បុរសអាយុ៤៣ឆ្នាំម្នាក់ត្រូវបានចាប់ខ្លួនកាលពីថ្ងៃពុធ ពីបទរំលោភក្មេងស្រីអាយុ៨ឆ្នាំម្នាក់នៅក្នុងខេត្តព្រះសីហនុ ខណៈបុរសអាយុ២២ឆ្នាំម្នាក់ត្រូវបានចាប់ខ្លួននៅក្នុងខេត្តកណ្តាលនៅថ្ងៃតែមួយពីបទរំលោភក្មេងស្រីអាយុ៧ឆ្នាំម្នាក់។
លោក នៅ សាវុធ ប្រធានការិយាល៍យព្រហ្មទណ្ឌកម្រិតធ្ងន់ក្នុងខេត្តព្រះសីហនុបានឲ្យដឹងថា ឈ្មោះ ងួន ពៅ ត្រូវបានចាប់ខ្លួនកាលពីថ្ងៃពុធ នៅផ្ទះរបស់ខ្លួនក្នុងសង្កាត់៣ បន្ទាប់ពីមានពាក្យបណ្តឹងមួយធ្វើឡើងជួសមុខឲ្យក្រុមគ្រួសារជនរងគ្រោះវ័យក្មេងរូបនេះដោយអង្គការក្រៅរដ្ឋាភិបាលការពារកុមារមួយ។
លោកបានមានប្រសាសន៍ថា “យើងបានចាប់ខ្លួនជនសង្ស័យ បន្ទាប់ពីទទួលបានពាក្យបណ្តឹងមួយ ពីក្រុមគ្រួសារជនរងគ្រោះ ដែលរៀបចំដោយអង្គការម្លប់តាប៉ាង”។ លោក សាវុធ បានឲ្យដឹងថា ម្តាយរបស់ជនរងគ្រោះ គឺជាកម្មករកាត់ដេរម្នាក់ដែលពេលខ្លះចំណាយពេលមួយសប្តាហ៍ ឬពីរសប្តាហ៍ចេញទៅឆ្ងាយពីផ្ទះ ហើយបានទុកកូនស្រីរបស់ខ្លួននៅជាមួយជនសង្ស័យដែលជាមិត្តភក្តិគ្រួសាររបស់ជនរងគ្រោះ ជាមួយប្រពន្ធជនសង្ស័យ និងកូនៗរបស់ពួកគេ។
លោកបានមានប្រសាសន៍ថា “កាលពីយប់ថ្ងៃច័ន្ទ វេលាម៉ោងប្រហែល១០យប់ ជនរងគ្រោះដ៏តូចនេះកំពុងដេកតែម្នាក់ឯងនៅពេលនោះជនសង្ស័យបានចាប់រំលោភនាង ហើយគំរាមសម្លាប់ជនរងគ្រោះ បើសិនជាជនរងគ្រោះប្រាប់ម្តាយរបស់ខ្លួន ឬក៏អ្នកឯទៀត”។ កាលពីថ្ងៃពុធ ម្តាយមីងរបស់ក្មេងស្រីរងគ្រោះរូបនេះបាននាំជនរងគ្រោះទៅមន្ទីរ ពេទ្យខេត្ត បន្ទាប់ពីក្មេងស្រីរងគ្រោះលែងសូវមាត់ក។ នៅពេលនោះ ក្មេងស្រីរងគ្រោះបានប្រាប់ម្តាយមីងរបស់ខ្លួននូវអ្វីដែលបានកើតឡើង ខណៈដែលពួកគេកំពុងធ្វើដំណើរ តាមផ្លូវទៅកាន់មន្ទីរពេទ្យ ហើយលទ្ធផលនៃការពិនិត្យបានបញ្ជាក់ថា នាងត្រូវបានគេចាប់រំលោភ។
ដំបូងឡើយ ជនសង្ស័យឈ្មោះ ងួន ពៅ បានបដិសេធថា ខ្លួនមិនបានចាប់រំលោភក្មេងស្រីរងគ្រោះទេ ក៏ប៉ុន្តែ ពេលនេះជននេះស្ថិតនៅក្នុងពន្ធនាគារខេត្ត កំពុងរងចាំការវិនិច្ឆ័យទោស បន្ទាប់ពីត្រូវបានសាលាដំបូងខេត្តចោទប្រកាន់ ពីបទល្មើសនេះ កាលពីម្សិលមិញ។ ដោយឡែក នៅក្នុងស្រុកមុខកំពូល ខេត្តកណ្តាលឯណោះវិញ លោក នៅ សារាវុធ អធិការរងនគរបាលស្រុក បានឲ្យដឹងថា ឈ្មោះ ម៉ៅ ពៅ អាយុ២២ឆ្នាំជាកម្មករឡឥដ្ឋ ក៏ត្រូវបានចាប់ខ្លួនកាលពីថ្ងៃពុធផងដែរ ជាថ្ងៃដែលជននេះត្រូវបានចោទប្រកាន់ថា បានចាប់រំលោភក្មេងស្រីអាយុ៧ឆ្នាំម្នាក់ នៅក្នុងឃុំព្រែកអញ្ចាញ។
លោក សារាវុធ បានមានប្រសាសន៍ថា បន្តទៀតថា “យើងបានចាប់ខ្លួនជនសង្ស័យ បន្ទាប់ពីគ្រួសាររបស់ជនរងគ្រោះបានដាក់ពាក្យបណ្តឹងទៅស្នាក់ការនគរបាលឃុំព្រែកអញ្ចាញ”។ ឪពុកម្តាយរបស់កុមាររងគ្រោះបានប្រាប់នគរបាលថា កូនស្រីរបស់ពួកគាត់បានចេញទៅលេងនៅឯបឹងមួយនៅក្បែរជាមួយមិត្តភក្តិប្រាំនាក់។ ក្នុងពេលដែលក្មេងៗកំពុងតែហែលទឹកលេង ជនសង្ស័យបានចាប់ក្មេងស្រី រូបនេះ ហើយក៏បានរំលោភនាង។
ក្មេងស្រីរងគ្រោះកំពុងធូរស្រាលឡើងវិញហើយ នៅក្នុងមន្ទីរពេទ្យ ខណៈដែលជនល្មើសដែលត្រូវបានចោទប្រកាន់កំពុងត្រូវបានឃុំខ្លួននៅស្នងការដ្ឋាននគរបាលខេត្ត មុនឡើងតុលាការនៅថ្ងៃនេះ ដើម្បីធ្វើការចោទប្រកាន់ជាផ្លូវការ៕ ប៊ុននី