29 C
Phnom Penh

 ប្រទេស​កម្ពុជា​បាត់​បង់​ប្រាក់​១៣០​លាន​ដុល្លារ​ក្នុង​មួយ​ឆ្នាំ​ៗ​ដោយសារ​ពាណិជ្ជកម្ម​ខុស​ច្បាប់​

ដោយ ឌឹ ខេមបូឌា ដេលី

បទវិភាគ

​​​យោង​តាម​របាយការណ៍​ដែល​ក្រុម​ហ៊ុន​​ស្រាវជ្រាវ​ហិរញ្ញវត្ថុ​សហ​រដ្ឋ​អាមេរិក​មួយ​ បាន​ចេញ​ផ្សាយ​ក្នុង​ថ្ងៃ​នេះ​ បាន​បង្ហាញ​ថា ប្រទេស​កម្ពុជា​បាន​បាត់​បង់​​ប្រាក់​ជា​មធ្យម​១៣៣​លាន​ដុល្លារ​ក្នុង​មួយ​ឆ្នាំ​ ក្នុង​ចន្លោះ​ពី​ឆ្នាំ​២០០២​ដល់​ឆ្នាំ​២០១១​ ដោយ​សារ​តែ​មាន​​បទ​ល្មើស​ផ្សេង​ៗ​ ដូចជា សកម្មភាព​គេច​វេស​​មិន​បង់​ពន្ធ​​លើ​ទំនិញ​នាំចូល​ និង​នាំ​ចេញ​  ចល​នា​រូបិយ​វត្ថុ​​ខុស​ច្បាប់​ និង​សកម្ម​​ភាព​រត់​ពន្ធ​ទំនិញ​ផ្សេង​ៗ​។ 

របាយការណ៍​ដែល​មាន​ចំណង​ជើង​ថា “រំហូរ​ហិរញ្ញ​វត្ថុ​ខុស​ច្បាប់​ចេញ​ពី​ប្រទេស​កំពុង​អភិវឌ្ឍន៍​ពីឆ្នាំ​២០០២​ ដល់​ឆ្នាំ​២០១១​”  បោះ​ពុម្ព​ផ្សាយ​ដោយ​ក្រុមហ៊ុន​ ក្លូប៊ល​ ហ្វៃណាន់​សល អិន​ថិ​គ្រីត​ធី​ (Globol Financial Integrity) បាន​ប៉ាន់​ស្មាន​ថា រំហូរ​ចេញ​ខុស​ច្បាប់​នៃ​រូបិយ​វត្ថុ​ពី​ប្រទេស​ កំពុង​អភិវឌ្ឍន៍ ក្នុង​ឆ្នាំ​២០០១​​មាន​ចំនួន​សរុប​ប្រហែល​១០​ដង​នៃ​ចំនួន​ទឹក​ប្រាក់​ជំនួយ​ដែល​ត្រូវ​បាន​ចែក​ចាយ​ទូទាំង​សាកល​លោក​ក្នុង​ឆ្នាំ​ដដែល​នេះ​។

សេចក្តី​ប្រកាស​ព័ត៌មាន​អំពី​របាយការណ៍​នេះ​មាន​ខ្លឹម​សារ​ថា “ រំហូរ​​ចេញ​នៃ​ទឹក​ប្រាក់​ចំនួន​​៩៤៦,៧.០០០លាន​ដុល្លារ​តាម​ច្រក​ខុស​ច្បាប់​ក្នុង​ឆ្នាំ​២០១១​ គឺ​ជា​ចំនួន​ទឹក​ប្រាក់​បាត់​បង់​ដែល​កើន​ឡើង​១៣,៧​ភាគរយ​ បើ​ធៀប​នឹង​ឆ្នាំ​២០១០​ ដែល​ប្រទេស​កំពុង​អភិវឌ្ឍន៍​បាត់​បង់​អស់​៨៣២,៤.០០០លាន​ដុល្លារ​​ និ​ងជា​ចំនួន​ទឹក​ប្រាក់​បាត់​បង់​កាន់​តែ​ច្រើន​ បើ​ធៀប​នឹង​ឆ្នាំ​២០១២​ ដែល​​ចំនួន​ទឹក​ប្រាក់​​ហូរ​ចេញ​​ខុស​ច្បាប់​មាន​​សរុប​តែ​២៧០,៣.០០០លាន​​ដុល្លារ​​ប៉ុណ្ណោះ​”។

សេចក្តី​ប្រកាស​ព័ត៌មាន​អំពី​របាយការណ៍​​ដដែល​​មាន​ខ្លឹម​សារ​បន្ត​ទៀត​ថា “ លទ្ធផល​​ប៉ាន់​ស្មាន​នៅ​ក្នុង​របាយ​ការណ៍​សិក្សា​ស្រាវ​ជ្រាវ​នេះ​បាន​​បង្ហាញ​ថា ប្រទេស​កំពុង​អភិ​វឌ្ឍន៍​​បាត់​បង់​​ប្រាក់​សរុប​ចំនួន​៥,៩ពាន់​ពាន់​លាន​ដុល្លារ​​ក្នុង​រយៈ​ពេល​មួយ​ទសវត្សរ៍​ ពោល​ គឺ​គិត​ចាប់​តាំង​ពី​ឆ្នាំ​២០០២​ដល់​ឆ្នាំ​២០១១”។
លោក​ ប្រាយ​អិន ឡឺប្ល៊ង់(Brian LeBlanc) សហ​អ្នក​និពន្ធ​របាយការណ៍​នេះ​ត្រូវ​បាន​ដក​ស្រង់​សម្តី​ថា “ប្រទេសក្រីក្រ​បាន​បាត់​បង់​ប្រាក់​ជិត​១.០០០ពាន់​លាន​ដុល្លារ​ពីសេដ្ឋ​កិច្ច​របស់​ពួក​គេ​ក្នុង​ឆ្នាំ​២០១១​ ដែលគួរ​តែ​​អាច​ត្រូវ​បាន​​​វិនិយោគ​ទៅ​លើ​​អាជីវកម្ម​ក្នុង​ស្រុក​​​សេវាថែ​ទាំ​សុខ​ភាព​ អប់រំ​ ឬក៏​ហេដ្ឋារចនា​សម្ព័ន្ធ​ នេះ​គឺជា​ទឹក​ប្រាក់​១.០០០ពាន់​លាន​ដុល្លារ​ ដែល​គួរ​តែអាច​ត្រូវ​បាន​ប្រើ​ប្រាស់​ដើម្បី​ជួយ​ប្រជាជន​ឲ្យ​ងើប​ផុត​ពីភាព​ក្រី​ក្រ​ និង​ជួយ​សង្គ្រោះជីវិត​របស់​ពួកគាត់​”។

របាយការណ៍​ដដែល​ក៏​បាន​បង្ហាញ​ពី​ទិន្ន​ន័យ​ថ្មី​បំផុត​ ទាក់​ទង​ទៅ​នឹង​រំហូរ​ចេញ​ខុស​ច្បាប់​ នៃ​សាច់​ប្រាក់​​ ពីប្រទេស​កំពុង​អភិ​វឌ្ឍន៍​។ អង្គការ​តម្លា​ភាព​អន្តរ​ជាតិ​​ កាល​ពី​សប្តាហ៍​​ មុន​បាន​ចេញ​សន្ទ​ស្សន៍​​យល់​ដឹង​អំពី​អំពើ​ពុក​រលួយ​​ប្រចាំឆ្នាំ​របស់​ខ្លួន​។ សន្ទស្សន៍​នេះ​បាន​បង្ហាញថា ប្រទេស​កម្ពុជា​ឈរ​នៅ​ចំណាត់​ថ្នាក់​លេខ​១៧​ដែល​មាន​អំពើ​ពុក​រលួយ​ច្រើន​បំផុត​នៅ​លើ​ពិភព​លោក​។

លោក ព្រាប កុល​ នាយក​ប្រតិបត្តិ​អង្គការ​ តម្លាភាព​អន្តរ​ជាតិ​កម្ពុជា​បាន​លើក​ឡើង​ថា ខណៈ​ដែ​ល​អង្គការ​របស់​លោក​​​មិន​បាន​សើុប​ អង្កេត​ក្នុង​កម្រិត​ដិត​ដល់​បំផុត​​ទៅ​លើ​អំពើ​ពុក​រលួយ​នៅ​តា​ម​តំបន់​ព្រំដែន​នៃ​ប្រទេស​កម្ពុជា​នោះ ការ​បាត់​បង់​ប្រាក់​ដ៏​ច្រើន​ដោយ​សារ​ពាណិជ្ជកម្ម​ខុស​ច្បាប់​មិន​មែន​ជា​រឿង​គួរ​ឲ្យភ្ញាក់​ផ្អើ​ល​ទេ​ ដោយ​សារ​តែ​មាន​ភាព​ធូរ​រលុង​ក្នុង​ផ្នែក​អភិបាល​កិច្ច​ពាណិជ្ជកម្ម។

លោក ព្រាប​ កុល​ បាន​មាន​ប្រសាសន៍​ថា “ប្រទេស​កម្ពុជា​មិន​សុំាទៅនឹង​ពាណិជ្ជកម្ម​ខុស​ច្បាប់​ទេ​ ហើយ​នៅ​ក្នុងតុំបន់​អាស៊ី​អាគ្នេយ៍​ ប្រជាជន​អាច​ទាញ​យ៉ាង​ងាយ​ថា ប្រទេស​កម្ពុជា​​មាន​សកម្មភាព​បែប​នេះ​​ ដោ​យសារ​តែ​នីតិ​រដ្ឋ​របស់​ខ្លួន​មាន​ភាព​ទន់​ខ្សោយ​ និង​ខ្វះ​ការ​ត្រួត​ពិនិត្យ​សកម្មភាព​ខុសច្បាប់​បែ​ប​នេះ​”៕ សុធា​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស