សាច់ញាតិរបស់ស្ត្រីខ្មែរម្នាក់ដែលធ្វើការក្នុងកាស៊ីណូមួយនៅទីក្រុងបាងកក បានដាក់ពាក្យបណ្តឹងទៅសមាគមសិទ្ធិមនុស្សអាដហុក កាលពីថ្ងៃច័ន្ទ ដើម្បីស្វែងរកជំនួយបន្ទាប់ពីរូបថតសាច់ញាតិរបស់ខ្លួនដែលអត់សម្លៀកបំពាក់ពាក់កណ្តាលខ្លួន លេចចេញនៅលើបណ្តាញទំនាក់ទំនងសង្គមហ្វេសប៊ុក រយៈពេលប្រហែលពីរសប្តាហ៍ បន្ទាប់ពីសាច់ញាតិរបស់ស្ត្រីរូបនេះបានបាត់បង់ទំនាក់ទំនងជាមួយនាង។
ស្ត្រីឈ្មោះ សូ ម៉ាសា អាយុ៣២ឆ្នាំ មកពីខេត្តបន្ទាយមានជ័យ បានធ្វើការនៅកាសីុណូ មួយនៅក្រុងប៉ោយប៉ែត អស់រយៈពេលពីរឆ្នាំ មុនពេលប្តូរកន្លែងធ្វើការទៅកាស៊ីណូមួយនៅទីក្រុងបាងកក។សាច់ញាតិរបស់ស្ត្រីរូបនេះបានលើកឡើងថា នៅទីនោះគាត់កំពុងរងការគំរាម។
លោក ស៊ុំ ចាន់គា អ្នកសម្របសម្រួលសមាគមអាដហុកនៅខេត្តបន្ទាយមានជ័យបាននិយាយកាលពីម្សិលមិញថា លោកបានទទួលពាក្យបណ្តឹងពីសាច់ញាតិរបស់ស្ត្រីឈ្មោះ សូ ម៉ាសា ដែលបញ្ជាក់ថា ស្ត្រីរូបនេះ ត្រូវបានអ្នកគ្រប់គ្រងឃុំខ្លួន និងវាយដំ ប៉ុន្តែ លោកមិនស្គាល់ឈ្មោះអ្នកគ្រប់គ្រងរូបនោះទេ។
លោក ចាន់គា បានមានប្រសាសន៍ថា “ជនរងគ្រោះបានបាត់ខ្លួនតាំងពីថ្ងៃទី ២៩ខែវិច្ឆិកា ហើយរហូតដល់ខែធ្នូ ទើបមិត្តភក្តិ និងអ្នកធ្វើការជាមួយជនរងគ្រោះបានផ្តល់ដំណឹងដល់ [សាច់ញាតិរបស់ស្ត្រីរូបនេះ] ទាក់ទងទៅនឹងជនរងគ្រោះ ព្រមទាំងរូបថតនៅលើបណ្តាញទំនាក់ទំនងសង្គមហ្វេសប៊ុកដែលបង្ហាញស្ត្រីអាក្រាតកាយពីរនាក់ដែលត្រូវបានគេវាយដំ”។ លោកបានមានប្រសាសន៍បន្តទៀតថា “ម្នាក់ក្នុងចំណោមជនរងគ្រោះទាំងពីរនាក់នេះមានឈ្មោះថា ផាត សូម៉ាសា… ហើយម្នាក់ទៀតមិនទាន់ស្គាល់ឈ្មោះនៅឡើយទេ ពោលគឺយើងកំពុងស្រាវជ្រាវរកសាច់ញាតិរបស់គាត់នៅឡើយ”។
លោក ឈុំ សុភាព អាយុ៣២ឆ្នាំ ត្រូវជាបងថ្លៃរបស់ស្ត្រីឈ្មោះ សូ ម៉ាសា បានឲ្យដឹងថា ស្ត្រីដែលបាត់ខ្លួនរូបនេះបានទាក់ទងសាច់ញាតិរបស់ខ្លួនកាលពីយប់ថ្ងៃច័ន្ទ ជាលើកដំបូងដែលសាច់ញាតិរបស់ស្ត្រីរូបនេះបានឮដំណឹងពីខ្លួន តាំងពីរូបថតបានលេចឡើងនៅក្នុងបណ្តាញទំនាក់ទំនងសង្គមហ្វេសប៊ុក។
លោកបានមានប្រសាសន៍ថា “កាលពីយប់ថ្ងៃច័ន្ទ ប្អូនថ្លៃរបស់ខ្ញុំបានទូរស័ព្ទមកគ្រួសាររបស់យើង។ នាងបាននិយាយខ្សឹបៗហើយថា នាងកំពុងរងការគំរាមកំហែងពីអ្នកគ្រប់គ្រងនៅកាស៊ីណូដែលនាងធ្វើការនៅប្រទេសថៃ”។
លោក សុភាព បានបន្តថា អ្នកគ្រប់គ្រងនៅកាស៊ីណូនោះបានរឹបអូសយកប្រាក់សន្សំរបស់ស្ត្រីរងគ្រោះ បន្ទាប់ពីចោទប្រកាន់ស្ត្រីរងគ្រោះ និងស្ត្រីដែលមិនទាន់ស្គាល់អត្តសញ្ញាណថា បានឃុបឃិតជាមួយអ្នកលេងល្បែងបោកប្រាស់កាស៊ីណូ។ លោកបានមានប្រសាសន៍ថា “ប្រាក់១លានបាត[ប្រហែល៣១.១០០ដុល្លារ] ដែលនាងរកបានតាមរយៈការងារ និងការសន្សំអស់រយៈពេលពីរឆ្នាំនោះត្រូវបានគេដកហូតយក”។
ចំណែកឯពេលវេលាដែលរូបថតទាំងនោះបានលេចឡើងនៅលើបណ្តាញអ៊ីនធើណិត ឬក៏មូលហេតុដែលអ្នកធ្វើការជាមួយនាងប្រហែលជាបានយក និងបង្ហោះរូបថតទាំងនេះ ដោយមិនធ្វើឲ្យមានការភ្ញាក់ផ្អើលដល់អាជ្ញាធរកាលពីដំបូងនោះ មិនមានភាពច្បាស់លាស់ទេ។ លោក ចាន់គា បានលើកឡើងថា សមាគមអាដហុក នឹងបន្តស៊ើបអង្កេតលើករណីនេះ៕សុធា