29 C
Phnom Penh

លោក​ សម​ រង្ស៊ី​ ​ប្រើ​ប្រាស់​រ៉ឺម៉ក​អំ​ឡុង​​​ការ​ដង្ហែ​ក្បួន​មហា​បាតុ​កម្មថ្ងៃ​ទី​បួន

ដោយ ឌឹ ខេមបូឌា ដេលី

បទវិភាគ

លោក សម រង្ស៊ី ប្រធាន​​​គណបក្ស​​​សង្គ្រោះ​​​​​​ជាតិ​​​​​​​​​បាន​​​បញ្ចេញ​​​គ្រប់​​​សកម្មភាព​​​អំឡុង​​​ពេល​​​​ហែក្បួន​​​តវ៉ា​​​នៅ​​​ទូទាំង​​​រាជធានីភ្នំពេញ​​​​​​កាល​​​ពីម្សិលមិញ។ នេះគឺ​ជាការ​​​​​​តវ៉ា​​​ថ្ងៃទី​៤​ដែលគណបក្ស​​​សង្គ្រោះជាតិ​​​អះអាង​​​ថា នឹង​​​បន្ត​​​ធ្វើ​​​ជា​​​រៀង​​​រាល់​​​ថ្ងៃ​​​ប្រឆាំង​​​នឹង​​​រដ្ឋាភិបាល​​​របស់​​​លោក ហ៊ុន សែន រហូត​​​ទាល់​​​តែ​​​លោក​​​ ហ៊ុន សែន ចុះ​​​ចេញពីតំណែង​​​ ឬ​​​យល់​​​ព្រម​​​រៀប​​​ចំការ​​​បោះឆ្នោត​​​សាជាថ្មី​​​។

ក្រុម​អ្នក​គាំទ្រ​គណបក្ស​ប្រឆាំង​ដង្ហែ​ក្បួន​កាត់​មហាវិថី​ព្រះ​សីហនុ កាល​ពីម្សិលមិញ។ លោក​ សម​ រង្ស៊ី ​​អះ​អាង​ថា ការ​តវ៉ា​នឹង​បន្ត​រាល់​ថ្ងៃ​រហូត​ទាល់តែ​លោក ហ៊ុន សែន ចុះ​ចេញ​ពី​តំណែង​​ ឬ​មាន​ការ​បោះ​ឆ្នោត​ឡើង​វិញ។ស៊ីវ ចាន់ណា
ក្រុម​អ្នក​គាំទ្រ​គណបក្ស​ប្រឆាំង​ដង្ហែ​ក្បួន​កាត់​មហាវិថី​ព្រះ​សីហនុ កាល​ពីម្សិលមិញ។ លោក​ សម​ រង្ស៊ី ​​អះ​អាង​ថា ការ​តវ៉ា​នឹង​បន្ត​រាល់​ថ្ងៃ​រហូត​ទាល់តែ​លោក ហ៊ុន សែន ចុះ​ចេញ​ពី​តំណែង​​ ឬ​មាន​ការ​បោះ​ឆ្នោត​ឡើង​វិញ។ស៊ីវ ចាន់ណា

ជាមួយវត្តមាន​​​លោក កឹម សុខា អនុ​​​ប្រធាន​​​​​​គណបក្ស​​​សង្គ្រោះ​​​ជាតិ​​​នៅអែបលោក សម រង្ស៊ី មេ​​​ដឹកនាំគណបក្ស​​​ទាំងពីរ​​​នាក់​​​នេះ​​​បាន​​​ចាប់​​​ផ្ដើម​​​ការ​​​ដង្ហែក្បួន​​​ចេញពី​​​ទីលាន​​​ប្រជា​​​ធិបតេយ្យ​​​ ដោយ​​​ធ្វើ​​​ដំណើរ​​​តាម​​​ទោចក្រ​​​យាន​​​​​​​​​យន្តយឺតៗ​​​កាត់​​​តាម​​​ផ្លូវ​​​លេខ​​​៥១​​​ ដោយ​​​ម្នាក់​​​ៗ​​​ឈរ​​​​​​​​​នៅ​​​​​​លើ​​​ម៉ូតូ​​​ត្រង់​​​កន្លែង​​​អ្នករួម​​​ដំណើរ​​​ និង​​​គ្រវី​​​​​​ទង់​​​ជាតិ​​​​​​ខ្មែរ​​​ផង​​​។

