យោងតាមប្រព័ន្ធផ្សព្វផ្សាយក្នុងស្រុកមួយ បានឲ្យដឹងថា លោក ហេង សំរិន ប្រធានរដ្ឋសភា នឹងផ្ញើលិខិតផ្លូវការមួយច្បាប់ជូនចំពោះគណៈកម្មាធិការជាតិរៀបចំការបោះឆ្នោត (គ.ជ.ប.) ក្នុងរយៈពេលប៉ុន្មានថ្ងៃខាងមុខនេះ ដើម្បីជូនដំណឹងដល់គណៈកម្មាធិការនេះអំពីការធ្វើពហិការសភារបស់គណបក្សប្រឆាំង។
នេះអាចជាដំណាក់កាលដំបូងនៅក្នុងផែនការរបស់គណបក្សគ្រប់គ្រងអំណាច ដើម្បីឲ្យមានការបែងចែកអាសនៈសភារបស់គណបក្សប្រឆាំង។ លោកនាយករដ្ឋមន្ត្រី ហ៊ុន សែន បានព្រមានពីដំបូងកាលពីដើមខែសីហាថា គណបក្សសង្គ្រោះជាតិអាចបាត់បង់អាសនៈទាំង៥៥របស់ខ្លួននៅក្នុងសភា ប្រសិនពួកគេនៅតែបន្តធ្វើពហិការ ដើម្បីតវ៉ាភាពមិនប្រក្រតីកើនឡើងនៅក្នុងការបោះឆ្នោតជ្រើសតាំងតំណាងរាស្ត្រ កាលពីខែកក្កដា។
បន្ទាប់ពីមានការគំរាមពីលោក ហ៊ុន សែន លោក ជាម យៀប អ្នកនាំពាក្យគណបក្សប្រជា ជនកម្ពុជា ត្រូវបានប្រព័ន្ធផ្សព្វផ្សាយក្នុងស្រុករាយការណ៍ថា គណបក្សប្រឆាំងមានពេលបីខែសម្រាប់ទទួលយកអាសនៈរបស់ខ្លួននៅ ក្នុងសភាជាតិ បើមិនដូច្នេះទេនឹងបាត់បង់អាសនៈទាំងនោះ។
លោក ជាម យៀប បានបន្តថា រយៈពេលបីខែត្រូវបានរាប់ចាប់ពីថ្ងៃដែលព្រះមហាក្សត្រ នរោត្តម សីហមុនី បានយាងជាព្រះរាជធអធិបតីបើកសម័យប្រជុំសភាលើកដំបូងកាលពីថ្ងៃទី២៣ ខែកញ្ញាដែលមានតែសមាជិកសភាគណបក្សប្រជាជនកម្ពុជាតែ៦៨រូបប៉ុណ្ណោះចូលរួម។ កាលបរិច្ឆេទផុតកំណត់គឺនៅថ្ងៃទី២៣ខែធ្នូខាងមុខនេះ។
យោងតាមសេចក្តីរាយការណ៍របស់ប្រព័ន្ធផ្សព្វផ្សាយក្នុងស្រុកមួយចេញផ្សាយនៅចុងសប្តាហ៍នេះ បានឲ្យដឹងថា លោក ជាម យៀប បានឲ្យដឹងថា ក្នុងរយៈពេល១០ ថ្ងៃខាងមុខលោក ហេង សំរិន ប្រធានរដ្ឋសភា មានពេលនឹងសរសេរលិខិតផ្ញើជូន គ.ជ.ប. ព្រះមហាក្សត្រ សីហមុនី និងក្រុម ប្រឹក្សាធម្មនុញ្ញនៃកម្ពុជា ដើម្បីជូនដំណឹងអំពីការធ្វើពហិការដែលកំពុងបន្តរបស់គណបក្សប្រឆាំង។
ទាំងលោក ជាម យៀប ទាំងលោក ហេង សំរិន ឬមន្ត្រីរបស់លោក សុទ្ធតែមិនអាចទាក់ទងបានដើម្បីធ្វើសេចក្តីអត្ថាធិប្បាយបានទេកាលពីម្សិលមិញ។
លោកឈាង វុន សមាជិកសភាមកពីគណបក្សប្រជាជនកម្ពុជា និងជាអ្នកនាំពាក្យរដ្ឋសភា បានលើកឡើងថា លោកមិនដឹងថា គណបក្សរបស់លោកមានផែនការផ្ញើលិខិតមួយច្បាប់បែបនេះទេ។ លោកក៏បានអះអាងដែរថា គណបក្សប្រជាជនកម្ពុជា គ្មានបំណងយកអាសនៈសភាចំនួន៥៥របស់គណបក្សប្រឆាំងទេ។ លោកបានថ្លែងថា “គណបក្សប្រជាជនមិនដែលគិតអំពីការយកអាសនៈពីគណបក្សសង្គ្រោះជាតិ ដើម្បីចាត់ចែងក្នុងចំណោមមន្ត្រីគណបក្សប្រជាជនទេ” ។
ទោះជាយ៉ាងណាលោក ហ៊ុន សែន បានលើកឡើងអំពីសេណារិយោបែបនេះនៅក្នុងសុន្ទរកថាដែលលោកបានថ្លែងនិងត្រូវបានផ្សព្វផ្សាយតាមកញ្ចក់ទូរទស្សន៍កាលពីថ្ងៃទី២ ខែសីហា ពីខេត្តកណ្តាល បន្ទាប់ពីគណបក្សលោកទទួលបានលទ្ធផលបោះឆ្នោតអាក្រក់បំផុត ក្នុងរយៈពេល១៥ឆ្នាំមកនេះ។
លោក ហ៊ុន សែន បានលើកឡើងនៅក្នុងសុន្ទរកថាផ្សាយតាមទូរទស្សន៍អស់រយៈពេលជាច្រើនម៉ោងថា “នៅពេលណាដែលគណបក្សមួយបោះបង់អាសនៈ ឬក៏ពួកគេបានបដិសេធ [មិនទទួល] យកអាសនៈទាំងនោះ ខណៈកម្មាធិការជាតិរៀបចំការបោះឆ្នោត នឹងយកអាសនៈទាំងនោះទៅបែងចែកឲ្យគណបក្សផ្សេងៗទៀត ដែលមានអាសនៈនៅក្នុងរដ្ឋសភា ដូច្នេះអាសនៈទាំងអស់នោះនឹងត្រូវបានបែងចែកឲ្យគណបក្សប្រជាជន”។
ច្បាប់ស្តីពីការបោះឆ្នោតរដ្ឋសភាចែងថាគ.ជ.ប.អាចប្រគល់អាសនៈរបស់គណបក្សមួយ ប្រសិនបើគណបក្សនោះ “ប្រកាសបោះបង់” អាសនៈរបស់ខ្លួននៅក្នុងរដ្ឋសភា។ គណបក្សសង្គ្រោះជាតិអះអាងថា ខ្លួនមិនបានបោះបង់អាសនៈរបស់ខ្លួននៅក្នុងរដ្ឋសភាទេ និងមិនមានផែនការធ្វើបែបនេះទេ។ អ្នកជំនាញការផ្នែកបោះឆ្នោត និងមេធាវីនានាក៏បានយល់ស្របជាមួយគណបក្សប្រឆាំងថា ការធ្វើពហិការសភារបស់ខ្លួនមិនមែនជាការបោះបង់អាសនៈរបស់ខ្លួននៅក្នុងរដ្ឋសភាទេ។
លោក ទេព នីថា អគ្គលេខាធិការ គ.ជ.ប. បានឲ្យដឹងកាលពីម្សិលមិញថា គ.ជ.ប. នឹងពិនិត្យលិខិតរបស់គណបក្សប្រជាជន នៅពេលដែលខ្លួនទទួលបានលិខិតនោះពីលោក ហេង សំរិន។ លោកបានថ្លែងថា “បើលិខិត [ ពីសភា] ត្រូវបានផ្ញើមក គ.ជ.ប. គណៈកម្មាធិការនេះនឹងពិនិត្យលិខិតនោះ ហើយនឹងចេញសេចក្តីសម្រេច” ក៏ប៉ុន្តែ លោកបានបដិសេធមិនធ្វើអត្ថាធិប្បាយលម្អិត៕ប៊ុននី