29 C
Phnom Penh

សីតុណ្ហភាព​នៅ​បណ្ដា​ខេត្ត​ភាគ​ខាង​ជើង​​​ប្រទេស​​​​ធ្លាក់​ចុះដល់​១១​អង្សា​ ធ្វើ​ឲ្យ​ត្រជាក់​​​​​​​ខ្លាំង​

ដោយ ឌឹ ខេមបូឌា ដេលី

បទវិភាគ

ក្រសួង​ធន​ធាន​ទឹក​ និង​ឧតុនិយម​បាន​​​ឲ្យ​​​​ដឹង​​​​ថា សីតុណ្ហភាព​​បាន​ធ្លាក់​ចុះ​ដល់​១​១​អង្សា​​​​​នៅ​ខេត្ត​ភាគ​ខាង​ជើង​ប្រទេស​​​កម្ពុជា​ កាល​ពីម្សិលមិញ​ ធ្វើឲ្យ​​​​ត្រជាក់ខ្លាំង​​​ដូច​​​​​​ការ​​​​ព្យាករ​កាល​​​ពី​​​​ប៉ុន្មាន​​​សប្ដាហ៍មុន​​​​នេះ​​​។

យោង​តាម​លោក អ៊ុំ រីណា ប្រធាន​នាយក​​​ដ្ឋាន​ឧតុនិយម​​នៅ​ក្រសួង​នេះ​បាន​ឲ្យ​ដឹង​ថា សីតុណ្ហភាព​ក្នុង​រាជធានីភ្នំពេញ បាន​ធ្លាក់​ចុះ​ដល់​១៩​,៥​អង្សា​កាលពីម្សិលមិញ ហើយ​រំពឹង​ថា នឹង​ធ្លាក់​ចុះ​បន្ថែមទៀត​ដល់​១៨,៥​អង្សា​​នៅ​ថ្ងៃ​នេះ។ លោក អ៊ុំ រីណា ​បានមាន​ប្រសាសន៍​ថា នៅ​​ខេត្ត​​ព្រះវិហារ​ សីតុណ្ហភាព​ត្រជាក់​នៅ​តំបន់​ភ្នំធ្លាក់​​​ដល់​១១​អង្សា​កាលពីព្រឹក​ម្សិលមិញ​។

លោក​បាន​មាន​ប្រសាសន៍​ថា “ឥឡូវ​នេះ​​យើង​បារម្ភ​ថា អ្នក​ដែល​រស់​នៅ​តាម​តំបន់​ភ្នំនឹង​រង​ផល​ប៉ះពាល់​ដោយអាកាស​ធាតុ​ត្រជាក់នេះ​”។​​​លោក​បាន​បន្ថែមថា រហូត​មក​ដល់​ពេល​​នេះ​​​​​​​មិន​​​ទាន់​​​មាន​​​សេចក្តី​​​រាយ​​​ការណ៍អំ​​​ពី​បញ្ហា​​សុខភាព​ដោយ​​​សារ​អាកាស​ធាតុ​ត្រជាក់​​​​​នេះ​​នៅឡើយទេ។

លោក លី ច័ន្ទតារា អនុប្រធាន​បញ្ជាការ​កណ្ដាល​នៃ​កង​យោធពល​ខេមរភូមិន្ទ​បាន​មាន​​ប្រសាសន៍​ថា ទាហាន​ដែល​ឈរ​ជើង​នៅ​ប្រាសាទ​ព្រះវិហារ​តាម​ជួរ​ភ្នំដង​រែក បាន​​​ពាក់អាវច្រើន​​ជាន់ដើម្បី​​​​ការ​ពារ​អាកាស​ធាតុ​ត្រជាក់​នេះ។ លោក​មាន​ប្រសាសន៍​ថា “វា​ត្រជាក់ខ្លាំង​​​​​ចាប់ពីពាក់​កណ្ដាល​យប់​រហូត​ដល់​ព្រឹក​” ថ្ងៃអង្គារ​។ ប៉ុន្តែ​មិនមាន​ទាហាន​ណា​ម្នាក់​ធ្លាក់ខ្លួនឈឺទេ ពីព្រោះសម្តេច​​​​ [​នាយក​​រដ្ឋ​មន្ត្រី] ហ៊ុន សែន បានចែក​អាវ​រងា​​ ភួយ​ដើម្បី​ការ​ពារ​អាកាស​ធាតុ​ត្រជាក់​ ហើយ​យើង​អាច​ប្រើ​ប្រាស់​មន្ទីរ​​​ពេទ្យ​​​​ក្នុង​តំបន់​ដើម្បី​ព្យាបាល​”។

