យោងតាមសេចក្ដីរាយការណ៍របស់ប្រព័ន្ធផ្សព្វផ្សាយបានឲ្យដឹងថា លោកនាយករដ្ឋមន្ត្រី ហ៊ុន សែន បានព្រមព្រៀងពង្រឹងទំនាក់ទំនងការទូតរបស់កម្ពុជាជាមួយប្រទេសជប៉ុនឲ្យឈានទៅដល់ “កម្រិតយុទ្ធសាស្ត្រ” អំឡុងកិច្ចពិភាក្សាក្នុងទីក្រុងតូក្យូ កាលពីថ្ងៃអាទិត្យ ប៉ុន្តែលោកក៏បានថ្លែងអំណរគុណប្រធានាធិបតីជប៉ុនលោក ស៊ីនហ្សូ អាបេ ដែរចំពោះកិច្ចខំប្រឹងប្រែងធ្វើឲ្យនូវទំនាក់ទំនងជាមួយប្រទេសចិន ដែលជាប្រទេសជិតខាងប្រសើរឡើង។
អំឡុងដំណើរទស្សនកិច្ចផ្លូវរដ្ឋទៅកាន់ប្រទេសជប៉ុន ដែលត្រូវបញ្ចប់នៅថ្ងៃនេះ លោក ហ៊ុន សែន ក៏បានទទួលយកឥណទានថ្មីចំនួន១៣៤លានដុល្លារផងដែរសម្រាប់គម្រោងហេដ្ឋារចនាសម្ព័ន្ធចំនួនបី ពីប្រទេសជប៉ុន ដែលជាម្ចាស់ជំនួយអភិវឌ្ឍន៍ធំបំផុតរបស់ប្រទេសកម្ពុជា។ ទីភ្នាក់ងារព័ត៌មានរដ្ឋ AKP បានចាត់ទុកសេចក្ដីសម្រេចរបស់កម្ពុជានិងជប៉ុន ដើម្បីពង្រឹងទំនាក់ទំនងរបស់ខ្លួនឲ្យឈានទៅដល់ “កម្រិតយុទ្ធសាស្ត្រ” នេះថា ជាការវិវឌ្ឍន៍ ប៉ុន្តែមិនបានពន្យល់ថា វាមានន័យយ៉ាងដូចម្ដេច ឬថាតើវានឹងកែប្រែទំនាក់ទំនងបច្ចុប្បន្នរវាងប្រទេសទាំងពីរដោយរបៀបណាឡើយ។
ជំនួបទ្វេភាគីរវាងលោក ហ៊ុន សែន និងលោក ស៊ីនហ្សូ អាបេ ធ្វើឡើងក្រោយពីកិច្ចប្រជុំកំពូលរំឭកខួបអនុស្សាវរីយ៍នៃទំនាក់ទំនងដៃគូអាស៊ាន-ជប៉ុន ដែលមានរយៈពេលមួយថ្ងៃ ហើយអំឡុងពេលនោះប្រទេសជប៉ុននិងប្រទេសជាសមាជិកអាស៊ានទាំង១០បានព្រមព្រៀងធានាឲ្យមាន “សេរីភាពនៃការហោះហើរឆ្លងដែន” នៅក្នុងតំបន់ ជាចំណាត់ការមួយដែលប្រទេសចិនទំនងជាចាត់ទុកថា ជាការគំរាមកំហែងចំពោះតំបន់ការពារដែនអាកាស ដែលខ្លួនបានដាក់ជាឯកតោភាគីលើដែនទឹកមានវិវាទរវាងខ្លួន និងប្រទេសជប៉ុន។
យោងតាម AKP បានឲ្យដឹងថា នាយករដ្ឋមន្ត្រី ស៊ីនហ្សូ អាបេ ក៏បានមានប្រសាសន៍ដែរថា លោកសង្ឃឹមថា ជើងហោះហើរផ្ទាល់រវាងប្រទេសជប៉ុន និងកម្ពុជា នឹងត្រូវបង្កើតឡើងក្នុងពេលឆាប់ៗនេះ ហើយបញ្ជាក់ថា អ្នកជំនាញការជប៉ុនខាងបោះ ឆ្នោតក៏នឹងត្រូវបញ្ជូនមកឆាប់ៗដែរដើម្បីជួយធ្វើកំណែទម្រង់ប្រព័ន្ធ បោះឆ្នោតដែលរងការរិះគន់យ៉ាងខ្លាំងរបស់កម្ពុជា។
យោងតាម AKP ដដែលបានឲ្យដឹងទៀតថា នាយករដ្ឋមន្ត្រី ស៊ីនហ្សូ អាបេ ក៏បានមានប្រសាសន៍ដែរថា គម្រោងដែលប្រទេសជប៉ុនបានចុះហត្ថលេខាកាលពីថ្ងៃអាទិត្យសម្រាប់ការចំណាយរួមមានការជួសជុលកែលម្អផ្លូវជាតិលេខ១ និងមន្ទីរពេទ្យបង្អែកខេត្តព្រះសីហនុ ព្រមទាំងឧបករណ៍ជួសជុលស្ដារផ្លូវចូលប្រាសាទអង្គរវត្តទៀតផង។
ប្រព័ន្ធផ្សព្វផ្សាយរបស់ប្រទេសជប៉ុនបានធ្វើសេចក្ដីរាយការណ៍ថា គម្រោងអភិវឌ្ឍន៍ដែលត្រូវបានព្រមព្រៀងរួមមាន ការងារបណ្ដាញថាមពលអគ្គិសនីរបស់កម្ពុជា ប្រព័ន្ធធារាសាស្ត្រ និងផ្លូវហាយវ៉េមួយខ្សែភ្ជាប់រាជធានីភ្នំពេញទៅប្រទេសថៃ។ លោក នាង ផាត រដ្ឋលេខាធិការក្រសួងការពារជាតិកម្ពុជាក៏ស្ថិតក្នុងដំណើរទស្សនកិច្ចនៅក្នុងទីក្រុងតូក្យូដែរ ដើម្បីចុះអនុស្សរណៈមួយស្ដីពីកិច្ចសហប្រតិបត្តិការការពារជាមួយសមភាគីជប៉ុន ប៉ុន្តែគ្មានសេចក្ដីលម្អិតពាក់ព័ន្ធនឹងបញ្ហានេះ។
កាលពីម្សិលមិញលោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រីបានបដិសេធមិនធ្វើអត្ថាធិប្បាយថា តើទំនាក់ទំនងជាមួយប្រទេសជប៉ុនមានភាពជិតស្និទ្ធខ្លាំងប៉ុណ្ណា ឬថាតើកិច្ចព្រមព្រៀង “សេរីភាពនៃការហោះហើរឆ្លងដែន” ប្រហែលជាធ្វើឲ្យប៉ះពាល់ដល់ទំនាក់ទំនងរវាងរដ្ឋាភិបាលក្រុងភ្នំពេញនិងរដ្ឋាភិបាលក្រុងប៉េកាំង ដែលជាវិនិយោគិនធំបំផុតរបស់ប្រទេសកម្ពុជានោះទេ ហើយលោកបានបង្វែរសំណួរទៅខុទ្ទកាល័យរបស់លោក ហ៊ុន សែន។
ការធ្វើជាម្ចាស់ផ្ទះរបស់ប្រទេសជប៉ុនក្នុងកិច្ចប្រជុំកំពូលរំឭកខួបអនុស្សាវរីយ៍នៃទំនាក់ទំនងដៃគូអាស៊ាន-ជប៉ុន ទីដែលប្រទេសនេះបានសន្យាផ្ដល់ជំនួយជិត២០ពាន់លានដុល្លារសម្រាប់បណ្ដាប្រទេសជាសមាជិកអាស៊ានក្នុងរយៈពេលប្រាំឆ្នាំបន្ទាប់ និងដំណើរទស្សនកិច្ចរបស់លោក ស៊ីនហ្សូ អាបេ ក្នុងពេលថ្មីៗនេះទៅកាន់បណ្ដាប្រទេសជាសមាជិកអាស៊ាន ត្រូវបានគេមើលឃើញទូទៅថា ជាកិច្ចប្រឹងប្រែងរបស់រដ្ឋាភិបាលក្រុងតូក្យូ ដើម្បីកៀងគរការគាំទ្រនៅក្នុងតំបន់ និងដើម្បីទប់ទល់ឥទ្ធិពលរបស់ប្រទេសចិន ដែលរីកកាន់តែធំឡើងនៅក្នុងតំបន់។
តែទោះជាយ៉ាងណា យោងតាមកាសែត Wall Street Journal បានឲ្យដឹងថា លោក ហ៊ុន សែន ដែលបានពង្រឹងទំនាក់ទំនងជាពិសេសជាមួយរដ្ឋាភិបាលក្រុងប៉េកាំង ដែលធ្វើឲ្យកម្ពុជាក្លាយជាសម្ពន្ធមិត្តជិតស្និទ្ធបំផុតរបស់ខ្លួននៅក្នុងតំបន់អាស៊ាននោះ បានប្រាប់លោក អាបេ កាលពីថ្ងៃអាទិត្យថា លោករីករាយ ដែលនាយករដ្ឋមន្ត្រីជប៉ុនព្យាយាមពង្រឹងទំនាក់ទំនងជាមួយប្រទេសចិន។ ប៉ុន្តែដំណើរទស្សនកិច្ចទៅកាន់ទីក្រុងតូក្យូ មិនមែនដើម្បីការងារសុទ្ធនោះទេ សម្រាប់លោក ហ៊ុន សែន និងលោកស្រី ប៊ុន រ៉ានី ភរិយារបស់លោក។
យោងតាមអង្គភាពព័ត៌មាន និងប្រតិកម្មរហ័សរបស់ទីស្ដីការគណៈរដ្ឋមន្ត្រីបានឲ្យដឹងថា បុគ្គលិកនៅក្រុមហ៊ុនមីណេប៊ី (Minebea) របស់ជប៉ុន ដែលផលិតម៉ាស៊ីននៅក្នុងប្រទេសកម្ពុជា បានរៀបចំនំខេក និងការប្រគំតន្ត្រីកាលពីថ្ងៃព្រហស្បតិ៍ ដើម្បីអបអរសាទរអំឡុងទិវាខួបជន្មាយុគម្រប់៥៩ឆ្នាំឈានចូល៦០ឆ្នាំរបស់លោកស្រី។ រូបថត នៅក្នុងគេហទំព័ររបស់អង្គភាពព័ត៌មាន និងប្រតិកម្មរហ័សបង្ហាញពីសកម្មភាពលោកស្រី ប៊ុន រ៉ានី ផ្លុំពន្លត់ភ្លើងទៀនលើនំខេក និងអមជុំវិញដោយតន្ត្រីករជប៉ុន៕ សុខុម