តំណាងក្រុមហ៊ុន ទ្រី ភាព និយាយកាលពីម្សិលមិញថា អ្នកភូមិនៅក្នុងខេត្តពោធិ៍សាត់ដែលបានព្យាយាមហែក្បួនទៅកាន់វេទិកាសាធារណៈមួយកាលពីថ្ងៃច័ន្ទដើម្បីស្នើឲ្យអាជ្ញាធរធ្វើអន្តរាគមន៍ពាក់ព័ន្ធវិវាទដីធ្លីនោះ នឹងមិនទទួលបានសំណងបន្ថែមឡើយបន្ទាប់ពីបានបាត់បង់សិទ្ធិកាន់កាប់ដីធ្លីដែលពួកគាត់លើកឡើងថា ពួកគាត់បានធ្វើស្រែចម្ការចាប់តាំងពីឆ្នាំ១៩៩៦មកនោះ។
នគរបាលនិងកងរាជអាវុធហត្ថបានរារាំងអ្នកភូមិប្រហែល២០០នាក់មិនឲ្យចូលទៅក្នុងវត្តមួយស្ថិតក្នុងឃុំអន្លង់រាប ស្រុកវាលវែងទេ ដែលនៅ ទីនោះមន្ត្រីខេត្ត ឃុំ និងភូមិបានរៀបចំវេទិកាមួយ ដែលអ្នកភូមិសង្ឃឹមថា ប្រាប់ពីទុក្ខលំបាករបស់ខ្លួនឲ្យអាជ្ញាធរបានដឹង។
កាលពីម្សិលមិញ ក្រុមហ៊ុន ទ្រី ភាព ដែលបានជួលដីសម្បទានមួយផ្នែកទៅឲ្យកសិករវិញនោះបានលើកឡើងថា ក្រុមហ៊ុននឹងមិនធ្វើតាមសំណើរបស់អ្នកភូមិឲ្យប្រគល់ដីនេះទៅឲ្យពួកគាត់វិញឡើយ។ លោក ជ័យ សិទ្ធិ ប្រធានរដ្ឋបាលនៅក្រុមហ៊ុន ទ្រី ភាព ក្នុងរាជធានីភ្នំពេញបានមានប្រសាសន៍ថា “យើងបានដោះស្រាយជូនគ្រួសារដែលរងផលប៉ះពាល់រួចហើយ ហើយយើងមិនមានគម្រោងប្រគល់ដីទៅឲ្យអ្នកតវ៉ាទៀតទេ ពីព្រោះពួកគាត់បានធ្វើស្រែចម្ការលើដីរបស់ក្រុមហ៊ុននៅឆ្នាំនេះ”។
ដីសម្បទានដែលប្រគល់ទៅឲ្យសាខាពីររបស់ក្រុមហ៊ុន ទ្រី ភាព កាលពីឆ្នាំ២០១១ដើម្បីធ្វើចម្ការកៅស៊ូ និងចម្ការម្រេចនោះ គ្របដណ្តប់លើផ្ទៃដីទំហំ៨.០០០ហិកតា ដែលឥឡូវនេះដីទំហំ២.០០០ហិកតាត្រូវបានជួលឲ្យកសិករ។ លោក យស បាច អ្នកភូមិម្នាក់ដែលបានហែក្បួនទៅកាន់វត្តនោះបាននិយាយថា នឹងមានការតវ៉ាទៀត ប្រសិនបើអាជ្ញាធរមិនរកដំណោះស្រាយឲ្យអ្នកភូមិទេនោះ។
លោកនិយាយថា “យើងចង់ឲ្យអាជ្ញាធរស្វែងរកដំណោះស្រាយ ប៉ុន្តែនគរបាលនិងកងរាជអាវុធហត្ថជាង៣០នាក់បានរុញច្រានពួកគាត់ [មិនឲ្យចូលក្នុងវេទិកានោះ]”។ លោកបាននិយាយទៀតថា “យើងបានពិភាក្សាគ្នានៅថ្ងៃនេះ [ថ្ងៃអង្គារ] និងគម្រោងធ្វើបាតុកម្មដ៏ធំប្រឆាំងក្រុមហ៊ុន ទ្រី ភាព ទាមទារយកដីរបស់យើងវិញ ប្រសិនបើអាជ្ញាធរមិនស្វែងរកដំណោះស្រាយក្នុងរយៈពេលមួយសប្តាហ៍ទេនោះ”។
លោក ឆែ ឈីវ អភិបាលស្រុកវាលវែងមានប្រសាសន៍ថា អាជ្ញាធរខេត្ត និងក្រុមហ៊ុន ទ្រី ភាព បានដោះស្រាយវិវាទដីធ្លីនេះជូនអ្នកភូមិដែលរងផលប៉ះពាល់ចំនួន៤០០គ្រួសាររួចហើយ ដោយការជួលដីឲ្យពួកគាត់។ ដោយបដិសេធមិនលើកឡើងពីតួលេខ លោកបានមានប្រសាសន៍ថា “យើងបានរកដំណោះស្រាយជូនគ្រួសារដែលរងផលប៉ះពាល់ជិតអស់ហើយ ប៉ុន្តែនៅសល់មួយចំនួនតូចប៉ុណ្ណោះមិនទាន់ដោះស្រាយ”៕សារុន