30 C
Phnom Penh

មន្ត្រី​​​ម្នាក់​​​៖ ដៃគូជា​​​យុទ្ធសាស្ត្រ​​​ថ្មី​​​ជា​​​មួយ​​​ជប៉ុន​​​មិន​​​ធ្វើ​​​ឲ្យ​​​ប៉ះ​​​ពាល់​​​ដល់​​​ទំនាក់​​​ទំនង​​​ជា​​​មួយ​​​ចិន

ដោយ ឌឹ ខេមបូឌា ដេលី

បទវិភាគ

ពេល​ត្រឡប់​មកពី​​​បំពេញ​​​ទស្សនកិច្ច​ផ្លូវ​រដ្ឋ​​នៅ​ប្រទេស​ជប៉ុន​កាលពីម្សិលមិញ មន្ត្រី​រដ្ឋា​ភិបាល​របស់​លោក ហ៊ុន សែ​ន មួយ​រូប​បាន​​​​បដិ​សេធ​​ថា ការ​បង្កើន​ទំនាក់​​ទំនង​ថ្មី​ជា​មួយ​ប្រទេស​ជប៉ុន​ និង​សេចក្ដី​សម្រេច​របស់​កម្ពុជា​​​ក្នុង​ការ​ចូល​រួម​ជាមួយ​ប្រទេស​ជិត​ខាង​របស់​​អាស៊ាន​​​ ក្នុង​​​​​កិច្ច​​​ព្រម​​​ព្រៀង​​​​ស្ដីពី​“ការ​​​ហោះ​​​ហើរ​ដោយ​សេរី​” នៅ​ទីក្រុង​តូក្យូ មិន​ធ្វើ​ឲ្យ​ប៉ះពាល់​​ដល់​ទំនាក់​ទំនង​ជិត​ស្និទ្ធ​របស់​ខ្លួន​ជាមួ​យ​ទីក្រុង​ប៉េ​កាំងទេ​។

អំឡុង​ពេ​ល​ធ្វើ​ទស្សនកិច្ច​នោះ លោក ហ៊ុន សែន បាន​បង្កើន​ទំនាក់​ទំនង​ជា​ផ្លូវ​ការ​ជាមួយ​ជប៉ុន​​ ដើម្បី​​​ធ្វើ​​​ជា“ ដៃ​គូ​យុទ្ធសាស្ត្រ​” ហើយ​នៅ​ឯកិច្ច​ប្រជុំ​កំពូល​អាស៊ាន​-ជប៉ុន​ កាលពី​ថ្ងៃ​សៅរ​៍​ បាន​ចូល​រួម​នៅ​ក្នុង​សេចក្ដី​ថ្លែង​ការ​ណ៍​រួម​មួយ​​​​ស្តី​​​​ពីសិទ្ធិ​ហោះ​ហើរ​ដោយ​​​សេរី​នៅ​ក្នុង​តំបន់​នេះ​។

ប្រទេស​ចិន​ទំនង​ជាបក​ស្រាយ​សេចក្ដី​ថ្លែង​​​​ការណ៍រួម​នេះ​ថា ជាការ​​ប្រឆាំង​នឹង​តំបន់​​ការ​​​ពារ​ដែន​អាកាស​ដែលខ្លួនបាន​ប្រកាស​ជា​ឯក​​តោ​ភាគីនៅ​លើ​កោះ​មា​ន​ជម្លោះ​​​ក្នុង​សមុទ្រ​ចិន​ខាង​ត្បូង​​​​េនះ​​​។

ពេល​​​​ត្រឡប់​​​មក​ពីទីក្រុង​តូក្យូ​ថ្មីៗ​​​ជាមួយ​លោក ហ៊ុន សែន លោក កៅ គឹមហួន រដ្ឋ​មន្ត្រី​​អម​នាយក​រដ្ឋមន្ត្រី​ ​បាន​ថ្លែង​ទៅកាន់​អ្នក​យក​ព័ត៌មាន​អំពី​ដំណើរ​ទស្សនកិច្ច​នេះ​នៅ​អាកាស​​​យានដ្ឋាន​​អន្តរជាត​ិ​ភ្នំពេញ​។

នៅ​ពេល​សួ​រ​ថា តើ​ការ​ចូល​រួម​របស់​កម្ពុជា​នៅ​ក្នុង​សេចក្ដី​ថ្លែង​ការណ៍រួម​របស់​អាស៊ាន​នេះ​​អាច​ធ្វើ​ឲ្យ​ចិន​​ដែល​ជា​វិនិយោគិន​ធំបំផុត​នៅ​ក​ម្ពុជា​អាក់​អន់​ចិត្ត​ឬយ៉ាង​ណា​នោះ លោក កៅ គឹមហួន បាន​អះអាង​ថា ​កិច្ច​ព្រម​ព្រៀង​ហោះ​​​ហើរ​ដោយ​សេរីនេះ​គ្រាន់​តែ​លើក​ឡើង​​​​​សាជា​ថ្មី​​​​​​​​នូវ​​​​​​​គោល​ការ​ណ៍​​​​នៅ​​​ក្នុង​​​គោល​​​ការណ៍​​​អនុវត្ត​ដែល​មាន​រួច​ហើយ​ក្នុង​ចំណោម​​​ប្រទេស​ជា​សមាជិក​អាស៊ាន​​​​ពាក់​​​ព័ន្ធ​​​នឹង​​​​នាវា​​ចរណ៍​​ក្នុង​សមុទ្រ​ចិន​ខាង​ត្បូង​។

លោក កៅ គឹមហួន ​មាន​ប្រសាសន៍​ថា “កិច្ច​​ព្រម​ព្រៀង​នេះ​មាន​ចែង​រួច​ហើយ​នៅ​​ក្នុង​​​​គោល​​​ការណ៍​​​អនុវត្តន៍។​​​​​​គោលការណ៍​​​អនុវត្តន៍​​​នេះ​​​​ចែង​រួច​ហើយ​ថា ត្រូវ​មាន​សកម្ម​ភាព​ និង​សន្តិសុខ​សម្រាប​់​នាវា​ចរណ៍​។ អ្វី​ដែល​យើង​កំពុ​ង​ធ្វើ​គឺ​ដើម្បីពង្រឹង​ទំនាក់​ទំនង​រវាង​អាស៊ាន និង​ប្រទេស​ជាដៃគូ​របស​់​អាស៊ាន​”។

លោក កៅ​​​ គឹមហួន ក៏បាន​មាន​ប្រសាសន​​​៍​ដែរ​ថា ការ​បង្កើន​ទំនាក់​ទំន​ង​ទ្វេភាគី​ជាមួ​យ​ប្រទេស​ជប៉ុន​គឺ​ស្រប​តាម​គោល​នយោបាយ​អាស៊ាន​។
លោក​បាន​មាន​ប្រសាសន៍​ថា “ ប្រទេស​កម្ពុជា​ គឺជា​សមាជិក​អាស៊ាន​ ហើយ​អាស៊ាន​មាន​ទំនាក់​ទំនង​ជាមួយ​ប្រទេស​ដទៃ​ទៀត​​ ដូច​ជា​​ចិន​ ជប៉ុន​ កូរ៉េ​ខាង​ត្បូង និង​ឥណ្ឌា។ សម្រាប់​កម្ពុជា​ អ្វី​ដែល​សំខាន់​នោះ​គឺគោល​នយោបាយ​អាស៊ាន​របស់​ខ្លួន​ ហើយ​​ជប៉ុន​ក៏បាន​ផ្ដល់​ប្រយោជន៍​ឲ្យ​យើង​ច្រើន​ដែរ​”។

ប្រទេស​ជប៉ុន​ដែល​ជា​ប្រទេស​ផ្ដល់​ជំនួយ​​​អភិវឌ្ឍន៍​​ច្រើន​ជាង​គេ​ដល់កម្ពុជា​នោះ​ បាន​ចុះហត្ថលេខា​ផ្ដល់​កម្ចីថ្មី​ចំនួន​១៣៤​លាន​ដុល្លារ​ទៀត​ដល់​រដ្ឋាភិបាល​របស់​លោក ហ៊ុន សែន សម្រាប់​គម្រោង​ចំនួន​បី​។ នៅ​ឯកិច្ច​ប្រជុំ​​​កំពូលអាស៊ាន​-ជ​ប៉ុ​ន​ កាលពីថ្ងៃសៅរ៍​ រដ្ឋាភិបា​ល​ជប៉ុន​ក៏​បាន​ប្រកាស​ពីផែន​ការ​ផ្ដល់​ជំ​នួយ​ចំនួន​២០​ពាន់​លាន​ដុល្លារ​ដល់​ប្រទេស​ជាសមាជិក​អាស៊ាន​សម្រាប់​រយៈ​ពេល​ប្រាំ​​ឆ្នាំ​ក្រោយ​នេះ​​​ដែរ​​​​។

លោក កៅ គឹមហួន បាន​ពន្យល់​អំពី​ដៃ​គូ​ជា​យុទ្ធសាស្ត្រ​ថ្មី​របស់​កម្ពុជា​ជាមួយ​ជប៉ុន​ ស្រប​​​​ពេល​​មានការ​ប្រកួត​ប្រជែង​ខ្លាំង​ជាមួយ​​ចិន​​​​ថា ការ​បង្កើន​​​​ទំនាក់​​​ទំនង​​​នេះមាន​ន័យ​ថា កិច្ច​សហ​ប្រតិ​បត្តិការ​ “ កាន់​តែ​​ស៊ី​​​ជម្រៅ​ និង​ធំ​ជាង​​​មុន​” លើ​​​​កិច្ចការ​​​សំខាន់ៗ​​​ជាច្រើន​ជាមួ​យ​​​ទីក្រុង​តូក្យូ​។

លោក​បាន​មាន​ប្រសាសន៍ថា “ ដៃ​គូជា​យុទ្ធសាស្ត្រ​នេះ​កាន់​តែទូលំទូលាយ​។ វិស័យ​​​ទាំង​​​​នេះកាន់​តែ​ស៊ីជម្រៅ​ និង​ទូលំទូលាយ​ ដូច​​ដែល​អស់​លោក​ឃើញ​ហើយ​ថា សម្ដេច​នាយក​រដ្ឋមន្ត្រី ហ៊ុន សែន កំពុង​ស្នើ​សុំឲ្យ​ជប៉ុន​ជួយ​កែទម្រង់​ប្រព័ន្ធ​បោះឆ្នោត​។ ហើយ​​ក៏​មាន​​​​​កិច្ច​​​សហប្រតិបត្តិការ​​​យោធា ដែល​យើង​​​​​​មិន​​​​ធ្លាប់​​​មាន​ពី​មុន​​​ផង​ដែរ​​។ ឥឡូវ​នេះ​យើង​មាន​កិច្ច​ព្រម​​ព្រៀង​​​ស្ដីពី​សហ​ប្រតិបត្តិ​​​ការ​យោធា​។​​​ យើង​ក៏កំពុង​ជំរុញ​ឲ្យមាន​កិច្ច​សហ​ប្រតិបត្តិការ​​​​ផ្នែក​​​នគរបាល​ផង​ដែរ ដូច្នេះ​​​​កិច្ច​សហ​ប្រតិបត្តិការ​នេះធំជាង​មុន​”។

មិន​មាន​ព័ត៌មាន​លម្អិត​អំពីកិច្ច​ព្រម​ព្រៀង​​ស្ដីពី​កិច្ច​សហ​ប្រតិប​ត្តិការ​យោធា និង​ផ្លាស់​ប្ដូរ​ព័ត៌មាន​រវាង​កម្ពុជា និង​ជប៉ុន​ទេ។
ប្រទេស​ទាំងពីរ​ក៏​ព្រម​ព្រៀង​ចាប់​ផ្ដើម​ចរចា​អំពីការ​បង្កើត​ជើង​ហោះហើរ​ពាណិជ្ជ​កម្ម​ដោយ​ផ្ទាល​់ផង​ដែរ​៕​​​គឹមហឿន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស