26 C
Phnom Penh

សាលារាជធានីភ្នំពេ​ញសន្យា​លើកកម្ពស់​កម្រិត​ជីវភាព​របស់​ប្រជាជន​​ក្រី​ក្រក្នុងក្រុង​​

ដោយ ឌឹ ខេមបូឌា ដេលី

បទវិភាគ

សាលារាជធានីភ្នំពេញ  ក្នុ​ង​ទិវា​សិទ្ធិមនុ​ស្ស​​ អន្តរជាតិ​កាល​ពីម្សិល​មិញ បាន​ប្រកាស​ផែន​ការថ្មី​មួយ ​ដើម្បីលើ់ក​កម្ពស់​កម្រិត​ជីវភាព​នៅ​តំបន់​​ក្រីក្រ​បំផុត​ក្នុង​រាជធានី​​ភ្នំ​ពេ​ញ  ខណៈ​ដែល​​តំណាង​ប្រជាពល​រដ្ឋ​ក្រីក្រ​ក្នុង​រាជធានី​បា​ន​បន្ត​អំពាវ​នាវ​ដល់​សាលា​រាជ​ធានី​​ ភ្នំពេញ​ចេញ​​ប័ណ្ណ​កម្មសិទ្ធិ​ដីធ្លី​ ដែល​គេ​ត្រូវ​ការ​​ជាយូរ​មក​ហើយ​។

ថ្លែង​ទៅ​កាន់​​មនុស្ស​ចំនួន​៦០០នាក់​នៅ​ឯពហុកីឡា​ដ្ឋាន​ជាតិ​អូឡាំពិក​ ​រួម​ទាំង​តំណាង​អង្គការ​សង្គម​ស៊ីវិល​ និង​អង្គការ​ក្រៅ​រដ្ឋាភិ បាល​ចំនួន​៤៩​ លោក​ ប៉ា សុជាតិ​វង្ស អភិបា​ល​​រាជធានីភ្នំពេញ​បាន​លើក​ឡើង​អំពី​គម្រោង​សង់​លំនៅដ្ឋាន​មួយ​នៅ​ក្នុង​ខណ្ឌ​ពោធិ៍សែន​ជ័យ​ ដើម្បី​ធ្វើជាភ័ស្តុ​តាងបញ្ជាក់​​ថា សាលា​រាជធានី​កំពុង​តែ​ធ្វើ​សកម្មភាព​ដើម្បីធ្វើ​ឲ្យ​ស្ថានភាព​រស់​នៅ​របស់​​ប្រជាពល​រដ្ឋ​ក្រី​ក្រ​ក្នុង​រាជធានី​ភ្នំពេញ​ប្រសើរ​ឡើង​​។

លោក​បាន​ថ្លែង​ថា “មាន​កិច្ច​សហ​ការ​រវាង​សាលារាជធានីភ្នំពេញ​ និង​អង្គការ​សង្គម​ស៊ី​វិល​ដើម្បី​ពង្រឹង​សិទ្ធិ​ជាមូល​ដ្ឋាន​របស់​ប្រជា​ពល​រដ្ឋ​ក្រីក្រ​នៅ​រាជធានី​”។ លោក​បាន​បន្ថែម​ថា សាលារាជធានី​​កំពុង​ តែ​សហ​ការ​ជាមួយ​អង្គការ​ក្រៅ​រដ្ឋា​ភិ​បាល​មាន​មូល​ដ្ឋាន​នៅ​សហ​រដ្ឋ​អាមេរិក​មួយ​​​ លើ​គម្រោង​សាក​ល្បង​មួយ ​ដើម្បី​​អភិវឌ្ឍ​សំណង់ ​អនាធិបតេយ្យ គឺ​ភូមិ​អណ្តូង​ នៅក្នុង​​ខណ្ឌ​ពោធិ៍​សែន​ជ័យ​ ​ដែលមាន​ប្រជា​ពល​រដ្ឋ​ជាង​១.០០០គ្រួសារ​រស់​នៅ​។

លោក​បាន​ថ្លែ​ងថា “យើង​អាច​និយាយ​ថា យើង​អាច​ធ្វើ​ឲ្យ​​ប្រសើរ​ឡើង​ និង​អភិវ​ឌ្ឍន៍​តំបន់​នេះ​ឲ្យក្លាយជា​ទីក្រុង​តូច​មួយ​”។ លោក​​បន្ថែម​ថា សំណង់​បាន​ចាប់​ផ្តើម​សង់​ផ្ទះ​ទទឹង​៤ម៉ែត្រ បណ្តោយ​​៦​ម៉ែត្រ ដែល​ត្រូវ​ចំណាយ​ទឹក​ប្រាក់​ប្រមាណ​៥លាន​រៀល​ ឬ​ប្រហែល​១.២២០​ដុល្លារ​។ ​​លោកបាន​បញ្ជាក់​​ថា គ្រួសារ​ប្រជាពលរដ្ឋ​​​អាច​ខ្ចី​ និង​សង​ប្រាក់​ទាំងនេះ​នៅ​ពេល​ក្រោយបាន​។ លោក​បាន​បន្ថែម​ទៀត​​ថា “នេះ​មិន​មែន​​ ជា​សុបិនទេ ប៉ុន្តែ យើង​ពិត​ជា​បានចាប់​ផ្តើម​​ ធ្វើការ​លើ​ផែនការ​ថ្មី​មួយ​មែន”។​

លោក ប៉ា សុជាតិរង្ស ​បាន​លើក​ឡើង​​ទៀត​ថា លោក​នឹង​បន្ត​ធ្វើការយ៉ាង​ជិត​ស្និ​ទ្ធ​ជាមួយ​អង្គការ​សង្គម​ស៊ីវីល​ ដើម្បី​លើក​កម្ពស់​ជីវភាពរស់នៅ​របស់ប្រ​ជា​ជន​​ក្រីក្រ​បំផុត​ក្នុង​រាជធានីភ្នំពេញ​។ លោក​ថ្លែង​ថា “ចាប់​ពី​ពេល​​នេះ​ទៅ​ វាជា​សារ​ដ៏​ច្បាស់​មួយ​ដល់​ ស​ហ​​គមន៍​ក្រីក្រ​ក្នុង​រាជធានី​ថា សា​លា​រាជ​ធានី​ភ្នំពេញ​ និង​អង្គការ​សង្គម​ស៊ីវិល​ នឹង​ប្រមូល​កម្លាំង​ពល​កម្ម​ ធន​ធាន​ និង​គ្រប់ មធ្យោ​​បាយ​ទាំ​ងអស់​ ព្រម​ទាំង​ពេល​វេលា​ដើម្បី​ជួយ​ និង​អនុ​វត្ត​សិទ្ធិ​ជាមូល​ដ្ឋាន​​របស់​​ប្រជា​ជន​ក្រីក្រ​ក្នុង​រាជធានី​”។

យោង​តាម​​ផែន​ទី​មួយ​​ចែក​ចាយ​ដោយ​សាលារាជធានី​ភ្នំពេញ បាន​បង្ហាញ​ថា គ្រួសារ​ ​ប្រជា​ពល​រដ្ឋ​ក្រីក្រ​សរុប​៣២.៥៥៩​គ្រួសារ​រស់នៅក្នុង​រាជធានីភ្នំពេញ​។ ខណ្ឌ​ប្ញស្សីកែវ​មាន​​ចំនួន​ប្រជាជន​៧.៧៦៦​គ្រួសារ​ បន្ទាប់​មក​គឺខណ្ឌមាន​ជ័យ​មាន​​៧.១៤១​គ្រួសារ និង​ខណ្ឌ​ពោធិ៍​សែន​ជ័យ​មាន​៦.១៦៦​គ្រួសារ​។

​នៅ​ក្នុង​កម្មវិធីអបអរ​សាទរ​សិទ្ធិមនុស្ស អន្តរជាតិ ដែលស្រប​តាម​​គោល​ការណ៍​សិទ្ធិ​ជាមូល​ដ្ឋាន​របស់ប្រជា​ជន​ក្រីក្រ​ក្នុង​តំបន់​ក្រុង​ លោក ហែម ផាន តំណាង​​សហគមន៍​ចំនួន​ប្រាំបួន​ ដែល​ត្រូវ​បាន​ជម្លៀស​ចេញ​ពី​កណ្តាល​រាជធានីភ្នំ​ពេញ​ទៅ​សង្កាត់​ឃ្មួញ​ ខណ្ឌ​សែន​សុខ​ បាន​ជំរុញ​ឲ្យ​​លោក​ ប៉ា សុ ជាតិ​វង្ស​ ធ្វើ​ឲ្យ​​លំនៅ​ដ្ឋានបច្ចុ​ប្បន្ន​របស់​ពួក​គាត់ស្រប​ច្បាប់​។

លោក​ ហែម ផាន បាន​ឲ្យ​ដឹង​ថា “ឆ្លៀត​ឱកាស​នេះ យើង​សូម​ប្រគល់​ញតិ្ត​របស់​សហគមន៍​ក្រីក្រ​ក្នុង​​រាជធានី​ភ្នំពេញដោយ​សង្ឃឹម​ថា លោក​អភិបាល​រាជធានី​នឹង​ចេញ​ប័ណ្ណ​កម្មសិទ្ធិ​លើអចលន​ទ្រព្យ​របស់​យើង​ ដែល​យើង​បាន​ និង​កំពុង​រស់​នៅ​ចាប់​តាំង​ពីឆ្នាំ​២០០១​មក”​។ លោក​ ហែម ផាត បាន​បង្ហាញ​ញត្តិចុះ​ហត្ថលេខាដោយ​​ប្រជាពល​រដ្ឋ​គ្មាន​ទីជម្រក​ចំនួន​១.០៥០​គ្រួសារ​ជូន​ដល់​លោកអភិ​បាល​រាជធានី ប៉ា​ សុជាតិ​វង្ស​។

ញត្តិនេះមាន​ខ្លឹម​សារ​ថា “បច្ចុ​ប្បន្ន​នេះ​ ប្រជាពល​រដ្ឋ​ដែ​ល​រស់​នៅក្នុង​សហ​គមន៍​ក្រីក្រ​ចំនួនប្រាំបួន​​ក្នុង​រាជធានីភ្នំពេញ​ពិត​ជាមាន​ការ​បារម្ភ​ និង​មិន​ហ៊ាន​កែ​លម្អ​កន្លែង​ស្នាក់​នៅ​របស់ខ្លួន​ឲ្យមាន​គ្រិះ​រឹង​មាំ​ទេ​ ពី​ព្រោះ​ដីដែល​យើង​រស់​នៅ​ មិ​នទាន់​មាន​ប័ណ្ណ​ ​កម្មសិទ្ធិ​ស្រប​ច្បាប់​នៅ​ឡើយ​​ទេ​”៕ប៊ុននី​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស