ស្ថានទូតអាហ្វ្រិកខាងត្បូងប្រចាំកម្ពុជាកាលពីម្សិលមិញ បានប្រារព្ធពិធីរំឭកវិញ្ញាណក្ខន្ធផ្លូវការ សម្រាប់អតីតប្រធានាធិបតីអាហ្វ្រិកខាងត្បូង លោក ណែលសុន មែនដឺឡា (Nelson Mandela) ដែលបានទទួលមរណភាពកាលពីថ្ងៃទី៥ ខែធ្នូ ក្នុងជន្មាយុ៩៥ឆ្នាំ។
តំណាងរដ្ឋាភិបាល និងស្ថានទូតបរទេសបានជួបជុំគ្នានៅសណ្ឋាគាឡឺរ៉ូយ៉ាល់ ក្នុងរាជធានីភ្នំពេញដើម្បីគោរពវិញ្ញាណក្ខន្ធរបស់រដ្ឋបុរស ដែលត្រូវបានទទួលស្គាល់ទូទាំងពិភពលោក និងបានឆ្លងផុតពីការជាប់ពន្ធនាគាររយៈពេល២៧ឆ្នាំ ដើម្បីដឹកនាំប្រទេសរបស់លោកប្រកបដោយសន្តិភាពឲ្យចាកចេញពីការរើសអើងពូជសាសន៍។
ពិធីរយៈពេលមួយម៉ោងនេះត្រូវបានចូលរួមដោយអគ្គរដ្ឋទូតមិនប្រចាំការរបស់ប្រទេសអាហ្វ្រិកខាងត្បូងនៅកម្ពុជា គឺលោកស្រី រ៉ូប៊ីណា ម៉ាក (Robina Marks) ហើយពិធីនេះឆ្លុះបញ្ចាំងឲ្យឃើញជីវិតដ៏វែងរបស់លោកប្រធានាធិបតីរូប នេះ ក៏ដូចជាស្នាដៃជាច្រើនរបស់លោកផងដែរ។កាលពីសប្តាហ៍មុន លោក មែនដឺឡា បានទទួលមរណភាពដោយសារជំងឺ ដែល ធ្វើឲ្យគាត់បាត់មុខពីសាធារណជន ក៏ប៉ុន្តែ សាធារណជន មិនដែលភ្លេចរូបគាត់ទេ។
លោកស្រី ម៉ាក បានមានប្រសាសន៍ថា “យើងពិតជាទទួលបានពរជ័យពីមេដឹកនាំដែលមានទស្សនវែងឆ្ងាយ និងបានដឹកនាំអាហ្វ្រិកខាងត្បូងឲ្យមានលទ្ធិប្រជាធិបតេយ្យ ហើយយើងក៏សូមសម្តែងការដឹងគុណដ៏ជ្រាលជ្រៅចំពោះធម្មនុញ្ញមួយ ដែលការពារសិទ្ធិសេរីភាពដែលពិបាកនឹងសម្រេចបានរបស់យើង”។
លោក មែនដឺឡា ត្រូវបានយកទៅបញ្ចុះកាលពីថ្ងៃអាទិត្យ នៅស្រុកកំណើតនៅអាហ្វ្រិកខាងត្បូងក្នុងថ្ងៃចុងក្រោយនៃពិធីបុណ្យសពរយៈពេល១០ថ្ងៃ។ ពិធីកាលពីម្សិលមិញត្រូវបានរៀបចំត្រូវគ្នានឹងទិវាផ្សះផ្សាប្រចាំឆ្នាំរបស់ប្រទេសអាហ្វ្រិកខាងត្បូង ដែលបានចាប់ផ្តើមក្នុងឆ្នាំ១៩៩៤ បន្ទាប់ពីលោក មែនដឺឡា ចាប់ផ្តើមធ្វើជាប្រធានាធិបតី តាមរយៈការបោះឆ្នោតតាមបែបប្រជាធិប តេយ្យដែលមិនធ្លាប់មានក្នុងប្រទេសនេះ។
លោកស្រី ម៉ាក បានមានប្រសាសន៍ថា “ ប្រធានាធិបតីស្ថាបនិករបស់យើង បាននាំប្រជាពលរដ្ឋរបស់យើងរួមគ្នាប្រឆាំងនឹងវិវាទទាំងអស់”។ លោកស្រីបានបន្ថែមថា មរតកចុងក្រោយរបស់លោក មែនដឺឡា គឺ ថា លោកបាននាំគ្រប់ភាគីទាំងអស់ក្នុងការសន្ទនាសំដៅគោលដៅប្រជាធិបតេយ្យ។ លោកស្រីឲ្យដឹងថា “ការទទួលយកសារនោះទុកក្នុងបេះដូងរបស់អ្នក…នឹងជាវិធីដ៏ប្រសើរបំផុតក្នុងការគោរពវិញ្ញាណក្ខន្ធលោក ណែលសុន មែនដឺឡា”។
លោក អ៊ុច បូរិន រដ្ឋលេខាធិការក្រសួងការ បរទេសបានលើកឡើងអំពីមរតករបស់ លោក មែនដឺឡា ជាអ្នកជ្រោមជ្រែងផ្នែកសិទ្ធិមនុស្ស និងបានថ្លែងថា ជីវិតរបស់គាត់គួរតែជាមេរៀនមួយចំពោះអ្នកគ្រប់ៗគ្នា។ លោកបានឲ្យដឹងថា “គាត់រស់នៅក្នុង ជីវិតតស៊ូលំបាកដើម្បីនាំមកនូវសិទ្ធិមនុស្សសម្រាប់ទាំងអស់គ្នា និងបង្រៀនយើងថា យើងត្រូវរស់នៅក្នុងជីវិតមានន័យមួយដើម្បីវឌ្ឍនភាពទាំងអស់”។
ឯកអគ្គរដ្ឋទូតឥណ្ឌាប្រចាំនៅប្រទេសកម្ពុជាលោក ឌីនែស ប៉ាណេក (Dinesh Patnaik)ដែលរៀបចំពិធីនេះដែរ បានលើកឡើងអំពីមិត្តភាពផ្ទាល់ដ៏យូរលុងរបស់លោកជាមួយលោក មែនដឺឡា និងវិញ្ញាណនៃការពិចារណា បានដិតដល់របស់លោកនូវទំនាក់ទំនងយូរអង្វែងរវាងអាហ្វ្រិកខាងត្បូង និងឥណ្ឌា ដែល ជាប្រទេសមួយក្នុងចំណោមប្រទេសដំបូងគេគាំទ្រចលនាប្រឆាំងរបបអាប៉ាថេត និង ជា មួយ ហ្គានឌី ជាមេដឹកនាំប្រឆាំងអាណានិគម ដែលនាំឲ្យមានការជំរុញទឹកចិត្តមួយចំពោះ សមាជជាតិអាហ្វ្រិករបស់លោក មែនដឺឡា។ លោកបានថ្លែងថា “ ខ្ញុំបានជួបគាត់ច្រើនលើក ហើយវាជាកិត្តិយសដ៏ធំធេងមួយសម្រាប់ ប្រទេសឥណ្ឌា”៕ ប៊ុននី