កាលពីម្សិលមិញ លោកនាយករដ្ឋមន្ត្រី ហ៊ុន សែន បានមានប្រសាសន៍ថា ក្រសួងអប់រំ យុវជន និងកីឡា នឹងជ្រើសរើសគ្រូបង្រៀនចំនួន៦.០០០នាក់ សម្រាប់សាលារដ្ឋនានាទូទាំងប្រទេសនៅឆ្នាំក្រោយ និង៧.០០០នាក់ក្នុងឆ្នាំ២០១៥ ពោលគឺកើនឡើងពីចំនួនគ្រូបង្រៀននាពេលបច្ចុប្បន្នចំនួន៥.០០០នាក់ដែលត្រូវបានជ្រើសរើសក្នុងមួយឆ្នាំៗ។
លោក ហ៊ុន សែន បានថ្លែងអំឡុងពិធីមួយរៀបចំឡើងនៅកោះពេជ្រក្នុងរាជធានីភ្នំពេញ សម្រាប់ជនពិការកម្ពុជាថា ការបង្កើនចំនួនគ្រូបង្រៀននៅរយៈពេលពីរឆ្នាំបន្ទាប់នេះ គឺជាអាទិភាពមួយរបស់រដ្ឋាភិបាល ហើយថា រដ្ឋាភិបាលកំពុងតែជំរុញឲ្យជនពិការដាក់ពាក្យធ្វើគ្រូបង្រៀន។ លោកបានមានប្រសាសន៍ថា “នៅក្នុងអាណត្តិទី៤ រដ្ឋាភិបាលបានអនុញ្ញាតឲ្យជ្រើសរើសគ្រូបង្រៀនចំនួន៥.០០០នាក់ក្នុងមួយឆ្នាំ។ ប៉ុន្តែ ចាប់ពីឆ្នាំ២០១៤ទៅ ក្រសួងអប់រំត្រូវបានអនុញ្ញាតឲ្យជ្រើសរើសគ្រូបង្រៀនចំនួន៦.០០០នាក់ ពីព្រោះថវិកាជាតិត្រូវបានអនុម័តរួចហើយ និង [អនុញ្ញាតឲ្យបង្កើនចំនួនគ្រូបង្រៀន] ហើយគ្រូបង្រៀនចំនួន៧.០០០នាក់ នឹងត្រូវជ្រើសរើសសម្រាប់វិស័យអប់រំក្នុងឆ្នាំ២០១៥”។
ពាក់ព័ន្ធនឹងការបង្កើនចំនួនគ្រូបង្រៀននេះ លោក ហ៊ុន សែន បានអំពាវនាវឲ្យក្រសួងអប់រំ យុវជន និងកីឡា រក្សាកម្មវិធីសិក្សាសម្រាប់អ្នកគថ្លង់ ពិការភ្នែក និងពិការកាយសម្បទាន ហើយបានជំរុញឲ្យពង្រីកកម្មវិធីសិក្សាដូចកម្មវិធីសិក្សាសម្រាប់កុមារគថ្លង់ និងពិការភ្នែកនៅសាលារៀនរបស់អង្គការគ្រួសារថ្មី ដែលជាអង្គការក្រៅរដ្ឋាភិបាលអ៊ីចឹងដែរ។
លោកមានប្រសាសន៍ថា “ក្រសួងអប់រំត្រូវតែទទួលខុសត្រូវចំពោះអ្វីដែលគ្រួសារថ្មី និងអង្គការផ្សេងៗទៀតបានធ្វើ”។ លោកបានលើកឡើងបន្ថែមទៀតថា គ្រួសារនានាក៏គួរតែប្រើប្រាស់ភាសាសញ្ញាអន្តរជាតិជាមួយសមាជិកក្រុមគ្រួសារគថ្លង់ផងដែរ ជាជាងការអភិវឌ្ឍភាសាសញ្ញាផ្ទាល់ខ្លួន៕ សុខុម