លោក ជា សុខហ៊ាង ប្រធានក្រុមប្រឹក្សាជំនុំជម្រះបានឲ្យដឹងថា កាលពីម្សិលមិញ សាលាដំបូងរាជធានីភ្នំពេញបានតម្កល់សាលក្រមដែលតុលាការនេះបានចេញកាលពីក្នុងខែកុម្ភៈ ដោយផ្តន្ទាទោសជនជាតិបារាំងម្នាក់ ឈ្មោះ ម៉ាកស៊ែល ម៉ូរីន (Marcel Morin) អាយុ៥៨ឆ្នាំឲ្យជាប់ពន្ធនាគាររយៈពេល១៨ខែ ពីបទសញ្ចរកម្ម។ លោកបានបន្ថែមថា លោក ម៉ូរីន ក៏ត្រូវបានបង្គាប់ឲ្យបង់ប្រាក់សរុប៤.៥០០ដុល្លារដល់ជនរងគ្រោះបីនាក់ផងដែរ។
លោក ម៉ូរីន បានដាក់ពាក្យបណ្តឹងទៅតុលាការនេះដោយជំទាស់នឹងការដាក់់ទោសគាត់ពីដំបូង ពីព្រោះគាត់មិនបានមានវត្តមាននៅពេលបើកសវនាការជំនុំជម្រះនោះទេ ពីព្រោះបច្ចុប្បន្ននេះគាត់កំពុងតែទទួលទោសនៅក្នុងខេត្តសៀមរាប ពីបទសញ្ចរកម្មនៅទីនោះ។
លោក សុខហ៊ាង បានលើកឡើងថា យោងតាមសវនាការជំនុំជម្រះកាលពីថ្ងៃទី២ ខែធ្នូឲ្យដឹងថា ជនរងគ្រោះបានប្រាប់តុលាការថា លោក ម៉ូរីន បានឲ្យប្រាក់ពួកគេដើម្បីរួមភេទជាមួយនឹងគាត់នៅឯភោជនីយដ្ឋានមួយក្នុងខណ្ឌទួលគោកក្នុងឆ្នាំ២០០៧។
លោក ឌុន វិបុល មេធាវីការពារក្តីរបស់លោក ម៉ូរីន បានឲ្យដឹងថា តុលាការមិនបានធ្វើការសើបអង្កេតរឿងក្តីនេះឲ្យបានត្រឹមត្រូវឡើយ។ លោក ឌុន វិបុល ឲ្យដឹងបន្ថែមទៀតថា “តុលាការបានផ្តន្ទាទោសកូនក្តីរបស់ខ្ញុំដោយគ្មានភ័ស្តុតាង”៕ ប៊ុននី