បន្ទាប់ពីបាន​​​បត់ទៅទិស​​​ខាង​​​លិច​​​តាម​​​បណ្ដោយ​​​មហាវិថីព្រះសីហនុ មេដឹកនាំ​​​ទាំង​​​ពីរ​​​បាន​​​ចាប់​​​ផ្ដើម​​​ដើរ​​​ចម្ងាយ​​​​​​ពីរ​​​បីរយ​​​ម៉ែត្រ​​​មុនពេល​​​លោក​​​ សម រង្ស៊ី ហក់​​​ឡើង​​​លើ​​​រ៉ឺម៉ក​​​​​​ម៉ូតូ ដើម្បី​​​ដឹក​​​​​​ព្រះ​​​សង្ឃ​​​ពីរអង្គ​​​​​​​​​។ មេដឹកនាំ​​​គណបក្ស​​​ប្រឆាំង​​​រូប​​​នេះ​​​មើល​​​ទៅ​​​គឺ​​​មិនប៉ិន​​​​​​ប្រសប់​​​ក្នុង​​​ការ​​​បើក​​​បរ​​​ទេ ដោយ​​​អង្គរក្ស​​​របស់​​​លោក​​​បានតាមមើល​​​យ៉ាង​​​យក​​​ចិត្ត​​​ទុក​​​ដាក់​​​ និង​​​ជួយ​​​ចាប់​​​ហ្វ្រាំង​​​ម្ដង​​​ម្កាល​​​​​​ ប៉ុន្តែ​​​លោក​​​ សម រង្ស៊ី នៅតែ​​​អាច​​​រក្សា​​​លំនឹង​​​​​​បាន​​​​​​។

ទីបំផុត​​​លោក សម រង្ស៊ី និង​​​លោក កឹម សុខា បានបញ្ចប់​​​ការ​​​ដង្ហែ​​​ក្បួន​​​ដោយ​​​អ្នក​​​គាំទ្រ​​​រាប់​​​ពាន់​​​នាក់​​​បាន​​​ដើរ​​​តាម​​​ពួកគាត់​​​​​​ដោយ​​​ថ្មើរ​​​ជើង​​​ និង​​​បាន​​​ស្រែក​​​ថា “ហ៊ុន សែន អ៊ើយ​​​ចុះ​​​ចេញ​​​​​​​​​ទៅ​​​!”​​​ ​​​នៅពីក្រោយ​​​រថយន្ត​​​ពីរ​​​បាំង​​​កន្លះមួយ​​​ឆ្ពោះទៅទី​​​​​​លាន​​​ប្រជា​​​ធិប​​​តេយ្យ​​​វិញ​​​​​​។ នគរ​​​បាល​​​ចរាចរ​​​បានជួយ​​​បើក​​​ផ្លូវ​​​សម្រាប់​​​ការ​​​ដង្ហែ​​​​​​ក្បួន​​​នេះ​​​​​​ដែល​​​យ៉ាង​​​ហោច​​​ណាស់​​​ក៏​​​បាន​​​ទទួល​​​ការ​​​ស្រែក​​​អប​​​អរ​​​ និង​​​គ្រវី​​​ដៃ​​​ស្វាគមន៍​​​ពី​​​​​​​​​​​​អ្នក​​​ឈរ​​​មើល​​​រាប់​​​រយ​​​នាក់​​​នៅ​​​កាច់​​​ជ្រុង​​​ផ្លូវ​​​ភាគ​​​ច្រើន​​​ដែរ​​​។
មកដល់លើ​វេទិកា​​​វិញ​​​ លោក សម រង្ស៊ី បាន​​​ប្រៀប​​​ធៀប​​​រដ្ឋាភិបាល​​​បច្ចុប្បន្ន​​​ទៅ​​​នឹង​​​របប​​​ ប៉ុល ពត។

