29 C
Phnom Penh

បុរស​ហូឡង់​ត្រូវ​ចាប់​ខ្លួន​ម្ដង​ទៀត​ពីបទ​បៀត​បៀន​កេរ្តិ៍​ភេទ​

ដោយ ឌឹ ខេមបូឌា ដេលី

បទវិភាគ

​កាលពីថ្ងៃ​ពុធ នគរ​បាល​ប្រឆាំង​ការ​ជួញ​ដូរ​មនុស្ស​ខេត្ត​សៀម​រាប បាន​ចាប់​ខ្លួនបុរស​ជន​ជាតិ​ហូឡង់ អាយុ​៤០​ឆ្នាំម្នាក់​ពីបទ​បៀត​បៀន​កេរ្តិ៍​​ភេទ​ក្មេង​ប្រុស​ពីរនាក់​នៅ​ក្នុង​ក្រុង​សៀម​រាប​។  លោក​ស្រី ដួង សុថារី នាយការិយាល័យ​នគរ​បាល​ប្រឆាំង​ការ​ជួូញដូរ​មនុស្ស​ខេត្ត​សៀម​រាប បាន​មាន​ប្រសាសន៍​​ថា នេះជា​លើក​ទី​២​ហើយ​ដែល​​​​​បុរស​ឈ្មោះ​ Sebastian Eugene Reuyl ត្រូវ​បាន​ចាប់​ខ្លួនពីបទ​ប្រព្រឹត្ត​អំពើ​អ​នា​​ចារលើ​កុមារ​។

លោកស្រី​បានមាន​​ប្រសាសន៍​ថា “ គាត់​ត្រូវ​​​បាន​ចោទ​ប្រកាន់ពីបទ​ប្រព្រឹត្ត​អំពើ​អនា​ចារ ហើយ​បាន​បញ្ជូន​គាត់ទៅ​ពន្ធនាគារ​ដើម្បីឃុំ​ខ្លួន​បណ្ដោះអាសន្ន​​”។

លោក​ស្រី​បាន​លើក​ឡើង​ទៀត​ថា ​បុរស​ឈ្មោះ​​ Sebastian Eugene Reuyl ដែលជា​អ្នក​ឯក​ទេស​ខាង​ព័ត៌វិទ្យា​ ត្រូវ​បាន​ចាប់​ខ្លួន​បន្ទាប់ពី​ឪពុក​ម្ដាយ​របស់​ក្មេង​ប្រុស​ទាំង​ពីរ​បាន​ប្ដឹង​នគរ​បាល​ថា ក្មេង​ប្រុស​ទាំង​ពីរ​ដែល​កើត​នៅ​​​​ឆ្នាំ​​២០០៧ និង​ឆ្នាំ​២០០៤ បាន​រង​ការ​បំពាន​ក្នុង​ម្នាក់​ៗ​ចំនួន​បីលើក​នៅ​ក្នុង​អាផាត​មឹន របស់​បុរស​ជន​ជាតិ​ហូឡង់​រូប​នេះ​​ក្នុង​សង្កាត់​ស្លក្រាម​នៅ​ឆ្នាំ​នេះ និង​នៅ​​ក្នុង​ឆ្នាំ​២០១២។

លោកស្រី​បានមាន​ប្រសាសន៍​ថា “ ក្មេង​ប្រុស​ទាំងពីរ​បានទៅ​រស់​នៅ​ជាមួយ​សាច់​ញាតិ​​ក្នុង​ខេត្ត​ឧត្តរមានជ័យ​ ហើយ​មិន​បាន​ត្រឡប់​មក​វិញ​ទេ” ។ លោកស្រី​លើក​ឡើង​បន្ត​ថា ក្មេង​ប្រុស​ទាំងពីរ​នេះ​បាន​ប្រាប់ម្ដាយ​របស់​ខ្លួន​​​ថា ពួកគេ​ភ័យ​ខ្លាច​រង​ការ​បំពាន​ម្ដង​ទៀត​។

កាលពីឆ្នាំមុន​បុរស​រូប​នេះ​ត្រូវបាន​សម្រេច​ឲ្យរ​ួច​ផុត​ពី​ការ​ចោទ​ប្រកាន់ពីបទ​បៀត​បៀន​កេរ្តិ៍ភេទ​ក្មេង​​ប្រុស​បួន​នាក់​ និង​ក្មេង​ស្រីម្នាក់​ដែល​មាន​អាយុ​ចន្លោះពី​៧ឆ្នាំ​ដល់​១៣​ឆ្នាំ ដោយ​​សារតែ​ខ្វះភ័ស្តុតាង​។ កាលពី​មុន​គាត​់​ធ្លាប់​ត្រូវ​បាន​តុលាការ​កាត់​សេចក្ដី​ឲ្យ​ជាប់​ទោស​ពីបទ​បំពាន​ផ្លូវ​ភេទ​លើ​ក្មេង​​ប្រុស​ម្នាក់​នៅ​ក្នុង​ប្រទេស​ហូឡង់​៕ សុខុម​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស