កាលពីម្សិលមិញ សាលាឧទ្ធរណ៍បានកាត់បន្ថយទោសជនជាតិចិនម្នាក់ដែលត្រូវបានកាត់ឲ្យជាប់ទោសពីបទព្យាយាមបើកប្រាក់តាមមូលប្បទានបត្រក្លែងក្លាយដែលមានទឹកប្រាក់ចំនួន៦៥០.០០០ដុល្លារ នៅធនាគារ UCB រីឯមនុស្សបីនាក់ទៀតដែលជាប់ពាក់ព័ន្ធនៅក្នុងរឿងនេះត្រូវបានលើកលែងការចោទប្រកាន់ទាំងអស់គ្នាបន្ទាប់ពីធនាគារនេះបានដកពាក្យបណ្ដឹងដែលខ្លួនបានប្ដឹងពួកគេ។
លោក ឆាយ ច័ន្ទតារាវណ្ណ ចៅក្រមប្រធានក្រុមប្រឹក្សាជំនុំជម្រះបានមានប្រសាសន៍ថា លោកបានសម្រេចបន្ធូរបន្ថយទោសឲ្យឈ្មោះ សាម ហៃ វ៉ុង ពីពីរឆ្នាំមកមួយឆ្នាំ និងប្រាំពីរខែវិញ និងសម្រេចឲ្យជនជាតិចិនបីនាក់ទៀតដែលត្រូវបានផ្ដន្ទាទោសកាលពីខែមេសាឲ្យជាប់ពន្ធនាគារពីរឆ្នាំដែរនោះរួចផុតពីការចោទប្រកាន់ទាំងស្រុង។
បុរសបួននាក់ត្រូវបានចាប់ខ្លួនបន្ទាប់ពីលោក សាម ដែលជាប្រធានក្រុមហ៊ុនលក់ប្រអប់កាតុង និងទំនិញធ្វើពីក្រដាសផ្សេងៗទៀត បានទៅបើកប្រាក់នៅធនាគារ UCB ដោយប្រើមូលប្បទានបត្រផ្សេងៗគ្នាចំនួន៣៩ដែលបុរសបីនាក់ផ្សេងទៀតបានចេញឲ្យគាត់បើកប្រាក់។
នៅពេលបើកសវនាការជំនុំជម្រះនៅសាលាឧទ្ធរណ៍កាលពីម្សិលមិញ លោក ចាប កែវ មេធាវីតំណាងឲ្យធនាគារ UCB បានស្នើសុំឲ្យចៅក្រមដកការចោទប្រកាន់ចំពោះបុរសទាំងបីនាក់នេះ ពីព្រោះពួកគេបានចរចារកដំណោះស្រាយជាមួយធនាគារ។ ប៉ុន្តែលោកបានស្នើកុំឲ្យមានការលើកលែងចំពោះលោក សាម។ លោកបានមានប្រសាសន៍ក្នុងតុលាការថា “សូមវិនិច្ឆ័យទោសលោក សាម ហៃ វ៉ុង ទៅតាមច្បាប់”៕គឹមហឿន