សាលាឧទ្ធរណ៍បានប្រកាសកាលពីម្សិលមិញថា ខ្លួននឹងបើកសវនាការសម្រាប់រឿងក្តីធ្វើបត្យាប័នលើមហាសេដ្ឋីជនជាតិរុស្ស៊ីឈ្មោះ សេរហ្គេ ប៉ូឡុនស្គី (Sergei Polonsky) នៅថ្ងៃទី៣១ ខែធ្នូខាងមុខ ខណៈដែលករណីចោទប្រកាន់ពីបទបង្ករបួសស្នាមដោយឡែកមួយផ្សេងទៀតទៅលើជនឈ្មោះ ប៉ូឡុនស្គី និងត្រូវបានបើកសវនាការនៅសាលាដំបូងខេត្តព្រះសីហនុ នៅដំណាច់ខែមករា។
ឈ្មោះ ប៉ូឡុនស្គី ត្រូវបានចាប់ខ្លួនកាលពីថ្ងៃទី១១ ខែវិច្ឆិកា តាមសំណើរបស់អាជ្ញាធររុស្ស៊ី ។ នៅប្រទេសរុស្ស៊ី ជននេះប្រឈមនឹងការចោទប្រកាន់ពីបទលួចបន្លំប្រាក់ប្រហែល១៧៦លានដុល្លារ ពីវិនិយោគិន នៅក្នុងគម្រោងអភិវឌ្ឍន៍លំនៅដ្ឋានមួយដែលមិនទាន់បានបញ្ចប់នៅឡើយ។
លោក សេង សីុវុត្ថា អនុប្រធានសាលាឧទ្ធរណ៍បានមានប្រសាសន៍ថា “ យើងនឹងពិភាក្សាថា តើយើងនឹងធ្វើបត្យាប័នគាត់ ឬយ៉ាងណា ដោយសារតែអាជ្ញាធររុស្ស៊ី បានស្នើឲ្យមានការធ្វើបត្យាប័នគាត់ទៅប្រទេសរុស្ស៊ីវិញ”។
កាលពីខែមករា សាលាដំបូងខេត្តព្រះសីហនុបានចោទប្រកាន់ឈ្មោះ ប៉ូឡុនស្គី ពីបទបង្ករបួសស្នាម បន្ទាប់ពីមានជម្លោះ ជាមួយអ្នករត់ទូកខ្មែរ ហើយជននេះបានជាប់ពន្ធនាគាររយៈពេលបីខែទើបត្រូវបានដោះលែងឲ្យនៅក្រៅឃុំ។
លោក ម៉ុង មុនីចរិយា ប្រធានសាលាដំបូង ខេត្តព្រះសីហនុ បានបញ្ជាក់ថា តុលាការនេះបានកំណត់យកខែមករា ប៉ុន្តែ បានបដិសេធមិនធ្វើអត្ថាធិប្បាយបន្ថែមទៀតទេ។
លោក ហ៊ូ ពុធវិសាល ប្រធានពន្ធនាគារ ប៉េហ្ស៊ី (PJ ) បានឲ្យដឹងថា អតីតមហាសេដ្ឋីជនជាតិរុស្ស៊ីដែលកំពុងជាប់ពន្ធនាគារនេះ មានសុខភាពល្អនៅឡើយ៕ សុធា