ក្រៅពី​ខេត្ត​ព្រះវិហារ ខេត្ត​មណ្ឌល​គិរី ក៏ត្រជាក់​ផង​ដែរ ដោយ​សីតុណ្ហភាព​នៅ​ទី​នោះ​បាន​ធ្លាក់ចុះចន្លោះ​ពី​​​១៣​អង្សាដល់១៤​អង្សា​​​​នៅ​យប់ថ្ងៃ​អង្គារ​។ លោក ឡឹក សុវណ្ណរ័ត្ន ប្រធាន​ការិយា​ល័យ​​បច្ចេកទេស​​មន្ទីរ​សុខាភិបាល​ខេត្ត​បាន​មាន​​ប្រសាសន៍​ថា “ឥឡូវ​នេះ​​នៅ​ក្នុង​ខេត្ត​មណ្ឌល​គិរី​​ត្រជាក់​ណាស់ ហើយ​អំឡុង​​​ពេល​​​​អាកាស​ធាតុ​ត្រជាក់នេះ​មនុស្ស​អាច​ធ្លាក់​ខ្លួន​ឈឺ​ ដូច្នេះ​យើង​​​​កំពុង​​​​យក​ចិត្ត​ទុក​ដាក់​ចំពោះ​បញ្ហា​នេះ​”។

នៅ​ក្នុង​រាជធានីភ្នំពេញ​ឯណេះ​​​​វិញ អ្នក​គាំទ្រ​គណបក្ស​សង្គ្រោះជាតិ​ដែលបាន​​​​​បោះ​តង់​ស្នាក់​នៅ​ទីលាន​ប្រជា​ធិបតេយ្យ​បាន​និយាយ​ថា អាកាស​ធាតុ​ត្រជាក់​នេះ​មិនអាច​ធ្វើ​​​​ឲ្យ​ពួកគាត់​រួញ​រាឡើយ​។

អ្នកស្រី​ ស៊ុត ស៊ីយ៉ាន អាយុ​៥៤​ឆ្នាំ​ដែល​ធ្វើ​ដំណើរ​មក​ពីខេត្ត​កោះកុង មក​ស្នាក់​នៅ​ក្នុង​​​​ទីលាន​ប្រជា​ធិបតេយ្យនេះ​បា​ននិយាយ​ថា ​​​អាកាស​​​ធាតុ​​​ត្រជាក់​​​​​​នេះ​​​មិន​​​ធ្វើ​​​ឲ្យ​​​​ប៉ះ​​​ពាល់​​​​ដល់ការ​តវា៉​របស់​យើង​ទេ” ។ អ្នកស្រី​បាននិយាយ​ថា “ខ្ញុំនឹង​នៅ​​ទីនេះ​ដើម្បី​ទាម​ទារ​សន្លឹក​​ឆ្នោត​របស់​យើង ​ទោះបី​​​ជា​​​អាកាស​ធាតុ​ចុះត្រជាក់​ដូច​យប់​មិញ ហើយ​​​​​វាបន្ត​​​​ត្រជាក់​ត​​​ទៅទៀតក៏ដោយ​”។

អ្នក​តវ៉ា​ម្នាក់ទៀត​ឈ្មោះ មាឃ សារាយ អាយុ​៥៣​ឆ្នាំ​មកពីខេត្ត​ព្រៃ​វែង បាននិយាយ​ថា គាត់​បាន​ត្រៀម​ខ្លួនរួច​រាល់​ហើយ។ លោក​បាននិយាយ​ថា យើង​មិន​ខ្លាច​​​ប្រឈម​​​នឹង​​​​​អាកាស​ធាតុ​ត្រជាក់​នេះទេ ពីព្រោះ​យើង​បាន​​​យក​​​អា​វ​រងា​ មួក និង​ស្រោម​ដៃ​​​មក​​​ជា​​​មួយ​​​​​រួច​​​ហើយ​​​”៕ សារុន​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស