28 C
Phnom Penh

ការ​រឹបអូស​គ្រឿង​ញៀន​និង​ការ​ចាប់​ខ្លួន​មនុស្ស​ពាក់​ព័ន្ធ​​នឹង​គ្រឿង​ញៀន​​កើន​ឡើង​ក្នុង​ឆ្នាំ២០១៣

ដោយ ឌឹ ខេមបូឌា ដេលី

បទវិភាគ

យោ​ងតាម​របាយការណ៍​​របស់​អាជ្ញាធរ​ជាតិ​ប្រយុទ្ធ​ប្រឆាំង​គ្រឿង​ញៀន​ដែល​​ទទួល​បានកាលពីម្សិលមិញ​ឲ្យ​ដឹង​ថា ករណី​​រឹប​អូស​គ្រឿង​ញៀន​និង​ការ​ចាប់​ខ្លួន​មនុស្ស​ដែល​ជាប់​ពាក់ព័ន្ធ​គ្រឿង​ញៀន​បាន​កើន​ឡើ​ង​ក្នុង​រយៈពេល​៩​ខែ​​​ដំបូង​នៃ​​​ឆ្នាំ​នេះ បើ​ប្រៀប​ធៀបនឹង​​រយៈ​ពេល​ដូច​គ្នា​កាលពីឆ្នាំមុន​។ 
របាយការណ៍​ដែល​មិនទាន់​ត្រូវ​​បាន​ផ្សព្វ​ផ្សាយ​ជា​សាធារណៈ​នេះ​បង្ហាញ​ថា ការ​ចាប់​ហេរ៉ូអុីន​ មេតំហ្វេតាមីន កេតាមីន និង​កញ្ឆា បាន​កើន​ឡើង​នៅ​កម្ពុជា​។ យោង​តាម​របាយកាណ៍​នេះ​បង្ហាញ​ថា នគរ​បាល​ក្រសួ​ង​មហាផ្ទៃ​បាន​ដោះ​ស្រាយ​ករណី​ពាក់​ព័ន្ធ​គ្រឿង​ញៀន​៦៨០​ករណី​​​ក្នុង​រយៈ​ពេល​ប្រាំបួន​ខែ​ដំបូង​នេះ គឺ​កើន​ឡើង​ពី​៥៩៣​​​​​ករណី​កាលពីឆ្នាំមុន​។ ក្នុង​ចំណោម​ករណី​​ទាំង​នោះ​​ អាជ្ញាធរ​ចាប់​ខ្លួន​​ជន​សង្ស័យ​បាន​១.៣០១​នាក់​ក្នុង​រយៈ​ពេល​ប្រាំបួនខែ​ដំបូង​នេះ​ គឺ​កើន​ឡើង​ពី​១.២៦៤​នាក់​ក្នុង​ឆ្នាំមុន​។

អាជ្ញាធរ​ជាតិ​ប្រយុទ្ធ​ប្រឆាំង​គ្រឿង​ញៀន​បាន​​ឲ្យ​ដឹង​ថា អ្នក​​ដែល​ត្រូវ​ចាប់​ខ្លួន​ពី​បទ​នាំ​គ្រឿ​ង​ញៀន​ទាំ​ង​នោះមក​ពី​ប្រទេស​កម្ពុជា វៀត​ណាម ឡាវ ថៃ ចិន នីហ្សេរីយ៉ា កូរ៉េខាង​ត្បូង អៀ​រឡង់ ​ប៉េរូ ឥណ្ឌា ឥណ្ឌូណេស៊ី និង​រ៉ូមា៉នី ហើយ​ពួក​គេ​ទាំង​អស់​ត្រូវ​បាន​បញ្ជូន​ទៅ​​​ឲ្យ​តុលា​ការ​​តាម​ច្បាប់​​រួច​ហើយ​។

នៅ​ក្នុង​រយៈ​ពេល​ប្រាំបួន​ខែ​ដំបូង​នៃ​ឆ្នាំ​នេះ​នគរ​បាល​ដក​ហូត​បាន​គ្រាប់​ថ្នាំ​មេតំហ្វេ​តាមីន​ចំនួន​១៩​គីឡូក្រាម គឺ​កើន​ឡើង​ពីជិត​ប្រាំ​បួនគីឡូក្រាមនៅ​ឆ្នាំ​២០១២ មេតំហ្វា​តាមីន​ទឹកកក​ចំនួន​២៦​គីឡូក្រាម បើ​ប្រៀប​ធៀប​ទៅនឹង​ឆ្នាំ​២០១១​មាន​ចំនួន​២០​គីឡូ​ក្រាម​ ហេរ៉ូអុីន​៩,៦គីឡូក្រាម គឺកើន​ឡើង​ពី​១៨២​ក្រាម​ ក្នុង​ឆ្នាំ​២០១២​ កេតាមីន​១គីឡូ​ក្រាម បើ​ប្រៀប​ធៀប​ទៅ​នឹ​ង​ឆ្នាំ​មុន​ គឺ​៨១៤​ក្រាម និង​កញ្ឆា​១៦៨​​គីឡូក្រាម គឺ​កើន​ឡើង​ពី​២,៤គីឡូក្រាម​​។

ទោះ​ជា​យ៉ាង​ណា​ ការ​ចាប់​កូកាអុីន​មាន​ការ​ធ្លាក់​ចុះ​ច្រើន គឺ​ធ្លាក់​ចុះពី​២៩​,៤​គីឡូ​ក្រាម​​នៅ​ក្នុង​រយៈពេល​ប្រាំបួន​ខែ​ដំបូង​នៃ​ឆ្នាំ​២០១២​ មក​ត្រឹម​៩,៦គីឡូក្រាម នៅ​ឆ្នាំ​នេះ​។

​របាយការណ៍​នេះ​បង្ហាញ​ថា “ ក្រុម​ជួញ​ដូរ​គ្រឿង​ញៀន​​បាន​ជួញ​ដូរ​គ្រឿង​ញៀន​ទាំង​នេះ​​នៅ​ទូទាំង​ប្រទេស​ ហើយ​យើង​ចាប់​​បាន​គ្រឿង​ញៀន​ខ្លះ​ដែល​នាំ​មកពី​​តំបន់​ត្រីកោណ​មាស​ [ភូមា ឡាវ និង​ថៃ] ចូ​ល​​ខេត្ត​នៅ​ភាគ​ខាង​ជើ​ង​នៃ​ប្រទេស​កម្ពុជា​”។

កាលពីថ្ងៃ​ពុធ ការិយាល័យ​អង្គការ​សហ​ប្រជា​ជាតិ​ទទួល​បន្ទុក​គ្រឿង​ញៀន និង​បទ​ឧក្រិដ្ឋ​ បង្ហាញ​ថា ការ​កើន​ឡើង​២២​ភាគ​រយ​នៃ​ការ​ផលិត​អាភៀន​នៅ​តំបន់​ត្រីកោណ​​មាស​ មួយ​ផ្នែក​គឺ​ដោយ​សារ​តម្រូ​វ​ការ​ហេរ៉ូ​អុីន​កើន​ឡើង​នៅ​កម្ពុជា​។

លោក ចេសុន​ អែ៊ល​ឡៃ នាយក​​ប្រចាំ​ប្រទេស​ភូមានៃ​ការិយាល័យ​អង្គការ​សហ​ប្រជាជាតិ​ទទួល​បន្ទុក​គ្រឿង​ញៀន និង​ឧក្រិដ្ឋកម្ម​បាន​​​មាន​ប្រសាសន៍​បន្ទាប់ពី​ការ​ចេញ​ផ្សាយ​របាយការណ៍​ស្ដីពីការ​ផលិត​អាភៀន​នៅ​តំបន់​ត្រីកោណ​មាស​នេះ​ថា “ហេរ៉ូអុីន ផលិត​នៅភូមា​ត្រូវ​បាន​គេ​នាំ​​ចូល​​ និង​ឆ្លង​កាត​់​​ប្រទេស​កម្ពុជា​”។

លោក​បាន​មាន​ប្រសាសន៍​ថា “ ការ​កើន​ឡើង​នៃ​​ការ​ផលិត​​ហេរ៉ូអុីន​នៅ​ភូមា​ គឺ​ដោយ​សារ​ការ​កើន​ឡើង​តម្រូវ​ការ​អាភៀន​នៅ​ក្នុង​​​តំបន់ ​រួមទាំង​នៅ​កម្ពុជា​ផង​ដែរ​”។

លោក ក្លេ ណៃតុន មន្ត្រី​ផ្នែក​បន្សាប​គ្រឿង​ញៀន​នៅ​ការិយាល័យ​អង្គការ​សហ​ប្រជា​ជាតិ​ទទួល​បន្ទុក​គ្រឿន​ញៀន និង​ឧក្រិដ្ឋ​កម្ម​​ប្រចាំ​​កម្ពុជា បានមាន​ប្រសាសន៍​ថា ការ​ប្រើ​ប្រាស់​ហេរ៉ូ​អុីន​ភាគ​ច្រើន​នៅ​ប្រទេស​​កម្ពុជា​ គឺ​នៅ​ក្នុង​ទីក្រុង​​​ភ្នំពេញ​ ហើយ​អ្នក​ប្រើ​ប្រាស់​គ្រឿង​​ញៀន​ភាគ​ច្រើន​ក្នុង​ចំណោម​អ្នក​ប្រើ​ប្រាស់​គ្រឿង​ញៀន​ប្រមាណ​១.៤០០​នាក់​នៅ​ក្នុង​ប្រទេស​​​កម្ពុជា​ គឺ​ប្រើ​ប្រាស់​ហេរ៉ូអុីន​ដើម្បី​ចាក់​បញ្ចូល​តាម​សរសៃ​។

យោងតាម​ការិយាល័យ​អង្គការ​សហ​ប្រជា​​ជាតិ​នេះ​ ប្រទេស​កម្ពុជា​ត្រូវ​បាន​ចាត់​ទុក​ថា ជា​ “ ប្រទេស​សម្រាប់​​ឆ្លង​​កាត់​គ្រឿង​​ញៀន​ខុស​ច្បាប់​ដ៏ធំ​” ។

ទស្សនបែប​នេះ​ត្រូវ​បាន​​លើក​ឡើង​សាជាថ្ម​ី​នៅ​ក្នុង​របាយការណ៍​របស់​អាជ្ញាធរ​ជាតិ​ប្រយុទ្ធ​ប្រឆាំង​គ្រឿង​ញៀន​ ដែល​បាន​ចាត់​ទុក​ប្រទេស​​កម្ពុជា​ជាគោលដៅ​​សម្រាប់​ក្រុម​​ជួញ​ដូរ​គ្រឿង​ញៀន​​ផ្ទេរ​ថ្នាំ​ញៀន​ទៅ​ប្រទេស​ផ្សេងៗ​ទៀត​៕​គឹមហឿន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស