កាលពីថ្ងៃសៅរ៍ សាលាដំបូងរាជធានីភ្នំពេញ បានចោទប្រកាន់ ដានីញែល ចនសុន ជាអ្នកផ្សព្វផ្សាយសាសនាជនជាតិអាមេរិកពីបទរំលោភបំពានផ្លូវភេទក្មេងប្រុសប្រាំនាក់អាយុក្រោម១៥ឆ្នាំនៅមណ្ឌលកុមារកំព្រាមួយដែលលោកបានកាន់កាប់នៅក្នុងខណ្ឌមានជ័យ រាជធានីភ្នំពេញ។
លោក ស៊ាង សុខ អគ្គព្រះរាជអាជ្ញារងបានមានប្រសាសន៍កាលពីម្សិលមិញថា ចនសុន អាយុ៣៥ឆ្នាំត្រូវបានបញ្ជូនទៅតុលាការកាលពីថ្ងៃពុធ ប៉ុន្តែព្រះរាជអាជ្ញាបានពន្យារពេលការចោទប្រកាន់ជននេះ ហើយបានសាកសួរបុរសរូបនេះរយៈពេលជាច្រើនថ្ងៃមុនពេលធ្វើការចោទប្រកាន់កាលពីថ្ងៃសៅរ៍។ លោកបានមានប្រសាសន៍ថា ខ្ញុំបានចោទប្រកាន់គាត់ [កាលពីថ្ងៃសៅរ៍] តាមមាត្រា៤៣នៃច្បាប់ប្រឆាំងការជួញដូរមនុស្សពីបទរំលោភបំពានជនរងគ្រោះជាអនីតិជន ហើយបន្ទាប់មកបានប្រគល់ទៅឲ្យចៅក្រមស៊ើបសួរ។
លោក ប៉ុល ពិធេយ្យ ប្រធាននាយកដ្ឋានប្រឆាំងការជួញដូរមនុស្សក្រសួងមហាផ្ទៃបានបញ្ជាក់ពីការចោទប្រកាន់នេះ ហើយបានមានប្រសាសន៍ថា ឥឡូវនេះ ចនសុន ស្ថិតក្នុងការឃុំខ្លួនបណ្ដោះអាសន្ន។ លោកបានមានប្រសាសន៍ថា “យើងបានបញ្ជូនគាត់ទៅពន្ធនាគារព្រៃសហើយ [កាលពីល្ងាចថ្ងៃសៅរ៍] បន្ទាប់ពីបុរសរូបនេះត្រូវសាលាដំបូងរាជធានីភ្នំពេញធ្វើការចោទប្រកាន់រួចមក”។
ការស៊ើបអង្កេតដែលដឹកនាំដោយ FBI ពាក់ព័ន្ធការរំលោភបំពានផ្លូវភេទកុមារ ដែលបានប្រព្រឹត្តក្នុងសហរដ្ឋអាមេរិក បានរកឃើញ ចនសុន នៅមណ្ឌលកុមារកំព្រា Home of Hope នៅក្នុងសង្កាត់បឹងទំពុន ដែលជាគម្រោងមួយក្នុងចំណោមគម្រោងមួយចំនួននៅក្នុងប្រទេសកម្ពុជា ដែលគ្រប់គ្រងដោយអង្គការគ្រីស្ទាន Hope Transitions ។
ចនសុន ត្រូវគេរកឃើញថា កំពុងស្នាក់នៅមណ្ឌលកុមារកំព្រាដែលមិនបានចុះបញ្ជីត្រឹមត្រូវ ហើយការសម្ភាសជាមួយកុមារនិងក្មេងជំទង់២៩នាក់ ដែលរស់នៅជាមួយគាត់នៅទីនោះ បន្ទាប់ពីការចាប់ខ្លួនគាត់ បានឈានទៅដល់ការចោទប្រកាន់ថា គាត់បានប្រព្រឹត្តការរំលោភបំពានបែបនេះមែន។
គេនិយាយថា រឿងក្តីគាត់មានភាពស្មុគស្មាញ ពីព្រោះការចោទប្រកាន់នេះមួយផ្នែកចេញមកពីការស៊ើបអង្កេតរបស់ FBI ដែលកំពុងទាមទារឲ្យធ្វើបត្យាប័នបុរសរូបនេះពីបទឧក្រិដ្ឋដែលបានប្រព្រឹត្តនៅសហរដ្ឋអាមេរិក ប៉ុន្តែនគរបាលបានលើកឡើងកាលពីសប្ដាហ៍មុនថា ចនសុន ត្រូវតែអនុវត្តទោសរបស់ខ្លួននៅក្នុងប្រទេសកម្ពុជាជាមុនសិន ប្រសិនបើគាត់ត្រូវបានកាត់ឲ្យជាប់ទោសនោះ។
ចនសុន បានរស់នៅក្នុងប្រទេសកម្ពុជារយៈពេលមួយទសវត្សរ៍មកហើយ ដែលគាត់ជាប្រធានមណ្ឌលកុមារកំព្រា New Hope of Orphans ជាអង្គការក្រៅរដ្ឋាភិបាលគ្រីស្ទាន ដែលបានចុះបញ្ជីជាមួយរដ្ឋាភិបាល ហើយ ចនសុន បានបម្រើការជាទីប្រឹក្សារយៈពេលជាច្រើនឆ្នាំមកហើយនៅមណ្ឌលនេះ។
លោក យី ម៉ូដែន អនុប្រធានចុះប្រតិបតិ្តការផ្ទាល់នៃអង្គការសកម្មភាពដើម្បីកុមារ ជាអង្គការក្រៅរដ្ឋាភិបាលប្រឆាំងជនរួមភេទជាមួយកុមារ ដែលបានជួយក្នុងការស៊ើបអង្កេតនេះ បានមានប្រសាសន៍ថា អង្គការ Hope Transitions ដែល ចនសុន ធ្វើការក៏មានគម្រោងជាច្រើនក្នុងខេត្តព្រៃវែង និងខេត្តកំពតផងដែរ ហើយដំណាក់កាលបន្ទាប់នៃការស៊ើបអង្កេត គឺត្រូវតាមដានរកបណ្ដាញរបស់ ចនសុន នៅក្នុងប្រទេសកម្ពុជា។ ឥឡូវនេះជនរងគ្រោះដោយសារ ចនសុន ស្ថិតក្រោមការការពាររបស់អង្គការ Hagar International ៕សារុន