លោកបាន​​​ស្រែក​​​សួរ​​​ក្រុម​​​អ្នក​​​ចូល​​​រួម​​​ដែល​​​​​​មាន​​​ក្ដី​​​រំភើប​​​ថា “ម៉េច​​​បាន​​​ជា​​​ ហ៊ុន សែន ធ្វើ​​​បាប​​​ [ប្រជា​​​ពល​​​រដ្ឋ​​​] អ៊ីចឹង​​​? ម៉េច​​​បាន​​ជា​​​របប​​​ពុក​​​រលួយ​​​ធ្វើ​​​បាប​​​ប្រជា​​​ពល​​​រដ្ឋ​​​អ៊ីចឹង​​​? ហើយ​​​ម៉េច​​​បានជា​​​របប​​​ដែល​​​នាំ​​​ជន​​​អន្តោ​​​ប្រវេសន៍​​​ខុស​​​ច្បាប់​​​ចូល​​​ស្រុក​​​ខ្មែរ​​​ ធ្វើ​​​បាប​​​ប្រជាពល​​​រដ្ឋ​​​អ៊ីចឹង?។ វា​​​ពុំ​​​​​​ខុស​​​ពី​​​របប​​​ ប៉ុល ពត ទេ ហើយ​​​ឥឡូវ​​​វាបាន​​​​​​ឈាន​​​ដល់​​​ចំណុច​​​នោះ​​​ទៅ​​​ហើយ អ៊ីចឹង​​​ហើយ​​​បានជា​​​មាន​​​មនុស្ស​​​យ៉ាង​​​ច្រើន​​​​​​មក​​​ចូលរួម​​​ក្នុង​​​ការ​​​ធ្វើ​​​បាតុកម្ម​​​នេះ​​​”។

លោក កឹម សុខា បាន​​​ប្រាប់​​​ក្រុម​​​អ្នកចូល​​​រួម​​​ថា ពួកគេ​​​បាន​​​ធ្វើ​​​ខុស​​​ពីការ​​​រំពឹង​​​របស់​​​រដ្ឋា​​​ភិបាល​​​ ដោយ​​​បាន​​​បន្ត​​​មក​​​ចូល​​​រួម​​​ការ​​​តវ៉ា​​​ក្នុង​​​ចំនួន​​​រាប់​​​ម៉ឺន​​​នាក់​​​ ហើយ​​​លោក​​​បាន​​​អំពាវ​​​នាវ​​​ឲ្យមាន​​​អ្នក​​​គាំទ្រ​​​មក​​​ចូល​​​រួម​​​​​​ឲ្យ​​​បាន​​​កាន់​​​តែ​​​ច្រើន​​​ថែមទៀត​​​។ លោក​​​ថ្លែ​​​ង​​​ថា “យើង​​​បាន​​​បង្ហាញ​​​យ៉ាង​​​​​​​​​ច្បាស់​​​ថា ឆន្ទៈ​​​របស់​​​ប្រជា​​​ពល​​​រដ្ឋ​​​មិន​​​ធ្លាក់​​​​​​ចុះ​​​ទេ​​​។ បង​​​ប្អូន​​​ដឹង​​​ថា គណបក្ស​​​ប្រជា​ជន​​​ និង​​​​​​រដ្ឋាភិបាល​​​ខុស​​​ច្បាប់​​​របស់​​​ពួកគេ​​​បាន​​​​​​និយាយ​​​ថា ឲ្យ​​​យើង​​​ធ្វើ​​​ [បាតុកម្ម​​​] ទៅ​​​ គ្មាន​​​អ្នក​​​ណា​មក​​​​ចូលរួម​​​ទេ ប៉ុន្តែ​​​ឥឡូវដូច​​​​​​បង​​​ប្អូន​​​បាន​​​ឃើញ​​​​​​​​​​​​ស្រាប់​​​ហើយ​​​”។

លោក​​​បាន​​​បញ្ជាក់​​​សាជា​​​ថ្មី​​​អំពី​​​លក្ខ​​​ខណ្ឌ​​​របស់​​​គណបក្ស​​​​​​ប្រឆាំង​​​ ដោយ​​​បាន​​​ថ្លែង​​​ថា “យើង​​​ចង់​​​ឲ្យ​​​មាន​​​ការ​​​បោះឆ្នោត​​​ឡើង​​​​​​​​​​​​វិញ ប៉ុន្តែ​​​បើ​​​មិនអាច​​​ទេ អ៊ីចឹង​​​សូ​​​ម​​​ចុះ​​​ចេញ​​​​​​ទៅ​​​” ដែលការ​​​ថ្លែង​​​បែប​​​នេះ​​​បាន​​​ទទួល​​​​​​​​​សំឡេង​​​​​​​​​​​​ហ៊ោកញ្ច្រៀវ​​​​​​យ៉ាង​​​កង​​​រំពង​​​ រួច​​​លោក​​​បាន​​​បន្ត​​​ថា “យើង​​​មិន​​​អាច​​​នៅ​​​ស្ងៀម​​បាន​​​ទេ​​​ យើង​​​មិនអាច​​​ឈប់ធ្វើ​​​បាតុកម្មបានទេ ដរាប​​​ណា​​​យើង​​​ពុំ​​​​​​ទាន់​​​បានទទួល​​​យុត្តិធម៌ទេនោះ”។

អ្នកស្រី​​​ ឈួន កុំ ដែល​​​ធ្វើ​​​ដំណើរ​​​ពី​​​ខេត្ត​​​​​​​​​កណ្ដាល​​​​​​មកចូល​​​រួម​​​ក្នុង​​​ការ​​​ធ្វើ​​​បាតុកម្ម​​​នៅ​​​សប្ដាហ៍នេះ​​​​​​ បាននិយាយ​​​ថា ខ្លួន​​​គ្មាន​​​បំណង​​​ឈប់​​​ធ្វើ​​​បាតុកម្ម​​​ទេ​​​។ អ្នក​​ស្រី​​​​បាន​​​និយាយ​​​ថា “គាត់​​​ [លោក​​​ ហ៊ុន សែន] កំពុង​​​ដឹកនាំ​​​ប្រទេស​​​ដោយ​​​មិន​​​បាន​​​ធ្វើ​​​ឲ្យ​​​​​​អ្វី​​​ប្រសើរ​​​ឡើង​​​ទេ​​​។ ប្អូន​​​ឃើញ​​​ស្រាប់​​​ហើយ​​​​​​​​​ថា បច្ចុប្បន្ន​​​នេះ​​​មាន​​​អំពើ​​​ពុក​​​រលួយ​​​ និង​​​ការ​​​កាប់បំផ្លាញ​​​ព្រៃ​​​ឈើ​​​ដល់​​​កម្រិត​​​ណា​​​។ ​​​ខ្ញុំ​​​គិត​​​ថា ក្រុមអ្នក​​​តវ៉ា​​​មាន​​​ភាព​​​នឿ​​​យ​​​ហត់​​​បន្តិច​​​មែន​​​ ប៉ុន្តែ​​​ពួកគេ​​​នៅតែ​​​បន្ត​​​​​​មក​​​ធ្វើ​​​​​​បាតុ​​​កម្ម​​​ ព្រោះ​​​យើង​​​ចង់​​​ឲ្យ​​​មាន​​​ការ​​​ផ្លាស់​​​ប្ដូរ​​​អ្នក​​​ដឹកនាំ​​​”៕ សុធា

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស