28 C
Phnom Penh

អ្នក​​ថត​រូប​ឲ្យទូរ​ទស្សន៍​ជាតិ​ម្នាក់​រង​ការ​ប៉ះ​ទង្គឹច​អំឡុង​ការ​ជួប​ជុំ​ក្នុង​ទិវា​សិទ្ធិ​​មនុស្ស​អន្តរ​ជាតិ

ដោយ ឌឹ ខេមបូឌា ដេលី

បទវិភាគ

ជន​រងគ្រោះ​ និង​លោក ខៀវ​ កាញា​រីទ្ធ​រដ្ឋ​មន្ត្រី​ក្រសួ​ងព័ត៌មាន​បាន​ឲ្យ​ដឹង​ថា អ្នក​ថត​រូប​ម្នាក់​របស់​ទូរទស្សន៍​ជាតិ​កម្ពុជា ដែល​ជា​ទូរទស្សន៍របស់រដ្ឋ​ ហៅកាត់​ថា ទទក ត្រូវ​បាន​​រងការវាយ​ដំ​នៅ​ឯ​ទីលាន​ប្រជាធិបតេយ្យ​ ខណៈដែល​ជនរង​គ្រោះបាន​ព្យាយាម​ថត​មេដឹកនាំ​គណបក្ស​សង្គ្រោះ​ជាតិ​នៅ​ក្នុងពិធី​ជួប​ជុំ​មួយ​ដើម្បី​ប្រារព្ធ​ទិវា​សិទ្ធិមនុស្ស​អន្តរ​ជាតិ​។

លោក សេង​ ចាន់ អាយុ​៣៤​ឆ្នាំ បាន​មាន​ប្រសាសន៍​ថា លោក​ត្រូវ​បាន​គេទះកំផ្លៀង​​ជា​ច្រើន​ដង​ ហើយ​ច្របាច់ក​ អំឡុង​​ពេល​​មាន​ ជម្លោះ​ជាមួយ​ក្រុម​អ្នក​វាយ​ប្រហារ​ដែល​ចោទ​ប្រកាន់​លោកថា លោក និង​អ្នក​ផ្សព្វ​ផ្សាយ​របស់​រដ្ឋ​​​មាន​ភាពលម្អៀង​ទៅ​រក​គណបក្ស​ប្រជាជន​កម្ពុជា​ ​របស់​​លោកនាយក​រដ្ឋ​មន្ត្រី​ ហ៊ុន សែន។

លោក សេង​ ចាន់ បាន​មាន​ប្រសាសន៍​តាម​ទូរស័ព្ទ​ថា “មនុស្ស​ម្នាក់​បាន​ស្រែកថា វីដេអូ​[ផ្សាយ​អំពីព្រឹត្តិការណ៍​របស់​គណ​បក្ស​ប្រឆាំង​]​ ទទក​ មិន​ដែល​ចាក់​ផ្សាយ​ឡើយ”។ លោកបាន​មាន​ប្រសាសន៍​ទៀត​ថា “សង្ឃ​មួយអង្គ​បាន​ក្របួច​កអាវ​របស់​ខ្ញុំ​​ហើយ​សួរ​ខ្ញុំ​ថា មក​ពីណា​។ ពួកគេ​បាន​និយាយ​ថា ទទក ចាក់​​ផ្សាយ​តែ​រឿង​មិន​ល្អ​ប៉ុណ្ណោះ​ មិនដែល​ចាក់​ផ្សាយ​រឿង​ល្អ​នោះ​ទេ​”។

បន្ទាប់​ពី​ព្យាយាម​ពន្យល់​ថា ព្រះសង្ឃ​អង្គ​នោះគ្មាន​សិទ្ធិ​តទល់​នឹង​រូប​លោក​នោះទេ​ លោក​ សេង​ ចាន់​ បាន​ឲ្យដឹង​ថា ព្រះសង្ឃ​អង្គ​​នោះបាន​​បញ្ជា​ឲ្យ​អ្នក​ផ្សេង​ទៀត​វាយ​គាត់​ “ហើយ​​បន្ទាប់​មក ​ពួក​គេ​បាន​​​ទះក្បាល​ខ្ញុំ​​​ជាច្រើន​ដង​ ហើយ​នៅ​តែ​​បន្ត​វាយ​ខ្ញុំម្តង​ម្នាក់ៗ”។ លោក សេង​ ចាន់​ បាន​ឲ្យ​ដឹង​ថា លោក​​ ក៏​បាន​រង​ការ​វាយ​ប្រហារ​ដោយ​ដប​ទឹក​សុទ្ធ​ដែល​ត្រូវ​បានគប់ទៅលើ​រូប​លោក​ ហើយ ក របស់​លោកមាន​ស្នាម​ជាំ​​ដោយ​សារ​គេ​ច្រ​បាច់​។

