ដោយចាប់ផ្តើមពីខែធ្នូទៅ ឡូនេសាទនៅកណ្តាលបឹងទន្លេសាបបានក្លាយជាទីប្រជុំជនម្តងទៀតសម្រាប់អ្នកភូមិនិងអ្នកនេសាទកម្ពុជា ដែលភាគច្រើនក្នុងចំណោមពួកគេព្យាករថា នេះជាឆ្នាំត្រូវប៉ាន់សម្រាប់ត្រីប្រហុក ដោយសារទឹកធំ និងទិន្នផលដ៏ច្រើននៃត្រីរៀលធំៗ ដែលគេយកទៅធ្វើប្រហុកនោះ។
អ្នកស្រីយូ ស្រីម៉ៅ មកពីសង្កាត់សំរោងក្នុងទីក្រុងភ្នំពេញ គឺជាម្ចាស់ផែបណ្តែតទឹកចំនួនប្រាំមួយ។ អ្នកស្រីព្យាករថា រដូវធ្វើប្រហុកឆ្នាំនេះនឹងត្រូវប៉ាន់ជាងឆ្នាំមុន ដែលកាលនោះមិនសូវមានផលត្រីរៀលច្រើនទេ ដោយសារទឹកតូច។ អ្នកស្រីយូ ស្រីម៉ៅ បាននិយាយថា “កាលពីឆ្នាំមុន ខ្ញុំមិនចំណេញទេ។ ខ្ញុំរកបានពី៥០ ទៅ៦០លានរៀល បើប្រៀបធៀបនឹងឆ្នាំ២០១១វិញ ខ្ញុំរកបានជិត២០០លានរៀលឯណោះ។ ប៉ុន្តែឆ្នាំនេះ ទឹកធំ ដែលមានន័យថា មានត្រីច្រើន”។
ពេលវេលាបានខិតចូលថ្ងៃត្រង់ទៅហើយ ប៉ុន្តែកម្មករ១៦នាក់ក្នុងចំណោមកម្មករ១៨នាក់នៅឡូនេសាទរបស់អ្នកស្រីមិនឈប់ធ្វើការទេ ហើយក៏គ្មានអ្នកណាប្រាប់ឲ្យសម្រាកហូបបាយថ្ងៃត្រង់ដែរ។ អ្នកស្រីបាននិយាយលេងសើចថា “មានពេល១២ម៉ោងធ្វើការ និង១២ម៉ោងដេក”។
អ្នកស្រីបានពន្យល់ថា កម្មករមិនឈប់ធ្វើការទេ ប៉ុន្តែប្តូរវេនគ្នាហូបបាយថ្ងៃត្រង់។ ឥឡូវ អ្នកនេសាទពីរនាក់ក្នុងចំណោម១៨នាក់កំពុងដេកក្នុងអង្រឹងនៅក្បែរផែ។ អ្នកនេសាទចំណាស់ជាងគេក្នុងចំណោមអ្នកនេសាទកំពុងធ្វើការ អុជបារីជក់ និងសម្លឹងមើលមង ដែលគេកំពុងតែទាញឡើង។
ខ្សែរ៉តប្រើម៉ូទ័រទាញមង ដែលពោរពេញទៅដោយត្រី និងមានជាប់ស្លឹកឈើ និងសំរាមឡើងលើផែ។ កម្មករទាំងនេះប្រមូលត្រីពណ៌សដូចប្រាក់ ហើយចាប់ផ្តើមប្រមូលស្លឹកឈើ និងសំរាមចេញពីត្រី។ ស្ត្រីម្ចាស់ផែ ដែលទើបតែចម្អិនអាហារថ្ងៃត្រង់រួច បានចូលមករើសយកត្រីធំៗពីគំនរត្រីរៀលដ៏ច្រើនសម្បើម។
មនុស្ស២០នាក់នៅក្នុងផែនោះ បំពេញការងារយ៉ាងស្ទាត់ជំនាញ បើទោះបីជាពួកគេទើបតែចាប់ផ្តើមប្រមូលផលត្រីប្រចាំឆ្នាំមុននេះមួយថ្ងៃក៏ដោយ។
អ្នកស្រីយូ ស្រីម៉ៅ បាននិយាយថា “យើងប្រមូលបានត្រីរៀលធំៗចំនួនជាង១,៥តោននៅថ្ងៃទី១ ហើយនេះទើបតែចូលដល់រដូវកាលធ្វើប្រហុកតែប៉ុណ្ណោះ”។
នៅខេត្តកណ្តាលក៏ដូចជានៅភ្នំពេញដែរ អ្នកភូមិមកពីប្រាំមួយស្រុកបានចាប់ផ្តើមប្រមូលត្រីប្រហុកកាលពីថ្ងៃច័ន្ទកន្លងមក។ លោកឃ្លាំង វណ្ណថុល នាយខណ្ឌរដ្ឋបាលជលផលខេត្តកណ្តាល បានឲ្យដឹងថា អ្នកនេសាទមួយចំនួនរកបានត្រីពី២០០ ទៅ៣០០គីឡូក្រាមក្នុងរយៈពេលតែ២០នាទីប៉ុណ្ណោះ។ នៅក្នុងខេត្តកំពង់ឆ្នាំងឯណោះវិញ ប្រជាជនភាគច្រើនមិនទាន់ស្វះស្វែងរកត្រីទេ ព្រោះពួកគេគិតថា ចុងខែធ្នូ ឬដើមខែមករាឆ្នាំក្រោយ នឹងមានត្រីរៀលធំៗនេះបើតាមលោកសេង ពុន ឈឿន នាយខណ្ឌរដ្ឋបាលជលផលខេត្តកំពង់ឆ្នាំង។ប៉ុន្តែលោកបានមានប្រសាសន៍ថា ប្រជាជននៅបួនស្រុកបានចាប់ផ្តើមប្រមូលផលត្រីរៀលហើយ។
ភោគផលត្រីប្រហុកឆ្នាំនេះកើនឡើងស្របពេលនឹងតម្លៃឡើងថ្លៃ។ លោកវណ្ណថុល បានមានប្រសាសន៍ថា ត្រីប្រហុកអាចមានតម្លៃចន្លោះពី១.០០០ ទៅ១.៣០០រៀលក្នុងមួយគីឡូ ចំណែកលោក ពុនឈឿន វិញបានមានប្រសាសន៍ថា វាអាចឡើងដល់១.៥០០ឯណោះក្នុងមួយគីឡូ។ អ្នកស្រី យូ ស្រីម៉ៅ បាននិយាយថា អ្នកស្រីលក់ត្រីរៀលនៅឡូនេសាទរបស់អ្នកស្រីក្នុងតម្លៃ១.០០០រៀលក្នុងមួយគីឡូ។
សម្រាប់លោក សុខ សុវណ្ណ អាយុ៥៦ឆ្នាំ ជាអ្នកធ្វើប្រហុក ដែលអង្គុយនៅច្រាំងទន្លេសាបកាលពីថ្ងៃពុធកន្លងមក ឆ្នាំមុនមិនមែនជាឆ្នាំត្រូវប៉ាន់ឡើយ ដោយទិញបានត្រីប្រហុកពីអ្នកនេសាទវៀតណាមត្រឹមតែ៥តោនប៉ុណ្ណោះ។ នៅដើមខែមករាឆ្នាំក្រោយ នៅពេលទិន្នផលត្រីកើនឡើង គាត់អាចទិញបាន៤០ ឬ៥០តោនក្នុងមួយថ្ងៃ។
លោកបាននិយាយថា “ខ្ញុំបានប្រកបមុខរបរនេះអស់រយៈពេល៣០ឆ្នាំមកហើយ ហើយពេលខ្លះខ្ញុំចំណេញច្រើន ប៉ុន្តែពេលខ្លះក៏មិនចំណេញដែរ ខ្ញុំខាតច្រើនណាស់កាលពីឆ្នាំ២០១២ ដែលមានទឹកជំនន់តូចប៉ុណ្ណោះ”។ លោកពន្យល់ថា ទឹកជំនន់រដូវវស្សា ថ្វីបើជាការបំផ្លិចបំផ្លាញដល់កសិករក៏ដោយ ជា ប្រថ្នូលល្អនៃរដូវកាលធ្វើប្រហុកដ៏កាក់កប ៕សាវតា