ព្រះមហាក្សត្រ នរោត្តម សីហមុនី បាន អប អរសាទរប្រទេសចិនដែលបានក្លាយជាប្រទេសទីបីតែមួយគត់ ដែលបានចុះចតយាន អវកាសមួយគ្រឿង នៅលើភពព្រះច័ន្ទ និងជាប្រទេសដំបូងគេដែលទៅដល់ភពព្រះច័ន្ទ ចាប់តាំងពីឆ្នាំ១៩៧៦។
ការចុះចតរបស់យានអវកាស The Chang ’e-3 កាលពីថ្ងៃសៅរ៍នៅក្នុងតំបន់ភពព្រះច័ន្ទដែល មិនទាន់រុករកពីមុនមកមួយ ហៅថា Sinus Iridum ឬ The Bay of Rainbows។
ព្រះមហាក្សត្របានមានព្រះបន្ទូលនៅក្នុង ព្រះរាជសារជូនចំពោះលោកប្រធានាធិបតីចិន ស៊ី ជីនពីង (Xi Jinping) និងចុះថ្ងៃទី១៦ថា “ រាជវង្សានុវង្ស រាជរដ្ឋាភិបាល និងប្រជាជនកម្ពុជា រួមទាំងរូបខ្ញុំ សូមសម្តែងការអបអរសាទរដ៏កក់ក្តៅបំផុតរបស់យើងខ្ញុំ និងកោតសរសើរចំពោះឯកឧត្តម គណបក្សកុម្មុយនិស្ត រដ្ឋាភិបាល និងកងទ័ពរំដោះប្រជាជន ប្រជាជនចិនដ៏មហិមា និងដ៏ក្លាហានសម្រាប់ភាពជោគជ័យពេញលេញក្នុងការចុះចតយានអវកាស Chang’e-3 លើភពព្រះច័ន្ទ”។
យានអវកាសឈ្មោះ Yutu ឬ Jade Rabbit បានចេញបេសកកម្មរយៈពេលបីខែ ដើម្បីចុះចតនៅឯភពព្រះច័ន្ទ ក្នុងគោលបំណងពិសោធន៍ធនធានធម្មជាតិ។
ជោគជ័យរបស់យានអវកាសនេះ កំពុងត្រូវបានអបអរសាទរ នៅក្នុងប្រទេសចិន ខណៈដែលមានការផ្សព្វផ្សាយអំពីយុគសម័យ ថ្មីនៃការរុករក នៅទីលំហអវកាសរបស់ចិន ទៅកាន់ភពព្រះច័ន្ទ និងធ្វើដំណើរទៅកាន់ផ្កាយព្រះអង្គារដ៏ឆ្ងាយ។
ទីភ្នាក់ងារព័ត៌មានសុិនហួរ រាយការណ៍ ថា “ ពេលនេះ ខណៈដែលយានអវកាស Jade Rabbit បានចុះចតនៅលើផ្ទៃភពព្រះច័ន្ទ ពិភព លោកទាំងមូលបានបង្ហាញភាពភ្ញាក់ផ្អើលម្តងទៀត ចំពោះសមត្ថភាពចុះចតនៅលំហអាកាស គួរឲ្យកត់សម្គាល់របស់ប្រទេសចិន”៕ ប៊ុននី