លោក​ ខៀវ កាញារីទ្ធ រដ្ឋ​មន្ត្រី​ក្រសួង​​ព័ត៌​មាន​បាន​ឆ្លើយ​តប​ទៅនឹង​ហេតុការណ៍​នេះ​នៅ​តាម​​ទំព័រ​ហ្វេសប៊ុក​របស់​លោក​ដោយ​​អំពាវ​នាវ​ដល់​អ្នក​យក​ព័ត៌មាន​​​កុំ​ឲ្យ​ចូល​រួម​​ព្រឹត្តិការណ៍​របស់​គណបក្ស​សង្គ្រោះ​ជាតិ​នៅ​ពេល​ខាង​មុខ​។ លោក​រដ្ឋ​មន្ត្រី​រូប​នេះបាន​មាន​ប្រសាសន៍​ថា ខ្ញុំ​សូម​ជូន​ដំណឹង​ថា ដើម្បី​រក្សា​សុវត្ថិភាព​អ្នក​យក​ព័ត៌​មាន​របស់​យើង​ ក្រសួង​នឹង​មិន​បញ្ជូន​អ្នក​យក​ព័ត៌មាន​ទៅកាន់​ព្រឹត្តិការណ៍​របស់​គណបក្ស​សង្គ្រោះ​ជាតិ​ទៀត​ឡើយ​ លុះត្រា​តែ​មាន​ការ​ធានា​ពី​មេដឹកនាំ​គណបក្ស​​ នេះ​។ លោក​បន្ថែម​ទៀតថា លោក សេង​ ចាន់​ ត្រូវ​បាន​វាយ​ដូច​ឆ្កែឆ្មា​។

លោក គឹម គុណ​វឌ្ឍន៍ អគ្គ​នាយក​ទូរទស្ស​ន៍​ ជាតិ​កម្ពុជា បាន​ឲ្យដឹង​ថា លោក​យល់​ស្រប​​នឹង​ ប្រសាសន៍របស់លោក​ ខៀវ​ កាញារីទ្ធ​​។​​ លោក​បាន​ថ្លែង​ថា “យើង​នឹង​អនុវត្ត​តាម​ប្រសាសន៍របស់​ឯកឧត្តមរដ្ឋ​មន្ត្រី​ដូច​ដែល​លោក​បាន​លើក​ឡើង​ថា ត្រូវ​មាន​​ការ​ធានា​សន្តិសុខ​” ។ លោក​បាន​បន្ថែមទៀត​ថា ខណៈ​ដែល​​អ្នក​យក​ព័ត៌មាន​ទូរទស្ស​ន៍ ទទក ​ត្រូវ​បាន​យាយីដោយ​ពាក្យ​សម្តី​​កាលពីមុន​ នេះ​ជា​លើក​ទី ១​ហើយ​​ដែល​អ្នក​យក​ព័ត៌ មាន​ត្រូវ​បាន​គេ​វាយ​ប្រហារ​លើ​រាង​កាយ​។

លោក​ យ៉ែម ប៉ុញ្ញារិទ្ធ អ្នក​នាំពាក្យ​គណ​បក្ស​សង្គ្រោះ​ជាតិ​បាន​ឲ្យដឹង​ថា លោក​បាន​ឮអំពី​ការ​វាយ​តប់​នេះ​ ក៏ប៉ុន្តែ លោក​ពុំ​មាន​សេចក្តីលម្អិត​​អំពីអ្វី​ដែល​បាន​កើត​ឡើង​នោះទេ​។ លោក​បាន​មានប្រសាសន៍ថា “ខ្ញុំ​បាន​ឮអំពី​ការ​វាយ​ដំ​នេះ​ ក៏ប៉ុន្តែ ខ្ញុំ​មិន​បាន​ឃើញ​ ឬឮសេចក្តីរាយការណ៍​ពេញ​លេញ​អំពី​ហេតុ​ការណ៍​នេះទេ។ ខ្ញុំនឹង​ពិនិត្យ​ ហើយ ​សម្រេច​​នូវ​អ្វី​ដែលត្រូវ​ធ្វើ​”។

ក្លឹប​អ្នក​កាសែតកម្ពុជា​ បាន​ចេញ​សេចក្តី​ប្រកាស​មួយ​កាល​ពី​រសៀល​ម្សិលមិញ​ ដោយ​ ថ្កោល​ទោស​ការវាយ​ប្រហារ​នេះ​ និង​បាន​និយាយ​ថា សិទ្ធិ​របស់​អ្នក​កាសែត​​ត្រូវ​បាន​ការ​ ពារ​នៅ​ក្នុង​​រដ្ឋ​ធម្មនុញ្ញ។ សេចក្តី​ប្រកាសនេះមាន​ខ្លឹម​សារ​ថា “វា​គួរ​ឲ្យខ្មាស់​អៀន​ដែល​រឿង​នេះ​បាន​កើត​ឡើងនៅ​ចំទិវា​សិទ្ធិមនុស្ស​”។
ក្លឹប​អ្នក​កាសែត​កម្ពុជា​បាន​ឲ្យដឹង​ថា “មេ​ដឹកនាំសកម្មភាព​តវ៉ា​ត្រូវ​តែ​ធានា​មិន​ឲ្យមាន​អំពើ​ហិង្សា​ចេញ​ពីក្រុម​របស់​ខ្លួន​ និង​ធានា​ថា នឹង​គ្មាន​សកម្មភាពបែ​បនេះទៀត​នៅ​ពេល​អនាគត”​៕ ប៊ុននី​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស