28 C
Phnom Penh

នគរបាល​ចាប់​ខ្លួន​​មនុស្ស​បួន​នាក់​ដែល​​​​នាំ​​ស្ត្រីកម្ពុជា​​ទៅ​​រៀប​ការ​​នៅ​ចិន

ដោយ ឌឹ ខេមបូឌា ដេលី

បទវិភាគ

នគរបាល​ប្រឆាំង​ការ​ជួញ​ដូរ​មនុស្ស​បាន​ឲ្យ​ដឹង​ថា បុរសបួននាក់​ដែល​ជាប់​សង្ស័យ​ថា បាន​ជួញដូរ​ស្ត្រី​ទៅ​ប្រទេស​ចិន​ដោយ​​មាន​លេស​ថា ​យក​ពួកគេ​ទៅរៀបការ​ជា​មួយ​បុរស​អ្នក​​​មាន​នោះ​ ត្រូវបាន​ចាប់​ខ្លួន​នៅ​ក្នុង​ទីក្រុង​ភ្នំពេញ កាលពីម្សិលមិញ។

លោក កែវ ធា នាយ​ការិយាល័យ​នគរ​បាល​​ប្រឆាំង​ការ​ជួញដូរ​មនុស្ស​​​ បាន​មាន​ប្រសាសន៍​ថា ជន​សង្ស័យ​ទាំង​នេះ​បានជាប់​ពាក់​ព័ន្ធ​នៅ​ក្នុង​ការ​​នាំ​ស្ត្រី​ទៅ​លក់​នៅប្រទេស​ចិន​អស់​រយៈ​ពេលជាច្រើន​ឆ្នាំ​មកហើយ​ ហើយ​ថា ​​នគរ​បាល​មាន​ការ​​ចាប់​អារម្មណ៍​​លើ​ពួក​គេ​​នៅ​ពេលស្ត្រី​ពីរ​នាក់​ដែល​បាន​ព្រម​ព្រៀង​ទៅ​ប្រទេសចិន មាន​ការ​​សង្ស័យ​អំពី​រឿង​នេះ​ ហើយ​​​បាន​ទាក់​ទង​ទៅនគរ​បាល​។

លោក កែវ ធា មាន​ប្រសាសន៍​ថា “យើង​​​​បាន​ចាប់​ខ្លួន​បុរស​បួននាក់​កាលពីម្សិល​មិញ ដោយសារ​មាន​ពាក្យ​បណ្ដឹង​ពី​ស្ត្រីពីរ​នាក់​ដែល​បាន​ឮថា ពួកគេ​នឹង​ទៅ​ប្រទេស​ចិន​តាម​ប្រទេស​វៀតណាម​ ដោយ​មិនទៅ​ប្រទេស​ចិ​ន​ដោយ​ផ្ទាល់ដូច​ការ​សន្យា​” ។ លោក​បាន​មាន​ប្រសាសន៍​ថា “ពេល​នេះ​អ្នក​ជួញដូរ​មនុស្ស​ទាំង​នេះ​បាន​ប្ដូរ​​គោល​ដៅ​​ដោយនាំ​ស្ត្រី​ឆ្លង​កាត់​ច្រក​ទ្វា​​រព្រំដែន​អន្តរ​ជាតិ​​​បាវិត ទៅ​ប្រទេស​វៀត​ណាម​”។

ស្ត្រី​ទាំង​ពីរ​នាក់ ដែលម្នាក់​មកពីខេត្ត​ក្រចេះ​​មាន​អាយុ​២០​ឆ្នាំ និង​ម្នាក់​ទៀត​មក​ពីខេត្ត​កំពង់​ចាម មាន​អាយុ​២១​ឆ្នាំ បាន​ព្រម​ព្រៀង​ជាមួយ​អ្នកជួញដូរ​មនុស្ស​ដោយ​ជឿ​ថា ពួក​គេ​នឹង​បាន​រៀប​ការ​រស់​នៅ​ជា​មួយ​​​​​គ្រួសារ​​អ្នក​មាន​នៅ​ចិន​។ បន្ទាប់ពីបាន​ដឹង​ថា ពួកគេ​ត្រូវ​ឆ្លង​​កាត់​តាម​ប្រទេស​វៀតណាម​នោះ ស្ត្រី​ទាំង​ពី​រ​នាក់​​​នេះ​បាន​ប៉ុន​ប៉ង​ដក​ខ្លួន​ចេញពី​កិច្ច​ព្រម​ព្រៀង​​​នេះ​វិញ​។

លោក កែវ ធា មាន​ប្រសាសន៍​ថា “ជន​រង​គ្រោះ​ទាំង​ពីរ​នាក់​មិន​ព្រម​ទៅ​តាម​ប្រទេស​វៀតណាម​ទេ​ ហើយ​ជន​សង្ស័យទាំង​បួន​នាក់​បាន​គំរាម​ពួកគេ​ និង​ជម្រិត​ទារ​លុយ​ពី​ពួកគេ​”។ ​លោក​បាន​បន្ថែម​ថា ស្ត្រីទាំង​​ពីរ​នាក់​​បាន​បង់​លុយ​ម្នាក់​៥០០​ដុល្លារ​ទៅ​ឲ្យ​ជន​សង្ស័យ​ជួយ​ដូរ​មនុស្ស​ទាំង​នេះ​សម្រាប់​ថ្លៃ​ធ្វើលិខិត​ឆ្លង​ដែន​ និង​​ទិដ្ឋាការ​។

លោក​បានមាន​ប្រសាសន៍​ថា “រឿង​នេះ​បែក​ការ​នៅពេល​ពួកគេ​ទៅជួប​នគរ​បាល​ ហើយជន​សង្ស័យ​ទាំង​បួន​នាក់​ត្រូវ​​ឡើង​តុលា​ការ​នៅ​ថ្ងៃ​នេះ​”។ កាល​ពីខែ​វិច្ឆិកា នគរ​បាល​ប្រឆាំង​ការ​ជួញ​ដូរ​មនុស្ស​បានចាប់​ខ្លួន​មនុស្ស​ប្រាំនាក់​​នៅ​ក្នុង​ករណី​ពីរ​ដោយ​ឡែក​ពីគ្នា​ចំពោះ​ការ​ប៉ុន​ប៉ង​​​បញ្ជូន​ស្ត្រី​វ័យ​ក្មេង​ប្រាំមួយនាក់​ទៅ​​រៀប​ការ​នៅ​ប្រទេស​ចិន និង​ទីក្រុង​ម៉ាកាវ។

ជន​សង្ស័យ​ទំាង​នេះ​ត្រូវ​បាន​ចាប់​ខ្លួន​នៅ​អាកាស​យាន​ដ្ឋាន​អន្តរជាតិ​ភ្នំពេញ និង​នៅ​​អា​កាស​យាន​ដ្ឋាន​អន្តរជាតិ​សៀម​រាប​ បន្ទាប់​ពី​​នគរ​បាល​មាន​ការ​សង្ស័យលើ​ពួកគេ​។ នៅ​ពេល​នោះ លោក ហ៊ុយ ពេជ្រ​សុវណ្ណ មន្ត្រី​កម្មវិធី​នៅមជ្ឈមណ្ឌលអប់​រំ​​ច្បាប់​សម្រាប់​​​សហគមន៍ បាន​មាន​ប្រសាសន៍​ថា ករណី​បែប​នេះ​កំពុង​កើនឡើង​នៅ​កម្ពុជា​ ហើយ​ថា គោល​នយោបាយ​​កូន​មួយ​ដ៏ចម្រូង​ចម្រាស​របស់​ប្រទេស​ចិន​ដែល​ចង់​បាន​តែ​កូន​ប្រុស​នោះ គឺ​ជា​ឫស​គល់​នៃ​បញ្ហា​នេះ​៕ គឹមហឿន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស