លោក ទៀ បាញ់ រដ្ឋមន្ត្រីក្រសួងការពារជាតិ បានមានប្រសាសន៍កាលពីម្សិលមិញ ដើម្បីវាយប្រហារជាលើកទី២ ទៅលើគណបក្សប្រឆាំងនៅក្នុងរយៈពេលបុ៉ន្មានសប្ដាហ៍មកនេះថា គណបក្សសង្គ្រោះជាតិគួរបញ្ឈប់ការធ្វើពហិការមិនចូលរួមប្រជុំសភារយៈពេលបីខែរបស់ខ្លួនទៅ ហើយគួរតែគោរពច្បាប់ និងបទបញ្ជា។
ថ្លែងទៅកាន់អ្នកយកព័ត៌មាននៅខាងក្រៅសិកា្ខសាលាស្ដីពីជនពិការនៅក្នុងរាជធានីភ្នំពេញ លោកឧត្តមសេនីយ៍ ទៀ បាញ់ បានមានប្រសាសន៍ថា ការតវ៉ារាល់ថ្ងៃរបស់គណបក្សសង្គ្រោះជាតិប្រឆាំងនឹងការដឹកនាំរបស់លោកនាយករដ្ឋមន្ត្រី ហ៊ុន សែន គ្មានអ្វីក្រៅពី “ ការកម្សាន្ត” ទេ ។
លោកឧត្តមសេនីយ៍ ទៀ បាញ់ បានមានប្រសាសន៍ថា “ នៅសល់ពីរបីថ្ងៃទៀត គ្រប់បីខែហើយ ចាប់តាំងពីពួកគេធ្វើពហិការមិនចូលប្រជុំសភា បន្ទាប់ពីការបោះឆ្នោត” ហើយកាលពីសប្ដាហ៍មុនលោកបានប្រាប់ទាហានឲ្យស្វែងយល់អំពីប្រវត្តិសាស្ត្រខ្មែរ កុំចេះតែជឿតាម “ ការឃោសនា” បំបែកបំបាក់របស់គណបក្សប្រឆាំង ដែលលោកបានអះអាងថា អាចនាំឲ្យមានសង្គ្រាម។
លោកបានមានប្រសាសន៍ថា “ ខ្ញុំគិតថាប្រជាពលរដ្ឋបានបោះឆ្នោតឲ្យពួកគេបម្រើការងារ ចូលប្រជុំក្នុងសភាជាមួយយើងដើម្បីធ្វើការបម្រើប្រទេសជាតិ”។
សមាជិកសភាទាំង៥៥រូបរបស់គណបក្សសង្គ្រោះជាតិបានបដិសេធមិនចូលប្រជុំសភាដើម្បីតវ៉ានឹងលទ្ធផលនៃការបោះឆ្នោតជាតិកាលពីខែកក្កដា ដែលពោរពេញដោយភាពមិនប្រក្រតី ដែលធ្វើឲ្យគណបក្សប្រជាជនកម្ពុជារបស់លោក ហុ៊ន សែន ឈ្នះឆ្នោត។
លោកឧត្តមសេនីយ៍ ទៀ បាញ់ បានមានប្រសាសន៍ថា “ តើប្រជាពលរដ្ឋបោះឆ្នោតឲ្យអស់លោកតវ៉ានៅតាមផ្លូវឬ?” ។
លោកមានប្រសាសន៍ថា “ តើមានអ្នកបោះឆ្នោតប៉ុន្មាននាក់ចង់ឲ្យអស់លោកធ្វើអ៊ីចឹង? ពួកគាត់បានបោះឆ្នោតឲ្យពួកគេធ្វើការ ពិភាក្សា និងដោះស្រាយបញ្ហាប្រទេសជាតិនៅក្នុងសភា”។
លោកបានមានប្រសាសន៍ថា “មហិច្ឆតារបស់ពួកគេ គឺធ្វើអ្វីៗតាមតែពួកគេចង់ ប៉ុន្តែពួកគេត្រូវតែគិតផង។គ្រប់ប្រទេសទាំងអស់មានច្បាប់ និងនីតិវិធី។ អស់លោកមិនអាចធ្វើអ្វីដើម្បីសម្រេចតែមហិច្ឆតារបស់ខ្លួនឡើយ។ មហិច្ឆតាទាំងនេះប្រហែលជាមិនត្រឹមត្រូវ ឬប្រហែលជាមិនស្របតាមពេលវេលារបស់ពួកគេឡើយ។
លោកស្រី ជូ ឡុងសូមួរ៉ា សមាជិកសភាជាប់ឆ្នោតរបស់គណបក្សសង្គ្រោះជាតិ ជាភរិយារបស់លោក សម រង្ស៊ី ប្រធានគណបក្សសង្គ្រោះជាតិ បានមានប្រសាសន៍ថា គណបក្សសង្គ្រោះជាតិមិនធ្វើអ្វីក្រៅពីស្ដាប់ និងឆ្លើយតបទៅនឹងកង្វល់របស់ម្ចាស់ឆ្នោតឡើយ ហើយថា គណបក្សប្រជាជនកម្ពុជាអាចទទួលបានផលប្រយោជន៍ពីការធ្វើរឿងដូចគ្នានេះដែរគឺ៖ ស្ដាប់ប្រជាពលរដ្ឋ។
លោកស្រីបានមានប្រសាសន៍ថា “ យើងជាតំណាងរបស់ប្រជាពលរដ្ឋ ហើយយើងត្រូវតំណាងឲ្យម្ចាស់ឆ្នោតរបស់យើង”។
លោកស្រីបានមានប្រសាសន៍បន្ថែមទៀតថា “ ខ្ញុំគិតថា ភារកិច្ចសំខាន់របស់ខ្ញុំគឺតំណាងឲ្យម្ចាស់ឆ្នោតរបស់ខ្ញុំ។ ប្រសិនបើម្ចាស់ឆ្នោតរបស់ខ្ញុំនិយាយថា ‘ កុំទទួលយកអាសនៈសភា ទាល់តែមានការស៊ើបអង្កេតពីភាពមិនប្រក្រតីពាក់ព័ន្ធនឹងការបោះឆ្នោតឲ្យបានត្រឹមត្រូវសិន’ ខ្ញុំគោរពម្ចាស់ឆ្នោតរបស់ខ្ញុំ”៕ សារុន
(រាយការណ៍បន្ថែមដោយ Lauren Crothers)