30 C
Phnom Penh

 របាយការណ៍បង្ហាញថា ប្រទេស​កម្ពុជា​ទទួល​បាន​ចំណាត់​ថ្នាក់​ខ្ពស់បំផុត​ផ្នែក​ទុក្ខ​វេទនា​

ដោយ ឌឹ ខេមបូឌា ដេលី

បទវិភាគ

យោង​តាម​លទ្ធផល​នៃការស្ទង់មតិទូទាំង​ពិភពលោក​ ដែល​អង្គការ​ហ្គាឡាប (Gallup) ទើប​នឹង​ចេញ​ផ្សាយ​បាន​បង្ហាញ​ថា ប្រទេស​កម្ពុជា​ឈរនៅ​ចំណាត់​ថ្នាក់​លេខ​៣​ផ្នែក​ទុក្ខវេទនា​ទូទាំង​សាកល​លោក​កាល​ពីឆ្នាំ​មុន​ ពោល​គឺ​ឈរ​នៅ​ពីក្រោយ​ប្រទេស​ប៊ុល​ហ្គា​រី និង​ប្រទេស​អាមេនៀ ហើយ​នេះ​គឺជា​ការ​ឡើង​ចំណាត់​ថ្នាក់​មួយ​គួរ​ឲ្យកត់​​សម្គាល់​​បើ​ធៀប​នឹង​ឆ្នាំ​២០១១​នៅ​ពេល​ដែល​ប្រទេស​ នេះ​ឈរ​នៅ​ចំណាត់​ថ្នាក់​លេខ​១៤​។

លទ្ធផល​ស្ទង់​មតិ​ចេញ​ផ្សាយ​កាល​ពី​សប្តាហ៍​មុន​​នៅ​លើគេ​ហទំព័រ​អង្គការ​ហ្គា​ឡាប​  បាន​បង្ហាញ​ថា  ៣៤​ភាគរយ​ក្នុង​ចំណោម​អ្នក​ចូល​រួម​សម្ភាសនៃ​ប្រទេស​កម្ពុជា​​ បាន​វាយ​តម្លៃ​ថា ជីវិត​របស់​ពួក​គេ​ស្ថិត​នៅ​ក្នុង​ស្ថាន​ភាព​យ៉ាប់​យ៉ី​ន​ ល្មម​នឹង​ត្រូវ​បាន​ចាត់​ទុក​ជា​ស្ថាន​ភាព​មាន​ទុក្ខ​វេទនា​ក្នុង​ឆ្នាំ​២០១២​។​កាល​​ ពីឆ្នាំ​២០១១​អត្រា​នេះ​មាន​២៦​ភាគ​រយ​។

ចំណាត់​ថ្នាក់​នេះ​បាន​នាំ​ឲ្យ​ប្រទេស​កម្ពុជា​ ឈរ​នៅ​ចំណាត់​ថ្នាក់​ទី​៣​រាប់​ពីក្រោម​​តារាង​​​បញ្ជី​​ដែល​មាន​១៤៣​ប្រទេស​ត្រូវ​បាន​ធ្វើ​សម្ភាស​កាល​ពីឆ្នាំ​មុន​។ កាល​ពីឆ្នាំ​២០១១​ ១៤៦​ប្រទេស​ត្រូវ​បាន​ធ្វើ​សម្ភាស​។ អង្គការ ​ហ្គាឡា​ប​បាន​ឲ្យ​ដឹង​ថា ខ្លួន​បាន​សម្ភាស​​ប្រជាជន​ប្រហែល​១.០០០នាក់​ ដែល​អាយុ​១៥​ឆ្នាំ​ ឡើង​នៅ​ក្នុង​ប្រទេស​នីមួយ​ៗ​តាម​រយៈ​ទូរ​ស័ព្ទ​ និង​ដោយ​ទល់​មុខ​គ្នា​ផ្ទាល់​។

នៅ​ក្នុង​តំបន់​ ប្រជាជន​ថៃ​២ភាគរយ​​បាន​ឆ្លើយ​តប​ថា ពួក​គេ​មាន​ទុក្ខវេទនា​ ប្រជាជន​សិង្ហបុរី​ដែល​ឆ្លើយ​ត​ប​បែ​បនេះ​​មាន​៤​ភាគ​រយ​ ប្រជាជន​ឥណ្ឌូណេ​ស៊ី​មាន​​៥​ភាគ​រយ​ ប្រជាជន​ឡាវ​ មាន​​៧​ភាគរយ​ និង​ប្រជាជន​វៀត​ណាម​ មាន​៩​ភាគរយ​។ អង្គការ​ ហ្គាឡាប បាន​ធ្វើ​ចំណាត់​ថ្នាក់​អ្នក​ឆ្លើយ​ត​ប​ ដោយ​​​បែង​ចែក​ជា​ស្ថាន​ភាព​ “រីក​ចម្រើន​” “មាន​ការលំបាក​” ឬក៏​ “មាន​ទុក្ខ​វេទ​នា” ដោយ​ផ្អែក​លើ​ចំណាត់​ថ្នាក់​នៃ​ចម្លើយ​​បញ្ជាក់​ពី​ជីវិត​បច្ចុប្បន្ន​ និង​នៅ​ពេល​អនាគត​របស់​អ្នក​ឆ្លើយ​តប​ទាំង​នោះ​ ពោល​គឺ​ចំណាត់​ថ្នាក់​នៃ​ចម្លើយ​តប​មានពីលេខ​០​ដល់​លេខ​១០​ នេះបើ​យោង​តាម​សេចក្តី​ប្រកាស​របស់​អង្គការ​នេះ​នៅ​លើ​គេហ​ទំព័​របស់​ខ្លួន​។

អង្គការ​នេះ​ បាន​ចាត់​ទុក​ប្រជា ជន​​ថា មាន​ទុក្ខ​វេទនា​ ប្រសិន​បើ​ជីវិត​បច្ចុប្បន្ន​ របស់​ពួក​គេ​ស្ថិត​នៅ​ចំណាត់​ថ្នាក់​ទី៤​ ឬ​ក៏​ទាប​ជាង​នេះ​ ហើយ​ជីវិត​របស់​ពួក​គេ​ក្នុង​រយៈ​ពេល​ប្រាំឆ្នាំ​ស្ថិត​នៅ​ចំណាត់​ថ្នាក់​ទី​៤ ឬ​ទាប​ជាង​នេះ​។ អ្នក​ឆ្លើយ​តប​មិន​បាន​ប្រើ​ពាក្យ​ទុក្ខ​វេទនា​ដើម្បី​ពិពណ៌នា​អំពីខ្លួន​ឯង​ទេ​។

គុណវុឌ្ឍិ​​ដែល​អង្គការ​ ហ្គាឡាប​ ប្រើ​ក្នុង​ការ​ស្ទង់​មតិ​ប្រជាជន​មាន​លក្ខ​ណៈ​មិន​ច្បាស់​លាស់​ ហើយ​សំណើ​សុំឲ្យ​អង្គការនេះ​​ធ្វើ​សេចក្តីអត្ថាធិ​ប្បាយ​ មិន​ទទួល​បាន​ការ​ឆ្លើយ​តប​វិញ​ទេ​កាល​ពីម្សិលមិញ​។ ក៏​ប៉ុន្តែ អង្គការ​នេះ​ពិត​ជា​បញ្ជាក់​ពី​ទំនាក់​ទំនង​ផ្សេង​ៗ​ ដោយ​លើក​ឡើង​ថា រង្វាស់​នៃ​សុខា​មាល​ភាព​មាន​ទំនាក់​ទំនង​ទៅ​នឹង​ប្រាក់​ចំណូល​ កម្រិត​វប្បធម៌​ និង​ស្ថានភាព​ជំងឺ​។

អង្គការ​ ហ្គាឡាប បាន​លើក​ឡើង​នៅ​ក្នុង​គេ​ហទំព័រ​របស់​ខ្លួន​ថា “ប្រជាជន​ដែល​មាន​ភាព​រីក​ចម្រើន​ មាន​ស្ថាន​ភាព​ជំងឺ​ធូរ​ស្រាល​ជាង​ ចំនួន​ថ្ងៃ​ឈឺ​តិច​ជាង​ និង​ប្រាក់​ចំណូល​ខ្ពស់​ជាង​។ លើ​ស​ពីនេះទៀត​ ប្រជាជន​ទាំង​នេះ​មាន​កម្រិត​អប់​រំខ្ពស់​ និង​មាន​បរិស្ថាន​ការ​ងារ​ប្រសើរ​ជាង​។ ប្រជាជ​ននៅ​បណ្តា​ប្រទេស​ ដែល​មាន​ភាគ​រយ​ខ្ពស់​ក្នុង​ចំណោម​អ្នក​ឆ្លើយ​ត​ប​ថា ខ្លួន​មាន​ភាព​រីក​ចម្រើន​ ក៏​រាយការណ៍​ផង​ដែរ​ថា តំបន់​ដែល​ពួក​​គេ​រស់​នៅ​ គឺជា​ទី​កន្លែង​ល្អមួយ​សម្រាប់​រស់​នៅ​ និង​មាន​ជន​ជាតិ​ ពូជ​សាសន៍​ និង​វប្បធម៌​ផ្សេង​ៗ​គ្នា។

បើ​ប្រៀប​ធៀប​ទៅ​នឹង​អ្នក​ឆ្លើយ​តប​ ដែល​មាន​ភាព​រីកចម្រើន​ អ្នក​ឆ្លើយ​តប​ដែល​មាន​ទុក្ខ​លំបាក​មាន​ការ​ព្រួយ​បារម្ភ​ខ្លាំង​ជាង​​អំពី​​ប្រាក់កាស​សម្រាប់​ចាយ​វាយ​ទៅលើ​តម្រូវ​ការ​ប្រចាំថ្ងៃ​ ហើយ​អ្នកឆ្លើយ​តប​ដែល​មាន​ទុក្ខ​វេទនាមិន​សូ​វ​ជាមាន​កត្តាចាំបាច់​​ផ្សេង​ៗ​ដូចជា​​ម្ហូប​អាហារ​ និងទី​ជម្រក​ទេ​”។

អ្នកស្រី ពង្ស​ ស៊ាវ​ហ្គិច នាយិការ​អង្គការ​សិទ្ធិ​មនុស្ស​ក្នុង​ស្រុក​ លីកាដូ​ បាន​លើកឡើង​ថា ​ដោយ​សារ​តែ​ប្រជាជន​កម្ពុជា​នៅ​តែ​ប្រឈម​នឹង​ស្ថាន​ភាព​លំបាក​ៗ​ដូចជា សកម្ម​ភាព​ទន្ទ្រាន​យក​ដី​ ភាពក្រីក្រ​ និង​កង្វះការ​អប់​រំ​​ព្រម​ទាំង​សកម្មភាព​​ចំណាកស្រុក​ ដើម្បី​រកការ​ងារ​ធ្វើ​ ទុក្ខ​វេទនា​អាច​នឹង​យ៉ាប់​យឺ​ន​ជាង​មុន​ទៀត​។

លោក​ស្រី​បាន​មាន​ប្រសាសន៍ថា “វា​ជា​រឿង​គួ​រឲ្យ​កត់​សម្គាល់ដែល​ប្រទេស​កម្ពុជា​ទទួល​បាន​ចំណាត់​ថ្នាក់​​ទាប​ខ្លាំង​នៅ​ទូទាំង​ពិភព​លោក​។ បញ្ហា​នេះ​គួរ​តែ​ជាសញ្ញា​មួយ​ផ្សេង​ទៀត​ដែល​បញ្ជាក់​ប្រាប់​រដ្ឋាភិបាល​កម្ពុជា​ថា ស្ថាន​ភាព​នេះ​មិន​ល្អទាល់​តែ​សោះ​ បើទោះ​ជាមាន​ការ​អះអាង​ថា មាន​កំណើន​សេដ្ឋកិច្ច​ និង​ការ​អភិវឌ្ឍ​ជា​បន្ត​បន្ទាប់​ក៏​ដោយ​”។ ប្រទេស​ទាំង​បី​ ដែល​អ្នក​ឆ្លើយ​តប​លើក​ឡើង​ថា ខ្លួន​មាន​ទុក្ខ​វេទនា​តិច​បំផុត​នោះ​គឺ ប្រទេស​អ៊ីស្លង់​ កាតា និង​ប្រទេស​ស៊ុយ​អែត៕ សុធា​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស