24.6 C
Phnom Penh

ក្រុម​​​អ្នក​​​ភូមិ​​​អំពាវ​​​នាវ​​​ឲ្យ​​​ស្ថានទូត​​​ចិន ជួយ​​​​​​អន្តរាគមន៍​​​ប្រឆាំង​​​អ្នក​​​វិនិយោគលើ​​​​​​ទំនប់​​​វារី​​​អគ្គិសនី​​​

ដោយ ឌឹ ខេមបូឌា ដេលី

បទវិភាគ

នៅ​​​ថ្ងៃ​​​នេះ​​​សហគមន៍​​​នានា​​​ដែល​​​រង​​​ការ​​​គំរាម​​​កំហែង​​​ដោយ​​​គម្រោង​​​សាង​​​សង់​​​ទំនប់​​​វារី​​​អគ្គិសនី​​​ចំនួន​​​បី​​​ក្នុង​​​ខេត្ត​​​ស្ទឹង​​​ត្រែង និង​​​ខេត្ត​​​រតនគិរី នឹង​​​ដាក់​​​ញត្តិទៅ​​​ស្ថាន​​​ទូត​​​ចិន​​​ទាម​​​ទារ​​​ឲ្យ​​ស្ថាន​​​ទូត​​​នេះ​​​អន្តរាគមន៍​​​ប្រឆាំង​​​ក្រុម​​​ហ៊ុន​​​ចិន​​​នានា​​​ដែល​​​វិនិយោគ​​​លើ​​​ទំនប់​​​វារី​​​អគ្គិសនី​​​។

ញត្តិ​​​ដែល​​​សរសេរ​​​ជា​​​ភាសាចិន ភាសា​​​ខ្មែរ និង​​​ភាសា​​​អង់គ្លេស​​​នេះ ជំរុញ​​​ឲ្យ​​​លោកស្រី​​​ ពូ ចៀនគ័រ ឯកអគ្គរដ្ឋទូតចិន​​​ប្រចាំ​​​ប្រទេស​​​កម្ពុជា​​​ “មេត្តា​​​អ​​​ន្តរាគមន៍​​​ ​​​រឿង​​​ក្រុម​​​ហ៊ុន​​​ Hydrolancang [International Energy] ពិចារណា​​​ឡើង​​​វិញ​​​អំពីការ​​​វិនិយោគ​​​របស់​​​ក្រុម​​​ហ៊ុន​​​នេះ​​​លើ​​​ទំនប់​​​វារី​​​អគ្គិសនី​​​ទន្លេ​​​សេសាន​​​ក្រោម​​​២​​​” ដែល​​​គ្រោង​​​​​​​​​សាង​​​សង់​​​​​​ដោយ​​​​​​​​​សហការ​​​ជាមួយ​​​ក្រុម​​​​​​ហ៊ុន​​​រ៉ូយ៉ាល់​​​គ្រុប​​​ ជាក្រុម​​​ហ៊ុន​​​រួម​​​របស់​​​កម្ពុជា​​​។

ការ​​​សិក្សា​​​ពេល​​​ថ្មី​​​ៗនេះ​​​បាន​​​បង្ហាញ​​​ថា ទំនប់វារី​​​អគ្គិសនី​​​សេសាន​​​ក្រោម២​​​កម្លាំង​​​៤០០មេហ្គាវ៉ាត់​​​ ក្នុង​​​ខេត្ត​​​ស្ទឹង​​​ត្រែង​​​ នឹង​​​ជម្លៀសប្រជាពលរដ្ឋចំនួន​​​៥.០០០នាក់​​​ ហើយ​​​​​​នឹង​​​ជះ​​​ផល​​​ប៉ះ​​​ពាល់ដល់​​​ប្រជាពលរដ្ឋ​​​១០០.០០០នាក់​​​បន្ថែម​​​ទៀត​​​ ហើយ​​​តាម​​​ការ​​​រំពឹង​​​ទុក​​​ថា​​​ បរិមាណ​​​ត្រី​​​ក្នុង​​​អាង​​​ទន្លេមេគង្គ​​​នឹង​​​ធ្លាក់​​​ចុះ​​​ប្រហែល​​​៩,៣ភាគ​​​រយ​​​។

បន្ថែម​​​លើ​​​ទំនប់វារី​​​អគ្គិសនី​​​សេសាន​​​ក្រោម​​​២ ញត្តិ​​​ដែល​​​ប្រមូល​​​ព័ត៌មាន​​​ដោយ​​​​​​បណ្តាញ​​​ការពារ​​​ទន្លេសេសាន​​​ ស្រែពក សេគង្គ លើក​​​ឡើង​​​ពី​​​ទីតាំង​​​ទំនប​​់​​​វារីអគ្គិសនី​​​ដែល​​​ត្រូវ​​​បាន​​​ស្នើ​​​ឡើង​​​ចំនួន​​​ពីរ​​​នៅក្នុង​​​ខេត្ត​​​រតនគិរី​​​ ​​​គឺ​​​ទន្លេ​​​សេសាន​​​ក្រោម​​​៣​​​ ដែល​​​គំាទ្រ​​​ដោយ​​​ក្រុម​​​​​​ហ៊ុន​​​ Sinohydro Resources របស់​​​ចិន​​​ ហើយ​​​ទន្លេ​​​ស្រែ​​​ពក​​​បី ដែល​​​ក្រុម​​​ហ៊ុន​​​ Huadian Hong Kong Co. Ltd ​​​ទទួល​​​បានសាងសង់​​​ទំនប់​​​វារី​​​អគ្គិសនី។

ញត្តិ​​​នេះ​​​ស្នើ​​​ឲ្យ​​​លោក​​​ស្រី​​​ ពូ ចៀនគ័រ “ធានា​​​ថា ក្រុម​​​ហ៊ុន​​​ទាំង​​​នេះ​​​សិក្សា​​​ពី​​​ផល​​​ប៉ះ​​​ពាល់​​​ និង​​​ពិចារណា​​​ឡើង​​​វិញ​​​លើ​​​ការ​​​វិនិ​​​យោគ​​​របស់​​​ខ្លួន​​​លើ​​​គម្រោង​​​ផ្សេង​​​ៗទៀត​​​ដែល​​​អាច​​​​​​នឹង​​​បង្ក​​​ផល​​​ប៉ះ​​​ពាល់​​​” ជា​​​ពិសេស​​​ទំនប់​​​វារី​​​អគ្គិសនី​​​សេសាន​​​ក្រោម​​​៣ កម្លាំង​​​៣០០​​​មេហ្គាវ៉ាត់​​​ និង​​​ទំនប់​​​វារី​​​អគ្គិសនី​​​ស្រែ​​​ពក​​​ក្រោម​​​៣ ដែល​​​នឹង​​​ត្រូវ​​​សាង​​​សង់​​​នៅ​​​ក្នុង​​​តំបន់​​​​​​មួយ​​​ចំនួន​​​នៃ​​​ស្រុក​​​វើនសៃ ស្រុក​​​តាវែង និង​​​ស្រុក​​​លំផាត់ ខេត្ត​​​រតនគិរី។

លោក មៀច​​​ មាន​​​ អ្នក​​​សម្រប​​​សម្រួល​​​នៅ​​​​​​អង្គការ​​​បណ្តាញ​​​ការ​​​ពារ​​​ទន្លេសេសាន​​​ ស្រែក​​​ពក​​​ សេកុង​​​​​​តំណាង​​​ឲ្យ​​​ប្រជា​​​ពល​​​រដ្ឋ​​​ប្រមាណ​​​៧៥.០០០នាក់​​​ដែល​​​អាច​​​រង​​​ផល​​​ប៉ះពាល់​​​ផ្ទាល់​​​ដោយ​​​សារ​​​ទំនប់​​​ទាំង​​​នេះ​​​បាន​​​មាន​​​ប្រសាសន៍​​កាលពី​​​ម្សិលមិញ​​​ថា ក្រុម​​​ហ៊ុន​​​ចិន​​​ទាំង​​​នេះគួរ​​​តែ​​​ទទួល​​​ខុស​​​ត្រូវ​​​ផ្នែក​​​សង្គម​​​ និងដក​​​ខ្លួនចេញ​​​ពី​​​ការ​​​សាង​​​សង់​​​វារី​​​អគ្គិសនី​​​។

លោក​​​មាន​​​ប្រសាសន៍​​​ថា “ យើង​​​គិត​​​ថា នៅ​​​ពេល​​​ក្រុម​​​ហ៊ុន​​​ចិន​​​ទាំង​​​នេះ​​​គិត​​​ពិចារណាឡើង​​​វិញ​​​ រួច​​​ដក​​​ខ្លួន​​​ចេញ​​​ពី​​​ការ​​​សាង​​​សង់​​​ទំនប់​​​វារី​​​អគ្គិសនី​​​ទាំង​​​នេះ។ ​​​​ការ​​​សាង​​​សង់​​​ដោយ​​​ក្រុម​​​ហ៊ុន​​​ក្នុង​​​ស្រុក​​​នឹង​​​មិន​​​អាច​​​ចាប់​​​ផ្តើម​​​បាន​​​ឡើយ​​​​​​។ លោក​​​បាន​​​មាន​​​ប្រសាសន៍​​​​​​ទៀត​​​ថា តាម​​​សេចក្តី​​​រាយការណ៍​​​ថា ក្រុម​​​ហ៊ុន​​​ Sinohydro និង​​​ក្រុម​​​ហ៊ុន Huadian បាន​​​បញ្ចប់ការ​​​វាយ​​​តម្លៃ​​​ផល​​​ប៉ះ​​​ពាល់​​​ផ្នែក​​​បរិស្ថាន​​​ និង​​​សង្គម​​​រួច​​​ហើយ​​​ដើម្បី​​​សាង​​​សង់​​​ទំនប់​​​វារី​​​អគ្គិសនី​​​នៅ​​​ក្នុង​​​ខេត្ត​​​រតនគិរី។

ការឈូស​​​ឆាយដី​​​សម្រាប់​​​សាង​​​សង់​​​ទំនប់​​​វារី​​​អគ្គិសនី​​​សេសាន​​​ក្រោម​​​២ ដែល​​​ត្រូវ​​​បាន​​​ចាប់​​​ផ្តើម​​​កាលពី​​​ខែមីនា ដោយ​​​ក្រុមហ៊ុន​​​មួយ​​​របស់​​​លោក គិត​​​ ម៉េង ប្រធាន​​​ក្រុមហ៊ុន​​​រ៉ូយ៉ាល់​​​​​​គ្រុប​​​ ត្រូវ​​​បាន​​​រដ្ឋាភិបាល​​​ផ្អាក​​​កាលពីខែ​​​តុលា។ ពេល​​​ទាក់​​​ទង​​​បានកាលពីម្សិលមិញ លោក ពុធ ឃឿន តំណាង​​​ឲ្យ​​​ឃុំ​​​ស្រែគ ក្នុង​​​ស្រុក​​​សេសាន​​​ ខេត្ត​​​ស្ទឹង​​​ត្រែង​​​បានមាន​​​ប្រសាសន៍​​​ថា ការ​​​ផ្អាក​​​ឈូក​​​ឆាយ​​​ដី​​​នេះ​​​ ទំនង​​គ្រាន់​​​តែ​​​បណ្តោះ​​​អាសន្ន​​​ប៉ុណ្ណោះ​​​៕​​​សុខុម​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស