ក្នុងសប្តាហ៍នេះ ក្រសួងការងារ និងបណ្តុះបណ្តាលវិជ្ជាជីវៈបានចេញសារាចរណែនាំថ្មីប្រាំបី ដើម្បីដាក់បញត្តិទៅលើដំណើរការនៃការបញ្ជូនប្រជាជនខ្មែរទៅធ្វើការនៅក្រៅប្រទេស ក៏ប៉ុន្តែនៅតែមានមន្ទិលអំពីប្រសិទ្ធភាពក្នុងការការពារពលករទេសន្តរប្រវេសន៍។
សារាចរណែនាំថ្មីទាំងនេះ កំណត់ស្តង់ដារនៃកិច្ចសន្យា និងការបណ្តុះបណ្តាលពលករទេសន្តរប្រវេសន៍ ផ្តល់នូវបណ្តាញផ្លូវការសម្រាប់ពលករដែលត្រូវបានរំលោភបំពានដាក់ពាក្យបណ្តឹង ក៏ប៉ុន្តែ មិនបានធានាឲ្យបានពេញលេញថា ពលករពិតជាត្រូវបានការពារមែន នេះបើយោងតាមប្រសាសន៍របស់លោក សឹុម ហុង អនុប្រធាននាយកដ្ឋានមុខរបប និងហត្ថពលកម្ម នៃក្រសួងការងារ និងបណ្តុះបណ្តាលវិជ្ជាជីវៈ។
លោកបានមានប្រសាសន៍នៅក្នុងសិក្ខាសាលាស្តីពីការធ្វើចំណាកស្រុក និងពលករក្នុងស្រុកថា “ប្រសិនបើយើងចង់លែងឲ្យមានបញ្ហាពលករទេសន្តរប្រវេសន៍…វាមិនគ្រប់គ្រាន់ទេ”។ លោកបានបន្ថែមថា ក្រសួងការងារ និងបណ្តុះបណ្តាលវិជ្ជាជីវៈកំពុងធ្វើការជាមួយអង្គការសហប្រជាជាតិ លើសារាចរណែនាំប្រាំបីផ្សេងទៀត។
សារាចរថ្មី និងអនុក្រឹត្យលេខ១៩០មានគោលបំណងដាក់បញត្តិលើទីភ្នាក់ងារជ្រើសរើសពលករទេសន្តរប្រវេសន៍ ដែលប្រឈមនឹងការចោទប្រកាន់ថា រំលោភបំពានក្នុងកម្រិតធ្ងន់លើពលករនាពេលកន្លងមក។ ទោះបីជាសារាចរទាំងនេះ តម្រូវឲ្យទីភ្នាក់ងារជ្រើសរើសពលករតម្កល់ប្រាក់ធានា១០០.០០០ដុល្លារ ក៏ដោយ ក៏ទីភ្នាក់ងារទាំងនោះផ្តល់កិច្ចការពារបន្តិចបន្តួចដល់ពលករនៅពេលពួកគេទៅដល់ប្រទេសគោលដៅ។
កាលពីខែ តុលា ឆ្នាំ២០១១ លោកនាយករដ្ឋមន្ត្រី ហ៊ុន សែន បានផ្អាកសកម្មភាពបញ្ជូនស្ត្រីខ្មែរឲ្យទៅធ្វើការជាស្ត្រីបម្រើតាមផ្ទះនៅប្រទេសម៉ាឡេស៊ីបន្ទាប់ពីមានសេចក្តីរាយកាណ៍ជាច្រើនអំពីករណីរំលោភបំពានរាងកាយ និងការកេងប្រវ័ញ្ចពលករទេសន្តរប្រវេសន៍ពីសំណាក់និយោជកបរទេសរបស់ពួកគេ និងទីភ្នាក់ងារជ្រើសរើសពលករនៅប្រទេសកម្ពុជា។
កាលពីខែវិច្ឆិកា រដ្ឋាភិបាលកម្ពុជា និងរដ្ឋាភិបាលម៉ាឡេស៊ី បានឯកភាពគ្នាថា នឹងលែងផ្អាកសកម្មភាពបញ្ជូនស្ត្រីខ្មែរឲ្យទៅធ្វើការជាស្ត្រីបម្រើតាមផ្ទះនៅប្រទេសម៉ាឡេស៊ីនៅខែកុម្ភៈ ឆ្នាំក្រោយ។
កាលពីម្សិលមិញ លោកស្រី ជេណា ហូលីដេ (Jenna Holliday) អ្នកឯកទេសផ្នែករៀបចំផែនការជាយុទ្ធសាស្ត្រ និងទំនាក់ទំនង នៅអង្គការស្ត្រីសហប្រជាជាតិ (UN Women) បានអំពាវនាវឲ្យប្រទេសកម្ពុជាផ្តល់សច្ចាប័នចំពោះអនុសញ្ញាអង្គការសហប្រជាជាតិពីរគឺអនុសញ្ញាស្តីពីការងារសមរម្យសម្រាប់ពលករក្នុងស្រុក និងអនុសញ្ញាស្តីពីកិច្ចការពារពលករទេសន្តរប្រវេសន៍ និងគ្រួសាររបស់ពួកគេ ដើម្បីបញ្ជូនសារទៅប្រទេសផ្សេងៗដែលទទួលពលករខ្មែរ។
លោកស្រីបានមានប្រសាសន៍ថា “វាគឺជាសេចក្តីថ្លែងការណ៍ដ៏សំខាន់មួយ នៅពេលរដ្ឋាភិបាលលើកឡើងថា នេះគឺជារបៀបការពារ និងឲ្យតម្លៃពលកររបស់យើង ហើយយើងរំពឹងថា អ្នកនឹងធ្វើដូចយើងដែរ”។ លោកស្រី ហូលីដេ បានមានប្រសាសន៍បន្តទៀតថា “ប្រសិនបើប្រទេសបញ្ជូនសារសំខាន់ៗរួមមានប្រទេសឥណ្ឌូណេស៊ី បង់ក្លាដែស ហ្វីលីពីន និងប្រទេសកម្ពុជា សុទ្ធតែត្រូវផ្តល់សច្ចាប័ន នោះការធ្វើបែបនេះនឹងផ្តល់អំណាចដល់ប្រទេសទាំងនេះក្នុងការទាមទារឲ្យមានការឲ្យតម្លៃប្រសើរជាងមុន[ចំពោះពលកររបស់ប្រទេសទាំងនេះដែលស្ថិតនៅក្រៅប្រទេស]”។ លោកស្រីបានមានប្រសាសន៍ទៀតថា “ប្រកាសថ្មីៗទាំងនេះមិនបានដាក់សម្ពាធទៅលើប្រទេសផ្សេងៗទៀតឲ្យ [ឲ្យតម្លៃដល់ពលករឲ្យបានសមស្រប]ទេ”៕សុធា