មន្ត្រីកម្ពុជាបាននិយាយថា អ្នកនេសាទកម្ពុជាមួយក្រុមបានឃាត់ខ្លួនអ្នកនេសាទជនជាតិវៀតណាម១០នាក់លើទូកពីរគ្រឿងនៅឆ្នេរ សមុទ្រខេត្តកំពត កាលពីព្រឹកម្សិលមិញ រួចប្រគល់ខ្លួនពួកគេឲ្យទៅនគរបាលព្រំដែន។
លោក នាគ សែន ប្រធានតំណាងសហគមន៍នេសាទត្រើយកោះមានប្រសាសន៍ថា អ្នកនេសាទជនជាតិវៀតណាមត្រូវបានឃាត់ខ្លួនពេលកំពុងនេសាទនៅចម្ងាយប្រហែលមួយគីឡូម៉ែត្រពីកោះដូង ដែលស្ថិតក្នុងដែនសមុទ្ររបស់កម្ពុជាជាប់ព្រំប្រទល់ប្រទេសវៀតណាម។
លោកថ្លែងថា កាលពីខែមុន អ្នកនេសាទវៀតណាមប្រាំបីនាក់ក៏ត្រូវបានឃាត់ខ្លួនដែរក្នុងប្រតិបត្តិការស្រដៀងគ្នានេះ។ លោកបានអះអាងថា “អ្នកនេសាទជនជាតិវៀតណាមទាំងនេះបាននេសាទដោយខុសច្បាប់នៅក្នុងដែនទឹកកម្ពុជាអស់រយៈពេល១០ថ្ងៃ ហើយពួកគេនេសាទត្រីបាន១០តោននៅក្នុងទូករបស់ពួកគេ”។
លោក ខូយ ឃុនហួ អភិបាលខេត្តកំពតបានមានប្រសាសន៍ថា លោកកំពុងតែស៊ើបអង្កេតសេចក្តីរាយការណ៍ថា អ្នកនេសាទជនជាតិវៀតណាមដែលនគរបាលមិនបានដោះលែងនៅឡើយនោះ បានបង់ប្រាក់ចំនួន៣.០០០ដុល្លារ ដើម្បីទទួលបានការអនុញ្ញាតឲ្យនេសាទនៅក្នុងដែនសមុទ្រកម្ពុជា។
លោកបានមានប្រសាសន៍បន្តទៀតថា “ទោះបីជាយើងឮថា អ្នកនេសាទជនជាតិវៀតណាមបានបង់ប្រាក់ចំនួន៣.០០០ដុល្លារឲ្យមន្ត្រីជលផលដើម្បីសុំការអនុញ្ញាតនេសាទដោយខុសច្បាប់នៅក្នុងសមុទ្រកម្ពុជាក៏ដោយ ប៉ុន្តែមិនទាន់មានការបញ្ជាក់ការអះអាងច្បាស់លាស់នៅឡើយទេ ចាំរហូតដល់យើងស៊ើបអង្កេតស្វែងរកការពិតឃើញសិន”៕សុខុម