កាលពីម្សិលមិញ គណបក្សសង្គ្រោះជាតិបានគំរាមបិទចរាចរណ៍ចូលមក និងចេញពីរាជធានីភ្នំពេញ តាមផ្លូវសំខាន់ៗទាំងអស់នាខែក្រោយ ប្រសិនបើរដ្ឋាភិបាលមិនឆ្លើយតបទៅនឹងចំណុចទាមទាររបស់ខ្លួន ដែល រួមមានការបោះឆ្នោតឡើងវិញ និងការចុះចេញពីតំណែងរបស់លោកនាយករដ្ឋមន្ត្រី ហ៊ុន សែន ។
លោក ម៉ៅ មុនីវណ្ណ អនុប្រធានគណៈកម្មាធិការប្រតិបត្តិគណបក្សសង្គ្រោះជាតិ បានឲ្យដឹងថា កាលពីសប្តាហ៍មុន ថ្នាក់ដឹកនាំគណបក្សនេះបានសម្រេចចិត្តរកលទ្ធភាពបិទផ្លូវនានា។
ក្នុងស្ថានភាពក្រោយពេលបោះឆ្នោតកាលពីខែកក្កដា គណបក្សប្រឆាំងនេះចង់ឲ្យគណបក្សប្រជាជនកម្ពុជាបើកការសើុបអង្កេតសីុជម្រៅ និងឯករាជ្យលើការបោះឆ្នោតនេះ ក៏ប៉ុន្តែ មន្ត្រីគណបក្សកាន់អំណាចបានច្រានចោលសំណើនេះ។
អំឡុងពេលធ្វើបាតុកម្មជុំវិញរាជធានីភ្នំពេញក្នុងសប្តាហ៍នេះ គណបក្សប្រឆាំងបានលើកចំណុចទាមទារថ្មីៗ គឺត្រូវរៀបចំការបោះឆ្នោតឡើងវិញ និងទាមទារឲ្យលោកនាយករដ្ឋមន្ត្រី ហ៊ុន សែន ចុះចេញពីតំណែង។ លោក មុនីវណ្ណ បានមានប្រសាសន៍ ថា “ ក្នុងខែមករាយើងនឹងបិទផ្លូវជាតិសំខាន់ៗ ដែលជាច្រកធ្វើដំណើរមករាជធានីភ្នំពេញ ក៏ប៉ុន្តែយើងមិនទាន់កំណត់កាលបរិច្ឆេទនៅឡើយទេ។ វាគឺជាយុទ្ធសាស្ត្ររបស់យើងដើម្បីជំរុញឲ្យមានការបោះឆ្នោតឡើងវិញ ប្រសិនបើរដ្ឋាភិបាលមិនរកដំណោះស្រាយ ទេនោះ”។
ទោះបីជានគរបាលមានវត្តមានយ៉ាងជាប់លាប់ក៏ដោយ ក៏រហូតមកទល់ពេលនេះអាជ្ញាធរបានបណ្តោយឲ្យគណបក្សប្រឆាំងធ្វើឲ្យមានបញ្ហាបន្តិចបន្តួចទៅលើការធ្វើចរាចរណ៍ក្នុងរាជធានីភ្នំពេញ ដោយសារតែមានសកម្មភាពដើរក្បួនតវ៉ាយ៉ាងច្រើនជុំវិញរាជធានីភ្នំពេញតាំងពីពេលបោះឆ្នោតមក។
ទោះជាយ៉ាងណា ការប៉ុនប៉ងគិតទុកជាមុនថា នឹងបិទផ្លូវសំខាន់ៗនេះ នឹងជារឿងថ្មីមួយសម្រាប់គណបក្សប្រឆាំង។ ហើយប្រសិនបើអាជ្ញាធរប៉ុនប៉ងបំបែកសកម្មភាពទាំងនោះដោយប្រើកម្លាំង លោក មុនីវណ្ណ បានរំឭករដ្ឋាភិបាលថា ពិភពលោកខាងក្រៅនឹងឃ្លាំមើលប្រទេសកម្ពុជា។
លោកបានមានប្រសាសន៍បន្តថា “ រដ្ឋាភិបាលគួរតែយល់ថា ប្រសិនបើមានការបង្ក្រាបទៅលើសកម្មភាពតវ៉ា សហគមន៍អន្តរជាតិ នឹងរង់ចាំមើល ពីព្រោះប្រទេសកម្ពុជា គឺជាសមាជិកអង្គការសហប្រជាជាតិ និងតុលាការ ឧក្រិដ្ឋកម្មអន្តរជាតិ”។
លោក ខៀវ សុភ័គ អ្នកនាំពាក្យក្រសួងមហាផ្ទៃបានលើកឡើងថា ការបិទផ្លូវនេះនឹងជាសកម្មភាពរំលោភច្បាប់ពិតប្រាកដ។
លោកបានមានប្រសាសន៍ថា “ យោងតាមច្បាប់ចរាចរណ៍ ជនណាដែលបិទផ្លូវនឹងត្រូវទទួលទោស តាមមាត្រា៧៨”។ មាត្រានេះចែងថា ជនដែលធ្វើឲ្យមានការរាំងស្ទះចរាចរណ៍សាធារណៈ ត្រូវជាប់ពន្ធនាគាររយៈពេលមួយឆ្នាំ និងត្រូវផាកពិន័យជាប្រាក់រហូតដល់ពីរលានរៀល ឬប្រហែល៥០០ដុល្លារ។
នៅពេលអ្នកសារព័ត៌មានសួរថា តើអាជ្ញាធរនឹងប្រតិកម្មយ៉ាងដូចម្តេចចំពោះសកម្មភាពបែបនេះរបស់គណបក្សប្រឆាំង លោកឧត្តមសេនីយ៍ឯក ខៀវ សុភ័គ បានឆ្លើយតបថា “ យើងនឹងធ្វើសកម្មភាពទៅតាមច្បាប់…តាមជំពូកដែលចែងអំពីការដាក់ទោស”។
លោក ខេង ទីតូ អ្នកនាំពាក្យកងរាជអាវុធ ហត្ថ បាននិយាយត្រង់ៗអំពីប្រតិកម្មទំនងជាត្រូវបានរដ្ឋាភិបាលអនុវត្ត។ លោកបានមានប្រសាសន៍ថា “ ប្រសិនបើគណបក្សសង្គ្រោះជាតិបិទផ្លូវជាតិទាំងអស់ដែលចូលមករាជធានីភ្នំពេញ នោះសកម្មភាពបែបនេះជាអំពើខុសច្បាប់ ដូច្នេះកម្លាំងរបស់យើងត្រូវអនុវត្តច្បាប់ ដើម្បីបំបែកបាតុកម្ម។ យើងនឹងមិនអនុញ្ញាតឲ្យពួកគេបិទផ្លូវបែបនោះទេ ហើយយើងនឹងទប់ស្កាត់ពួកគេ ហើយយើងនឹងប្រើកម្លាំងទៅតាមស្ថានភាពជាក់ស្តែង។ ពួកគេមានសិទ្ធិធ្វើបាតុកម្ម ក៏ប៉ុន្តែពួកគេ ត្រូវធ្វើយ៉ាងណាកុំឲ្យប៉ះពាល់ដល់សិទ្ធិរបស់អ្នកដទៃ”។
គណបក្សសង្គ្រោះជាតិបានគំរាមបិទផ្លូវកាលពីម្សិលមិញ បន្ទាប់ពីបានធ្វើបាតុកម្មរយៈពេលប្រាំថ្ងៃជាប់គ្នានៅក្នុងរាជធានីភ្នំពេញ។លោក សម រង្ស៊ី ប្រធានគណបក្សសង្គ្រោះជាតិបានដឹកនាំសកម្មភាពតវ៉ារយៈពេលពីរម៉ោងកន្លះនៅទូទាំងភាគខាងជើងនៃរាជធានីភ្នំពេញ មុនពេលត្រឡប់មកទីលានប្រជាធិបតេយ្យវិញនៅពេលព្រលប់។ សកម្មភាពបាតុកម្មកាលពីម្សិលមិញ បានចាប់ផ្តើមពីទីលានប្រជាធិបតេយ្យ ដែលមានអ្នកគាំទ្រគណបក្សប្រឆាំងពីរបីពាន់នាក់បានមកជួបជុំគ្នា។
ជាធម្មតាដោយមានការអមដំណើររបស់លោក កឹម សុខា អនុប្រធានគណបក្សសង្គ្រោះជាតិ លោក សម រង្ស៊ី បានមានប្រសាសន៍ថា សមាជិកសមាជិកាគណបក្សរបស់លោកបានធ្វើដំណើរទៅបណ្តាខេត្តដើម្បីប្រមូលអ្នកគាំទ្របន្ថែមទៀត។
លោក សម រង្ស៊ី ក៏បានជំរុញឲ្យអ្នកគាំទ្រគណបក្សប្រឆាំងចូលរួមធ្វើបាតុកម្មឲ្យបានកាន់តែច្រើន ហើយទោះបីជាគណបក្សនេះសន្យាថា រក្សាការធ្វើបាតុកម្មបន្តទៀតក៏ដោយ លោក សម រង្ស៊ី បានបង្ហើបថា ថ្ងៃអាទិត្យនេះ អាចជាថ្ងៃចុងក្រោយ។
លោកបានមានប្រសាសន៍ថា “ បងប្អូនទាំងអស់គ្នា ថ្ងៃអាទិត្យនេះ ប្រហែលជាថ្ងៃចុងក្រោយហើយដូច្នេះសូមចូលរួមឲ្យបានកាន់តែច្រើន” ៕សុធា