​សង្ស័យ​ឈ្មោះ ដានី​​​ញែល​ ចន​សុន​ (Daniel Johnson) ត្រូវ​បាន​ចាប់​ខ្លួន​នៅ​វេលា​ម៉ោង​៩​យប់​នៅ​មណ្ឌល​កុមារ​កំព្រា​ Home of Hope ក្នុង​ភូមិ​សន្សំកុសល​ សង្កាត់​បឹង​ទំពុន​ ខណ្ឌ​​​មានជ័យ​​​ បន្ទាប់​ពី​​​​មាន​​​ប្រតិបត្តិ​​​ការ​រួម​​​​គ្នា​​​មួយ​ដែល​​​មាន​​​ការ​​​ចូលរួម​​​ពី​​​នគរបាល​ និង​ទីភ្នាក់​​​ងារ​​​ស៊ើប​អង្កេត​ FBI របស់​​​សហរដ្ឋ​​​អាមេរិក​។ យោង​តាម​គេ​ហ​ទំព័រ​​​របស់​​​អង្គការ​​​​​​​​​​​គ្រិស្ទាន​នោះ​​​ មណ្ឌល​កុមារ​កំព្រា​​​នេះ​​​មាន​​​កុមារ​ស្នាក់​​​នៅ​​​ចំនួន​៣០​នាក់​។

លោក ប៉ុល ពិថី​ ប្រធាន​នាយក​ដ្ឋាន​​ប្រឆាំង​ ការ​ជួញ​ដូរ​មនុស្សនៃ​​​ក្រសួង​មហា​ផ្ទៃ​ បាន​​​​ឲ្យ​​​ដឹង​​​ថា ជន​សង្ស័យ​រូប​នេះ​ពិតជា​​​ត្រូវ​បាន​ចាប់ ​ខ្លួន​​​មែន​​​ ហើយ​​​​កំពុង​ត្រូវបាន​​​ឃុំ​ខ្លួន​ដោយ​​នគរ​បាល​ប្រឆាំង​ការ​ជួញ​ដូរ​មនុស្ស​ ក៏​ប៉ុន្តែ​ លោក​បាន​​​បដិសេធមិន​បញ្ជាក់​​​​អំពី​បទ​​​​ចោទ​ប្រកាន់​​​​លើ​​​រូបគាត់​​​ឡើយ​។ លោក​បានមាន​​​ប្រសាសន៍​​​​ថា “ យើង​កំពុង​ធ្វើ​ការ​​។​​​ ​​​ថ្ងៃ​​​ស្អែក​ចាំ​​​ធ្វើ​​​សេចក្តី​​​រាយ​ការណ៍​ពី​រឿង​​​នេះ​​​​ទៅ​​​”។

​​ឧត្តម​សេនីយ៍ឯក​ ខៀវ​​​ សុភ័គ​​​ អ្នក​នាំពាក្យ​ ក្រសួង​មហាផ្ទៃ​ បាន​បង្វែរ​សំណួរ​​​​​​​ទៅលោក​ គាត ច័ន្ទថារិទ្ធ​ អ្នក​នាំ​ពាក្យ​​នគរ​បាល​ជាតិ​ដែល​​ មិន​អាច​ទាក់​ទង​សុំ​​​ការ​​​​​​​អត្ថាធិប្បាយ​​​បាន​​​​។ លោក កែវ​ ធា នាយ​ការិយា​​​ល័យ​​​នគរ​បាល​ប្រឆាំង​ការ​ជួញ​ដូរ​​​មនុស្ស​​​ និង​​​ការពារ​​​អនីតិ ជន​​​នៃ​​​ស្នងការ​​​ដ្ឋាន​​​នគរបាល​​​​រាជធានី​ភ្នំពេញ​​​ ក៏​បាន​បដិសេធ​មិន​ធ្វើ​​​​​​​​​​អត្ថាធិ​ប្បាយ​​​​​ដែរ។

លោក​ យី ម៉ូដែន អនុប្រធាន​ផ្នែក​​ចុះ​​​ប្រតិ​បត្តិ​ការ​​​​ផ្ទាល់​​​របស់​អង្គការ​ សកម្ម​ភាព​ដើម្បី​កុមារ​ ដែល​ជា​អង្គការ​ក្រៅ​រដ្ឋាភិបាល​ប្រឆាំង​ជន​​​​រួម​ភេទ​ជាមួយ​កុមារ​​​ បានឲ្យ​​​ដឹង​​​ថា អង្គការ​របស់​លោក​មិន​អាច​ធ្វើ​​​អត្ថា​ធិប្បាយ ​អំពី​ករណី​នេះ​ នៅ​ពេល​នេះ​បាន​ឡើយ​។ លោក​បាន​ថ្លែងថា “យើង​​​ពិបាក​​​ប្រាប់​​​ណាស់​​​​ ព្រោះ​នគរបាល​មិន​ចង់​ឲ្យ​យើង​លាត​​​ត្រដាត​​​ពី​ករណី​នេះ​ទេ​ ដោយសារ​​​​វា​​កំពុង​ស្ថិត ​​​​នៅ​​​ក្រោម​ការ​​ស៊ើប​អង្កេត​​​នៅ​​​ឡើយ​​​”។

មណ្ឌល​កុមារ​កំព្រា Home of Hope ស្ថិត​​​នៅ​​​​ក្នុង​ចំណោម​គម្រោង​មួយ​ចំនួន​​​របស់​​​​​​​​អង្គការ​​​​លោក ចន​សុន​​​ គឺ​​​អង្គការ​​​  Hope Transition ដែល​ក៏​​​ត្រូវបាន​​​ចុះ​​​បញ្ជី​​​​​​​​​ក្រោម​​​ឈ្មោះ​​​​បេសកកម្ម​គ្រីស្ទាន​​នៃ​ព្រះ​វិហារ​  Skyline Baptist នៅក្រុង​​​​ North Bend រដ្ឋ​​​ Oregon សហរដ្ឋ​​​អាមេរិក​​​។
ស្ថាន​ទូត​អាមេរិក​ក្នុង​រាជធានី​​​​ភ្នំពេញ​មិន​បាន​ឆ្លើយតប​នឹង​សំណើ​សុំ​​​​ការអត្ថា​ធិ​ប្បាយ ពី​​​ករណី​​​​នេះ​ទេ​៕ ប៊ុននី/សេរីវុធ​​​​​​​​​​​​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស