រដ្ឋាភិបាលបានស្នើឲ្យមានការដំឡើងប្រាក់ឈ្នួលអប្បបរមាទ្វេដងសម្រាប់កម្មកររោងចក្រកាត់ដេរ ពោលគឺដំឡើងពី៨០ដុល្លារ ដល់១៦០ដុល្លារក្នុងរយៈពេលបួនឆ្នាំ។ រដ្ឋាភិបាលបានស្នើបែបនេះអំឡុងកិច្ចប្រជុំជាមួយសហជីពនិងម្ចាស់រោងចក្រកាត់ដេរកាលពីម្សិលមិញនៅឯក្រសួងការងារ និងបណ្តុះបណ្តាលវិជ្ជាជីវៈ។
លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានមានប្រសាសន៍ថា “យើងមានផែនការដំឡើងប្រាក់ឈ្នួលអប្បបរមាឲ្យឡើងដល់១៦០ដុល្លារសម្រាប់កម្មកររោងចក្រកាត់ដេរ ហើយខ្ញុំសង្ឃឹមថា នឹងមិនមានបញ្ហាកើតឡើងទៀតទេ បន្ទាប់ពីប្រាក់ឈ្នួលត្រូវបានដំឡើងចាប់ពីដើមឆ្នាំក្រោយទៅ”។
សំណើនេះនឹងត្រូវបានពិភាក្សានៅក្រុមប្រឹក្សាការងារ ដែលជាស្ថាប័នត្រីភាគី ដែលមានសមាសភាពមកពីរដ្ឋាភិបាលសហជីពនិងម្ចាស់រោងចក្រ នៅក្នុងកិច្ចប្រជុំស្តីពីប្រាក់ឈ្នួលអប្បបរមា ដែលគ្រោងនឹងរៀបចំនៅថ្ងៃទី២៤ ខែធ្នូ នេះបើយោងតាមលោករដ្ឋមន្ត្រី អ៊ិត សំហេង។
កាលពីខែមីនា មុនពេលបោះឆ្នោតជាតិ ប្រាក់ឈ្នួលអប្បបរមា ត្រូវបានដំឡើង១៩ ដុល្លារ ឬជិត២៥ភាគរយ លើប្រាក់ឈ្នួល អប្បបរមាចាស់៦១ដុល្លារ។
ទោះជាយ៉ាងណាកូដកម្មនៅតែបន្តយារយី វិស័យនេះ ហើយសមាជិកសមាគមន៍រោងចក្រកាត់ដេរនៅកម្ពុជាបានរិះគន់រដ្ឋាភិបាលថា មិនមានសមត្ថភាពនៅក្នុងការចាត់វិធានការណ៍ លើសកម្មភាពទាំងនេះ។ សមាគមន៍ នេះបានស្នើថា ប្រាក់ឈ្នួលអប្បបរមាគួរត្រូវបានដំឡើងដល់១៣០ដុល្លារឆ្នាំ២០១៨។
លោក សំហេង ដែលបានស្នើឲ្យមានការដំឡើងប្រាក់ឈ្នួលអប្បបរមាប្រចាំឆ្នាំកាលពីខែវិច្ឆិកានោះបានលើកឡើងថា ផែនការរយៈពេលប្រាំឆ្នាំដែលរដ្ឋាភិបាលបានស្នើឡើងមិនទាន់បញ្ចប់ទេ ដោយសារតែនៅមាន គំនិតមិនត្រូវគ្នារវាងនិយោជក និងសហជីព។ លោកបានថ្លែងប្រាប់ក្រុមអ្នកសារព័ត៌មាន ក្រោយកិច្ចប្រជុំកាលពីម្សិលមិញថា “យើងមិនទាន់សម្រេចជាផ្លូវការថា តើយើងនឹងដំឡើងប្រាក់ឈ្នួលប៉ុន្មានទេ ពីព្រោះសហជីព និងនិយោជកមានគំនិតខ្វែងគ្នា”។
អំឡុងកិច្ចប្រជុំនេះមេដឹកនាំសហជីពធំៗបំផុតនៅក្នុងប្រទេសកម្ពុជាបានបង្ហាញពីសារៈសំខាន់នៃការដំឡើងប្រាក់ឈ្នួលក្នុងរយៈពេលប៉ុន្មានឆ្នាំខាងមុខ។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាដែលជាសហជីពឯករាជ្យធំបំផុតក្នុងកម្ពុជាបានស្នើឲ្យមានការដំឡើងប្រាក់ឈ្នួលអប្បបរមាឲ្យឡើងដល់១៦០ដុល្លារនាឆ្នាំក្រោយ ដោយសារតែសហជីពរបស់លោកបានសិក្សា ស្រាវជ្រាវ និងរកឃើញថា ប្រាក់ឈ្នួលសមរម្យសម្រាប់កម្មករមានប្រហែល១៧៧ដុល្លារ។
លោក ជួន មុំថុល ប្រធានសហព័ន្ធសហជីពកម្ពុជា និងលោក សោម អូន ប្រធានសហព័ន្ធសហជីពកម្មករកម្ពុជាដែលជាមេដឹកនាំសហជីពមាននិន្នាការគាំទ្រគណបក្សប្រជាជនកម្ពុជា បានលើកឡើងថា ប្រាក់ឈ្នួលអប្បបរមាគួរតែត្រូវបានដំឡើងក្នុងកម្រិតតិចជាងនេះ ដើម្បីកុំឲ្យម្ចាស់រោងចក្រមានភាពភ័យខ្លាច។
លោក មុំថុល បានមានប្រសាសន៍ថា “ខ្ញុំបារម្ភអំពីការដំឡើងប្រាក់ឈ្នួលអប្បរមាយ៉ាងលឿនបែបនេះ ពីព្រោះម្ចាស់រោងចក្រ មួយចំនួនបានប្រាប់ខ្ញុំថា ពួកគេនឹងបិទរោងចក្ររបស់ខ្លួន ហើយបង្វែរទិសដៅទៅប្រទេស បង់ក្លាដែស ឬក៏ប្រទេសភូមាវិញ”។ លោក កែន លូ អគ្គលេខាធិការសមាគមន៍ រោងចក្រកាត់ដេរនៅកម្ពុជា បានលើកឡើងថា ម្ចាស់រោងចក្រអាចដំឡើងប្រាក់អប្បបរមា បាន ក៏ប៉ុន្តែ នៅបារម្ភថា ប្រសិនបើមិនមានចំណាត់ការរបស់រដ្ឋាភិបាលទេ ពួកគេនៅតែត្រូវចាយវាយទៅលើកូដកម្មខុសច្បាប់ ដោយមិនគិតថា តើខ្លួនត្រូវផ្តល់ប្រាក់ឈ្នួលឲ្យកម្មករប៉ុន្មានទេ៕សុធា