31 C
Phnom Penh

ចាប់​ខ្លួន​ចោរប្លន់​ម៉ូតូ​ប្រដាប់អាវុធ​បីនាក់​បាញ់​តដៃ​ជាមួយ​នគរ​បាល​នៅ​ក្នុ​ង​ខេត្ត​កំពង់​ចាម

ដោយ ឌឹ ខេមបូឌា ដេលី

បទវិភាគ

នគរ​បាល​បាននិយាយ​កាលពី​ថ្ងៃ​អាទិត្យ​​ថា ចោរ​ប្លន់​ប្រដាប់​អាវុធ​បីនាក់​ត្រូវ​បាន​ចាប់​​​ខ្លួន​កាល​ពី​រសៀល​ថ្ងៃសៅរ៍​បន្ទាប់ពី​ប្លន់​ម៉ូត​ូ​មួយគ្រឿង ហើយ​បន្ទាប់​មក​បាញ់ត​ដៃ​ជា​​​មួយ​​​​នគរបាល​នៅ​ក្នុង​ខេត្ត​កំពង់​​ចាម​។  

លោ​ក ឡេ តៃឈុន​ អធិការ​រង​នគរ​បាល​ស្រុក​បាន​មាន​ប្រសាសន៍​ថា ជន​សង្ស័យ​ឈ្មោះ​ ក្វុន​ ឡេហុង​ អាយុ​២៨​ឆ្នាំ​  ឃិន បិញ អាយុ​៤២​ឆ្នាំ​និង​ បែន​ ដែន​ អាយុ​៣២​ឆ្នាំ​ត្រូវ​បាន​​​ចោទ​​​​ប្រកាន់​ពី​បទ​ប្លន់​ម៉ូតូ​របស់​ឈ្មោះ​ ឡេ ប៊ុណ្ណា អាយុ​៥៣​ឆ្នាំ​ នៅក្រៅផ្ទះ​របស់​លោក​​នៅ​ក្នុង​ស្រុក​អូររាំង​ឪ​នៅ​ម៉ោង​ប្រហែល​១ និង​៣០​​​នាទី​រសៀល​។

ដោយសារ​បុរស​ទាំង​បី​នាក់​នេះ​​ប្រដាប់​ដោយ​កាំភ្លើង​ពាក់​កណ្ដាល​ស្វ័យ​ប្រវត្តិ​ម៉ាក K54 ពី​រ​ដើម​នោះ លោក​​ ប៊ុណ្ណា​ មិន​បាន​ព្យាយាម​រារាំង​​ពួក​គេ​ទេ​ ប៉ុន្តែ​ក្រោយ​ពី​ពួក​គេ​យក​ម៉ូតូ​ទៅ​បាត់​ គាត់​បាន​ជិះ​រថយន្ត​ដេញ​តាម​ ហើយ​ទាក់ទង​ទៅ​នគរ​បាល​សុំ​ជំនួយ​។

ការ​ដេញ​តាម​ក្នុង​ល្បឿន​លឿន​បាន​បណ្ដាល​ឲ្យ​ជន​សង្ស័យ​បាញ់​កាំភ្លើង​តដៃ​ជាមួយ​នគរបាល​ដែល​កំពុង​ដេញ​តាម​ពួកគេ​​ ដោយ​បាញ់​ត្រូ​វលោក​ ប៊ុណ្ណា ចំ​ជើង​។

ទី​បំផុត​ចោរ​ប្លន់​ទាំង​បី​នាក់​នេះ​បាន​ព្យា​​​យាម​គេច​​ខ្លួន​ ដោយ​បើក​ម៉ូតូ​រេធ្លាក់​ផ្លូវ​ ប៉ុន្តែ​បាន​យក​​​ម៉ូតូ​ដែល​ប្លន់​​បាន​នោះ​ទៅ​ទម្លាក់​ចូល​នៅ​ក្នុង​ស្រះ​ទឹក​មួយ​កន្លែង​ដែល​ពួក​គេ​ត្រូវ​​​បាន​ចាប់​ខ្លួន​​។

លោក​ តៃ​ឈុន​ បាន​មាន​ប្រសាសន៍​ថា “បន្ទាប់​ពី​ដេញតាម​ និង​បាញ់​ត​ដៃជាមួយ​នគរ​បាល​មក ​ជន​សង្ស័យ​ម្នាក់​​ត្រូវ​បាន​ចាប់​ខ្លួន​នៅ​ម៉ោង​ប្រហែល​២និង​៣០​នាទី​រសៀល​ ហើយ​ជន​សង្ស័យ​ពីរ​នាក់​ទៀត​ចាប់​ខ្លួន​បាន​នៅ​ម៉ោង​៣​រសៀល​នៅ​ក្នុង​ឃុំ​ព្រះធាតុ​”។

លោក​បាន​​មាន​ប្រសាសន៍​បន្ថែម​ថា ជន​សង្ស័យ​ទាំង​បី​នាក់​នេះ​នឹង​ត្រូវ​បញ្ជូន​ទៅ​សាលា​ដំបូង​ខេត្ត​នៅ​ថ្ងៃ​នេះ​ ដើម្បី​ប្រឈម​នឹង​ការ​ចោទ​ប្រកាន់​។ លោក​ ប៊ុ​ណ្ណា កំពុង​សម្រាក​ព្យាបាល​មុខ​របួស​​​នៅ​មន្ទីរពេទ្យ​បង្អែក​ស្រុក​៕ សារុន​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស