28 C
Phnom Penh

លោក សម រង្ស៊ី លើក​​​ឡើង​​​ថា លោក ហ៊ុន សែន អន់​​​ជាង​​​ស្ត្រី​​​

ដោយ ឌឹ ខេមបូឌា ដេលី

បទវិភាគ

កាលពីម្សិលមិញ លោក សម រង្ស៊ី មេដឹក​​​នាំគណបក្ស​​​ប្រឆាំង​​​ និង​​​ស្ត្រី​​​ជា​​​សមាជិក​​​ជាន់​​​ខ្ពស់​​​គណបក្ស​​​សង្គ្រោះជាតិ បាន​​​ថ្លែ​​​ង​​​ការ​​​ពារ​​​អ្វី​​​ដែល​​​លោក​​​ សម រង្ស៊ី ​​​បាន​​​លើក​​​ឡើង​​​​​​អំឡុង​​​ការ​​​ប្រមូល​​​ផ្ដុំគ្នា​​​នៅ​​​ក្នុង​​​ខេត្ត​​​សៀម​​​រាប​​​ កាល​​​ពីថ្ងៃ​​​អង្គារ​​​ថា លោក ហ៊ុន សែន “អន់​​​ជាង​​​មនុស្ស​​​ស្រី”។

អំឡុង​ការ​ប្រមូល​​​ផ្ដុំគ្នា​​​​​​លើក​​​ដំបូង​​​​​​ក្រោយ​​​ការ​​​បោះ​​​ឆ្នោត​​​នៅ​​​ក្នុង​​​ខេត្ត​​​នេះ ​​​លោក សម រង្ស៊ី​​​ បាន​​​ចំអក​​​ឲ្យ​​​លោក​​​ ហ៊ុន សែន ដោយ​​​បាន​​​អំពាវ​​​នាវ​​​ឲ្យ​​​លោក​​​យក​​​គំរូ​​​តាម​​​នាយក​​​រដ្ឋមន្ត្រី​​​ យីងឡាក់​​​ ស៊ីណាវ៉ាត្រា ដែល​​​បាន​​​​​​​​​សម្រេច​​​​​​ឲ្យ​​​មាន​​​ការ​​​បោះ​​​ឆ្នោត​​​មុន​​​កាល​​​កំណត់​​​កាលពីពេល​​​ថ្មីនេះ។ លោក សម រង្ស៊ី បាន​​​ថ្លែង​​​ថា “ខ្ញុំ​សូម​អំ​ពា​វ​ ទៅ​​​លោក​នាយករដ្ឋ​មន្ត្រី ហ៊ុន សែន​។ ​លោក ហ៊ុន សែន អើយ ​កុំ​ឲ្យ​​​អន់​​​​ជាង​​​​មនុស្ស​ស្រី​។​​​ ហេតុ​​​អ្វី​​​បាន​​​ជា​​​លោក​​​ ហ៊ុន សែន អន់​​​ជាង​​​មនុស្ស​​​​​​​​​ស្រីអ៊ីចឹង​​​?” ។

ការ​​​និយាយ​​​ចំអក​​​នេះ​​​ត្រូវ​​​បាន​​​បន្ទរ​​​ដោយ​​​​​​​​​អ្នក​​​គាំទ្រ​​​​​​របស់​​​លោក​​​ជា​​​ច្រើន​​​ដែល​​​បាន​​​ដើរ​​​ក្បួន​​​កាត់​​​ក្រុង​​​សៀម​​​រាប​​​ ដោយបាន​​​​​​ស្រែក​​​ថា “ហ៊ុន សែន​​ អន់​​​ជាង​​​ស្រី!” ។ អ្នក​ស្រី មូរ សុខហួរ ប្រធាន​​​ផ្នែក​​​កិច្ច​​​ការ​​​សាធារណៈ​​​ និង​​​ជា​​​អតីត​​​រដ្ឋមន្ត្រី​​​ក្រសួង​​​កិច្ច​​​ការ​​​នារី​​​​​​មកពី​​​គណបក្ស​​​សង្គ្រោះ​​​ជាតិ បាន​​​​​​បដិ​​​សេធ​​​ថា សម្ដី​​​របស់​​​លោក​​​ សម រង្ស៊ី មិន​​​មែន​​​ជា​​​ការ​​​ប្រមាថ​​​ចំពោះ​​​ស្ត្រីភេទ​​​ទេ។ អ្នក​​​ស្រី​​​បាន​​​មាន​​​ប្រសាសន៍​​​ថា “លោក​​​ត្រូវ​​​​​​​​​​​បក​​​ស្រាយ​​​​​​ពី​​​អ្វី​​​ដែល​​​គាត់​​​និយាយ​​​ឲ្យ​​​ត្រូវ​​​បរិបទ​​​។ បរិ​បទ​​​​​ទាំង​​​មូល​​​គឺ​​​ថា នាយក​​​រដ្ឋ​​​មន្ត្រី​​​ យីង​​​ឡាក់ ស៊ីណាវ៉ាត្រា ទុក​​​ប្រយោជន៍​​ជាតិ​​​ជា​​​ធំ​​​ ហើយគាត់​​​​​​មាន​​​ឆន្ទៈ​​​ចុះ​​​ចេញពី​​​តំណែង​​​ដើម្បី​​​បញ្ចប់​​​ជម្លោះ​​​​​​នយោបាយ​​​”។

អ្នកស្រី  មូរ សុខហួរ បាន​​​អះអាង​​​ថា លោក​​​ សម រង្ស៊ី ចង់​​​បាន​​​ន័យ​​​ថា លោក ហ៊ុន សែន គួរ​​​តែ​​​យក​​​ភាព​​​រឹង​​​មាំរបស់​​​អ្នកស្រី យីងឡាក់ ​​​ជា​​​គំរូ។ អ្នកស្រី​បាន​មាន​​​ប្រសាសន៍​​​ថា “អ្វីដែល​​​លោក​​​ សម រង្ស៊ី ចង់​​​និយាយ​​​គឺ​​​ថា គាត់ ​​​[ អ្នក​​​ស្រី​​​ យីងឡាក់] គឺ​​​ជា​​​ស្ត្រី​​​។ ខ្ញុំ​​​តែង​​​តែ​​​និយាយ​​​ថា នៅ​​​ពេល​​​ដែល​​​ស្ត្រី​​​ធ្វើ​​​ជា​​​អ្នក​​​ដឹក​​​នាំ ​​​ពួកគេ​​​គិតអំពី​​​ផល​​​ប្រយោជ​​​ន៍​​​ជាតិ​​​។ ពេល​​​ស្ត្រី​​​ធ្វើ​​​ការ​​​សម្រេច​​​ចិត្ត​​​​​​ក៏ដូច​​​គ្នា​​​ដែរ​​​ គឺ​​​ពួកគេ​​​គិត​​​អំពី​​​ប្រយោជន៍រួម”។

អ្នកស្រី​​​បាន​​​គូស​​​បញ្ជាក់​​​ថា “ប្រសិន​​​បើ​​​គាត់​​​និយាយ​​​ថា ស្ត្រី​​​អន់​​​ជាង​​​បុរស​​​នោះ ខ្ញុំ​​​ប្រាកដ​​​ជា​​​មិន​​​អាច​​​ទទួល​​​យក​​​បានទេ​​​ ប៉ុន្តែ​​​​​​ខ្ញុំ​​​ធ្វើការ​​​ជាមួយ​​​គាត់​​​យូរ​​​ហើយ​​​ ខ្ញុំ​​​ដឹង​​​ថា គាត់​​គ្មាន​​​ថ្ងៃ​​​ប្រើ​​​ភាសា​​​បែប​​​ហ្នឹង​​​ទេ”។ អ្នកស្រី កែ សុវណ្ណរតន៍ សមាជិក​​​សភា​​​ជាប់​​​​​​ឆ្នោត​​​របស់​​​គណបក្ស​​​សង្គ្រោះ​​​ជាតិ និង​​​ជា​​​ប្រធាន​​​ក្រុម​​​ការ​​​ងារ​​​​​​បក្ស​​​ប្រចាំ​​​ខេត្ត​​​នេះ​​​ បាន​​​​​សម្ដែង​​​ការ​​​យល់​​​ស្រប​​​ថា ការ​​​លើក​​​ឡើង​​​របស់​​​លោក សម រង្ស៊ី គឺ​​​ធ្វើ​​​ឡើង​​​ក្នុង​​​បំណង​​​​​​អំពាវ​​​​​​នាវ​​​ឲ្យ​​​លោក ហ៊ុន សែន យក​​​គំរូ​​​តាម​​​អ្នកស្រី យីងឡាក់ ប៉ុណ្ណោះ​​​។ អ្នកស្រី​​​​​​មា​​​ន​​​ប្រសាសន៍​​​ថា “វា​​​មិន​​​មែន​​​ជា​​​ការ​​​ប្រមាថ​​​ទេ។ គាត់​​​ចង់​​​ប្រៀប​​​ធៀប​​​​​លោក​​​​​​​​​នាយក​​​រដ្ឋមន្ត្រី ហ៊ុន សែន ​​​​​​ជាមួយ​​​​​​នាយក​​​រដ្ឋ​​​មន្ត្រី​​​ យីង​​​ឡាក់ ស៊ីណាវ៉ាត្រា ​​​ពាក់​​​ព័ន្ធ​​​នឹង​​​ភាព​​​ក្លាហាន​​​”។

លោក សម​​​ រង្ស៊ី​​​ ក៏​​​បាន​​​លើក​​​ឡើង​​​ផង​​​ដែរ​​​​​​​​​ថា សម្ដី​​​របស់​​​លោក​​​​​​​​​ត្រូវ​​​​​​បាន​​​គេ​​​យក​​​ទៅ​​​បក​​​ស្រាយ​​​ខុស​​​បរិបទ​​​ និង​​​ថា លោក​​​មាន​​​​​​បំណង​​​បង្ហាញ​​​ក្ដី​​​គោរព​​​ចំពោះ​​​អ្នក​​​ស្រី យីងឡាក់ មិន​​​មែន​​​ចង់​​​បន្តុះ​​​បង្អាប់​​​ស្ត្រី​​​ភេទ​​​ទេ។ លោក​​​​​​មាន​​​ប្រសាសន៍​​​ថា “ការ​​​មាន​​​ស្ត្រី​​​ជា​​​នាយក​​​រដ្ឋ​​​មន្ត្រី គឺ​​​ជា​​​រឿង​​​កម្រ​​​ខ្លាំង​​​ណាស់​​​​​​នៅ​​​ក្នុង​​​លោក​​​នេះ។ អ្វីដែល​​​ខ្ញុំ​​​ចង់​​​និយាយ​​​គឺ​​​ថា យើង​​​គោរព​​​​​​អ្ន្​​ក​​​ស្រី យីងឡាក់ ស៊ីណាវ៉ា​​​ត្រា ​​​ដោយ​​​សារ​​​ភាព​​​ក្លា​​​ហាន និង​​​ភាព​​​ថ្លៃ​​​ថ្នូ​​​របស់​​​គាត់​​។ ទោះ​​​បីជាគាត់​​​គ្មាន​​​ហេតុ​​​ផល​​​ផ្លូវ​​​ច្បាប់​​​ក្នុង​​​ការ​​​ចុះ​​​ចេញ​​​ពីតំណែង​​​ ដោយ​​​សារ​​​គាត់​​​ជា​​​នាយក​​​​​​រដ្ឋ​​​មន្ត្រី​​​ស្រប​​​ច្បាប់ដែល​​​បាន​​​ជាប់​​​ឆ្នោត​​​​​​តាម​​​លក្ខណៈ​​​ប្រជា​​​ធិបតេយ្យ​​​ ហើយ​​​ការ​​​ប្រឆាំង​​​​​​​​​គាត់​​​មាន​​​តិច​​​ក៏ដោយ​​​ ក៏គាត់​​​នៅ​​​​​​​​​តែ​​​​​​ដក​​​ខ្លួន។ គាត់​​​គឺ​​​ជា​​​ស្ត្រី​​​ម្នាក់​​​ [ តែ​​​] លោក  ហ៊ុន សែន បែរ​​​​​​​​​​​​ជា​​​មិន​​​ក្លាហាន​​​​​​ដូច​​​គាត់”​​​៕ សេរីវុធ​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស