តំណាងសហជីព២២បានឯកភាពគ្នាកាល ពីម្សិលមិញថា នឹងលើកសំណើសុំឲ្យមានការដំឡើងប្រាក់ឈ្នួលអប្បបរមាទ្វេដងនៅក្នុងវិស័យកាត់ដេររបស់ប្រទេសកម្ពុជានៅពេលរដ្ឋាភិបាលដំឡើងប្រាក់ឈ្នួលប្រចាំខែនៅឆ្នាំក្រោយ។
បន្ទាប់ពីកិច្ចប្រជុំរៀបចំនៅការិយាល័យសហព័ន្ធសហជីពអន្តរជាតិ អ៊ីនដាសទ្រី អល (IndustriAll) នៅប្រទេសកម្ពុជា មេដឹកនាំសហជីពនានាបានឲ្យដឹងថា ពួកគេទាំងអស់គ្នាគាំទ្រការដំឡើងប្រាក់ឈ្នួលអប្បបរមាពី៨០ដុល្លារដល់១៦០ដុល្លារ ដោយមិនបូកបញ្ជូលប្រាក់បន្ថែមម៉ោង ឬក៏អត្ថប្រយោជន៍ផ្សេងៗទៀតទេ។
ក្រសួងការងារ និងបណ្តុះបណ្តាលវិជ្ជា ជីវៈ បានប្រកាសកាលពីថ្ងៃច័ន្ទថា រដ្ឋាភិបាលមានផែនការដំឡើងប្រាក់ឈ្នួលអប្បបរមាដល់១៦០ដុល្លារក្នុងឆ្នាំ២០១៨ ក៏ប៉ុន្តែ បានស្នើឲ្យមេដឹកនាំសហជីព និងនិយោជកពិភាក្សា គ្នាថា តើគួរដំឡើងប្រាក់ឈ្នួលក្នុងរយៈពេល ៥ឆ្នាំខាងមុខឲ្យឡើងដល់ចំនួននេះដោយរបៀបណា។
លោក ស៊ាង យ៉ូត មន្ត្រីផ្នែកច្បាប់សម្ព័ន្ធសហព័ន្ធប្រជាធិបតេយ្យកម្មករកាត់ដេរកម្ពុជាបានលើកឡើងថា តួលេខប្រាក់ឈ្នួលរបស់សហជីពឆ្លុះបញ្ចាំងឲ្យឃើញការចំណាយក្នុងការរស់នៅជាក់ស្តែងរបស់កម្មកររោងចក្រកាត់ដេរ។
លោក គឹម ចាន់សំណាង អគ្គលេខាធិការរងសហព័ន្ធសហជីពកម្មករកម្ពុជាបានលើកឡើងថា សំណើនេះនឹងត្រូវពិភាក្សានៅក្នុង កិច្ចប្រជុំរបស់ក្រុមប្រឹក្សាការងារ ដែលជាស្ថាប័នមួយមានសមាសភាពចូលរួមពីសហជីព និយោជក និងរដ្ឋាភិបាល ហើយកិច្ចប្រជុំនេះគ្រោងនឹងប្រព្រឹត្តទៅនៅថ្ងៃទី២៤ខែធ្នូ ។ ម្ចាស់រោងចក្របានរៀបចំកិច្ចប្រជុំផ្ទាល់ខ្លួនកាលពីថ្ងៃអាទិត្យសប្តាហ៍មុន និងបានស្នើផែនការដំឡើងប្រាក់ឈ្នួលដល់១៣០ដុល្លារក្នុងឆ្នាំ២០១៨ ដោយដំឡើងតាមកម្រិតក្នុងមួយឆ្នាំៗ៕ សុធា