31 C
Phnom Penh

ជនជាតិ​បារាំង​ពីរនាក់​ត្រូវ​គេ​ប្លន់​ ក្នុងហេតុការណ៍​ពីរករណី​ដាច់​ដោយ​ឡែក​ពីគ​្នាក្នុង​តំបន់តែមួយ​

ដោយ ឌឹ ខេមបូឌា ដេលី

បទវិភាគ

ជន​ជាតិបារាំង​ចំនួន​ពីរនាក់​ត្រូវ​គេ​វាយ​ប្រហារ​និង​ប្លន់​កាលពី​ចុង​សប្តាហ៍មុន នៅ​ក្នុងហេតុការណ៍ដាច់​ដោយ​ឡែក​ពី​គ្នា​ក្បែរ​សារ​មន្ទីរជាតិនៅ​កាច់​ជ្រុង​ផ្លូវ​លេខ​១៣ និង​ផ្លូវ​លេខ​១៧៨ក្នុង​ខណ្ឌដូនពេញ រាជធានី​ភ្នំពេញ​ នេះ​បើ​យោង​តាម​ការ​ឲ្យ​ដឹង​ពី​នគរ​​​បាល​ និង​មិត្ត​ភក្តិរបស់​ជន​រង​គ្រោះ​កាល​ពី​ម្សិលមិញ​។

យោង​តាម​លោក សួស សុខុម នាយ​រង​ប៉ុស្តិ៍​ សង្កាត់​ជ័យ​ជំនះ​ បាន​ឲ្យ​ដឹង​ថា ហេតុ​ការណ៍​ប្លន់​ថ្មី​បំផុត​នេះ​បាន​កើត​ឡើង​កាលពី​ព្រឹក​ព្រលឹម​ម្សិលមិញ​ តាម​បណ្តោយ​ផ្លូវ​លេខ​១៧៨ ហើយ​មាន​បុរស​ម្នាក់​ត្រូវ​ចូល​ព្យាបាល​​ក្នុង​មន្ទីរ​ពេទ្យ​ ប៉ុន្តែ ទំហំ​នៃការ​រង​របួស​របស់​គាត់​គឺ​នៅមិន​ទាន់​ដឹង​នៅ​ឡើយ​ទេ។

លោក​បាន​ឲ្យដឹង​បន្ត​ថា បុរស​ម្នាក់​នេះ​ដែល​ឈ្មោះ​និង​អាយុ​របស់​គាត់​មិន​ត្រូវ​គេ​ប្រាប់ឲ្យ​ដឹង​នោះ​ បាន​ចូល​ទិញ​ទំនិញ​ក្នុង​ហាង​​​មីនីម៉ាត​មួយកន្លែង​​តាម​បណ្តោយផ្លូវ​លេខ​១៧៨​នៅវេលាម៉ោង​ប្រហែល​១​រំលង​អធ្រាត្រ​​ ហើយ​បន្ទាប់មក​បាន​ដើរ​ត្រឡប់​ទៅ​ផ្ទះ​សំណាក់​វិញ​តែ​ម្នាក់​ឯង នៅ​ពេល​នោះ​​​​មាន​បុរស​ពីរនាក់​ជិះ​ម៉ូតូ​មួយ​គ្រឿង​មក​ពីក្រោយ​គាត់​។

លោក សុខុម បាន​បដិសេធ​មិន​ផ្តល់​ព័ត៌មាន​លម្អិត​ពី​អ្វី​បាន​កើត​ឡើង​បន្ថែម​ទៀត​ឡើយ​ ប៉ុន្តែ បើ​យោង​តាម​សាក្សី​ និង​ប្រព័ន្ធ​ផ្សព្វ​ផ្សាយ​​ក្នុង​ស្រុក​បាន​ឲ្យ​ដឹង​កាលពី​ម្សិលមិញ​ថា ជន​សង្ស័យ​ចំនួន​ពីរនាក់បាន​យក​ដប​វាយ​បំបែក​នៅ​លើ​ផ្លូវ​ដើម្បី​ប្រើ​ជា​អាវុធ​ចាក់​បុរស​រូប​នេះ ហើយ​ប្លន់​គាត់​តែ​ម្តង​។

ប្រជាពលរដ្ឋ​និង​ម្ចាស់ហាង​​មួយ​ចំនួន​បាន​និយាយ​ថា ពួកគាត់​បាន​ឮសំឡេង​ស្រែក​ឲ្យ​ជួយ​យ៉ាង​ខ្លាំង​នៅ​ម៉ោង​ប្រហែល​១រំលង​អធ្រាត្រតាម​បណ្តោយ​ផ្លូវ​លេខ​១៧៨​កាល​ពី​ម្សិលមិញ​។

លោក កែវ មករា អាយុ​៤៣ឆ្នាំ ដែល​រស់​នៅ​ត្រង់​ចំណុច​កាច់​ជ្រុង​នៃ​ផ្លូវ​លេខ​១៣ និង​១៧៨បាន​មាន​ប្រសាសន៍​ថា “ កាលពី​យប់​មិញ​ ខ្ញុំ​បាន​ឮ​ជន​បរទេស​ស្រែក​នៅ​ម៉ោង​ប្រហែល​១រំលង​អធ្រាត្រ​ បន្ទាប់​មក​មាន​មនុស្ស​ជា​ច្រើន​បាន​ចេញ​មក​មើល​។ ខ្ញុំ​បាន​ឮ​មនុស្ស​ម្នាក់​ស្រែក​ថា  ‘ ជួយ​ផង​ ជួយ​ផង​!’ ។

លោក​បាន​បន្ត​ថា “ គាត់​ត្រូវ​បាន​គេ​នាំ​ទៅកាន់​មន្ទីរពេទ្យ​កាល់​ម៉ែត។ យើង​កំពុង​តែ​តាម​ដាន​ករណី​នេះ​”។

រីឯ​នៅក្នុង​ហេតុការណ៍​ស្រដៀង​គ្នានេះ​មួយ​ទៀត​នៅ​ក្នុង​តំបន់​ដដែល​នោះ មាន​ស្ត្រី​ម្នាក់​ឈ្មោះ រ៉ាហ្វាអែល បួរជីអូអីស (Raphaele Bourgeois) អាយុ​៤២ឆ្នាំ​ ត្រូវ​បុរស​ពីរនាក់​ជិះ​ម៉ូតូ​​​​មួយ​​​គ្រឿង​ឆក់​កាបូប​របស់​គាត់​ កាលពី​ល្ងាច​ថ្ងៃ​សុក្រ នៅ​ចន្លោះ​ម៉ោង​៨និង​៩យប់​ នេះ​បើ​យោង​តាម​លោក យូ ខេមរៈ ដែល​ជា​​​​​​​​​​អ្នក​នាំភ្ញៀវ​របស់អ្នកស្រី បួរជីអូអីស។

លោក យូ ខេមរៈ បានលើកឡើង​​ថា“ គាត់​បាន​ដួល​ ហើយ​ត្រូវ​​របួស​ដៃ​និង​ខ្លួន ខណៈ​ចោរ​​ប្លន់​ពីរនាក់​​បាន​ឆក់​កាបូប​របស់​គាត់​ ដែល​មាន​ទូរស័ព្ទ​ដៃ​ម៉ាក​អាយហ្វូន​ចំនួន​ពីរ​គ្រឿង​ និង​សម្ភារ​​ផ្សេងៗទៀត​ បើ​គិត​ជា​ទឹក​ប្រាក់​មាន​តម្លៃ​សរុប​ប្រហែល​ជា​២.៥០០​ដុល្លារ​”។

បន្ទាប់​ពីមាន​ហេតុការណ៍​ប្លន់​ដាច់​ដោយ​ឡែក​​ពី​គ្នា​ចំនួន​ពីរករណី​នេះ​រួច​មក ​មន្ត្រី​ផ្នែក​ទេស​ចរណ៍​​​​​មួយ​រូប​បាន​លើក​ឡើង​កាលពី​ម្សិលមិញ​ថា គាត់​ចង់​ឲ្យ​មាន​នគរបាល​ល្បាត​បន្ថែម​នៅ​តំបន់​នោះ​ ដើម្បី​ធានា​សុវត្ថិភាព​ដល់​ភ្ញៀវ​ទេស​ចរ។

លោក​ សំ ចាន់​រ៉េន អនុ​ប្រធាន​មន្ទីរទេសចរ​ណ៍​រាជធានី​ភ្នំពេញ បាន​មាន​ប្រសាសន៍​ថា “ យើង​ព្រួយ​បារម្ភ​។ យើង​ស្នើ​ឲ្យ​នគរបាល​ចាប់អារម្មណ៍​ក្នុងការ​ការពារ​សន្តិសុខ​ដល់​ប្រជាពលរដ្ឋ​”៕ ស៊ុយ​ឈាង​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស