មន្ត្រីម្នាក់បាននិយាយកាលពីម្សិលមិញថា ក្រសួងធនធានទឹក និងឧតុនិយមបានរឹបអូស សាឡង់ប្រាំគ្រឿងនៅក្នុងខេត្តកណ្តាលកាលពីថ្ងៃសៅរ៍ដោយសារតែមិនគោរពបម្រាមរបស់រដ្ឋាភិបាលមិនឲ្យបូមខ្សាច់នៅក្នុងទន្លេមេគង្គ។
លោក ចាន់ យុត្ថា ប្រធានខុទ្ទកាល័យរបស់លោក លឹម គានហោ រដ្ឋមន្ត្រីក្រសួងធនធានទឹកបានមានប្រសាសន៍ថា លោករដ្ឋមន្ត្រីបានដឹកនាំគណៈប្រតិភូរបស់រដ្ឋាភិបាលចុះទៅពិនិត្យមើកកន្លែងបូមខ្សាច់ដោយផ្ទាល់ស្ថិតក្នុងស្រុកស្អាងដើម្បីអនុវត្តបម្រាមហាមមិនឲ្យបូមខ្សាច់នៅក្នុងទន្លេមេគង្គនិងទន្លេសាបដែលបានចូលជាធរមានកាលពីថ្ងៃទី១៥ខែតុលា។
លោកបានមានប្រសាសន៍ថា “ លោករដ្ឋមន្ត្រីបានផ្អាកការបូមខ្សាច់អនាធិបតេយ្យនេះ ហើយយើងបានរឹបអូសសាឡង់ប្រាំគ្រឿង និងទុយោប្លាស្ទីកចំនួនបីតាមច្បាប់។ យើងបានចាត់វិធានការបន្ទាប់ពីទទួលបានព័ត៌មានពីអាជ្ញាធរមូលដ្ឋាន”។
លោក ឃឹម ចាន់គិរី អភិបាលស្រុកបានមានប្រសាសន៍ថា លោកបានជូនដំណឹងដល់ក្រសួងអំពីការបូមខ្សាច់នេះ បន្ទាប់ពីបានចាប់ផ្តើមកើនឡើងរយៈពេលប្រហែលមួយខែមកនេះ។
នៅក្នុងករណីដាច់ដោយឡែកមួយទៀត អ្នកភូមិនៅស្រុកខ្សាច់កណ្តាលប្រហែល៥០នាក់បានប្រមូលផ្តុំគ្នានៅតាមច្រាំងទន្លេមេគង្គកាលពីម្សិលមិញដើម្បីធ្វើការតវ៉ានឹងសាឡង់ប្រាំគ្រឿងទៀតដែលកំពុងបូមខ្សាច់ជាការរំលោភច្បាស់ក្រឡែតចំពោះបម្រាមរបស់រដ្ឋាភិបាលផងដែរ។
លោក ម៉ៅ ណារ័ត្ន អ្នកតវ៉ាម្នាក់ក្នុងចំណោមអ្នកតវ៉ាទាំងនោះបានិយាយថា សាឡង់ទាំងនេះបានចូលមកឃុំព្រែកអំបិលរយៈពេលប្រហែលពីរសប្តាហ៍មកហើយ។
លោក ម៉ៅ ណារ័ត្ន បានមានប្រសាសន៍ថា“ យើងមានការតវ៉ាតូចតាចនៅថ្ងៃនេះ ប៉ុន្តែប្រសិនបើអាជ្ញាធរមូលដ្ឋានមិនបានចាត់វិធានការសម្រាប់ពួកយើងទេនោះ ប្រជាពលរដ្ឋនឹងធ្វើការតវ៉ាដ៏ធំប្រឆាំងនឹងការបូមខ្សាច់នេះ ពីព្រោះវានឹងបណ្តាលឲ្យបាក់ច្រាំងទន្លេ ដោយសារគេបានបូមខ្សាច់ចម្ងាយប្រហែល៥០ម៉ែត្រពីច្រាំងទន្លេតែប៉ុណ្ណោះ ដូច្នេះវានឹងប៉ះពាល់ដល់លំនៅដ្ឋានរបស់ប្រជាពលរដ្ឋ”។
លោក ឈឹម ម៉េង មេឃុំ បានមានប្រសាសន៍ថា ក្រុមហ៊ុនដែលលោកមិនស្គាល់ឈ្មោះ ទទួលបានអាជ្ញាប័ណ្ណក្នុងការបូមខ្សាច់នេះ ប៉ុន្តែលោកបានបន្ថែមថា បម្រាមរបស់រដ្ឋាភិបាលបានទុកអាជ្ញាប័ណ្ណនេះជាមោឃៈ។
លោកនិងអ្នកតវ៉ាប្រហែល១០នាក់ទៀតបានជិះទូកមួយគ្រឿងទៅនិយាយជាមួយអ្នកធ្វើការនៅលើសាឡង់នោះដែលបានបន្តបូមខ្សាច់អំឡុងពេលមានការតវ៉ា។
លោកបានមានប្រសាសន៍ថា“ យើងបានជួបជាមួយកម្មករនៅលើសាឡង់នោះ ហើយបានសុំឲ្យកម្មករទាំងនោះបើកសាឡង់របស់ខ្លួនចេញ ពីព្រោះប្រជាពលរដ្ឋនៅទីនេះមានផែនការធ្វើបាតុកម្មដ៏ធំមួយប្រឆាំងនឹងក្រុមហ៊ុននេះ។ យើងបានបញ្ជាឲ្យកម្មករទាំងនោះបើកសាឡង់របស់ខ្លួនចេញពីទន្លេដែលប្រជាពលរដ្ឋតវ៉ា ពីព្រោះអាជ្ញាប័ណ្ណរបស់ក្រុមហ៊ុននេះអស់សុពលភាពហើយ”។
សាលារាជធានីភ្នំពេញបានបញ្ជាឲ្យផ្អាកការបូមខ្សាច់ជាបណ្តោះអាសន្ននៅក្នុងរាជធានីកាលពីខែសីហា ប៉ុន្តែទំនងជាមានការបំពានបម្រាមនេះ។
កាលពីឆ្នាំ២០០៩ លោក នាយករដ្ឋមន្ត្រី ហ៊ុន សែន បានចេញបម្រាម ដែលត្រូវបានគេបំពានចាប់តាំងពីពេលនោះមក មិនឲ្យនាំខ្សាច់ចេញ៕សារុន