31 C
Phnom Penh

រថយន្ត​សង្គ្រោះ​បន្ទាន់​បុក​មនុស្ស​បី​នាក់​ស្លាប់ ខណៈ​ពីរនាក់ផ្សេង​​ទៀតស្លាប់​ដោយ​សាររថយន្ត​ក្រុង​

ដោយ ឌឹ ខេមបូឌា ដេលី

បទវិភាគ

នគរបាល​ចរាចរ​ខេត្ត​កណ្តាល​បាន​ឲ្យ​ដឹង​កាលពីម្សិលមិញ​ថា មនុស្ស​បីនាក់​បានស្លាប់​នៅ​ពេល​រថយន្ត​សង្គ្រោះ​បន្ទាន់​មួយ​គ្រឿង​បុក​ កាលពី​យប់​ថ្ងៃ​ច័ន្ទ ក្នុង​ស្រុក​អង្គស្នួល ខេត្ត​កណ្តាល។  

លោក ព្រាប សុថា នាយ​នគរបាល​ចរាចរ​ស្រុក​អង្គស្នួល​បាន​ឲ្យ​ដឹង​ថា ជន​រង​គ្រោះ​ឈ្មោះ សាន ចន្ធី អាយុ​២៨ឆ្នាំ​ និង តោក សុធារី អាយុ​២២ឆ្នាំ ព្រម​ទាំង​​កូន​របស់​ពួកគាត់​ឈ្មោះ ចន្ធី វណ្ណាកា អាយុ​១១ខែផង​ បាន​ស្លាប់​នៅ​​ពេល​រថយន្ត​សង្គ្រោះ​បន្ទាន់​មួយ​គ្រឿង​មក​ពី​គ្លីនិក​ឯក​ជន​មួយ​ឈ្មោះ ថ្នល់​ទទឹង​ព្យាយាម​បើក​ជែងរថយន្ត​មួយ​ចំនួន​ផ្សេង​ទៀត​ ប៉ុន្តែ បែរ​ជា​ជ្រុល​ទៅ​បុក​ម៉ូតូ​មួយ​គ្រឿង​របស់​ជន​រង​គ្រោះ​ទាំង​បី​នាក់​នេះ​នៅ​តាម​ផ្លូវ​ជាតិលេខ៤តែ​ម្តង​។

លោក សុថា បាន​មាន​ប្រសាសន៍​ថា “ វា​ជា​រឿង​មួយ​គួរ​ឲ្យ​សោក​ស្តាយ​ណាស់​ដែល​ជន​រង​គ្រោះ​ទាំង​បី​បាន​ស្លាប់​ ពីព្រោះ​ពួកគេ​មិន​បាន​បើក​បរ​ខុស​ច្បាប់​ចរាចរណ៍​ឡើយ។ ហើយ​នេះគឺ​ជា​កំហុស​របស់​រថយន្ត​សង្គ្រោះ​បន្ទាន់​។[រថយន្ត​សង្គ្រោះ​បន្ទាន់​ ជា​រឿយ​ៗ​តែង​តែ​បើក​លឿន​ណាស់​ហើយ​មិនដែល​គិត​អំពី​អាយុ​ជីវិត​របស់​ពលរដ្ឋ​​​ឡើយ​​”។

រីឯ​គ្លីនិក​ថ្នល់​ទទឹង​វិញ​មិន​បានលើក​ទូរ​ស័ព្ទ​ឡើយ ​នៅ​ពេលមាន​ការ​​ហៅ​ទូរស័ព្ទ​ចូល។

ដោយ​ឡែក​នៅ​យប់​ថ្ងៃ​ច័ន្ទដដែលនោះ ក៏​មាន​បុរស​ពីរនាក់​បាន​ស្លាប់​ផង​ដែរ​ បន្ទាប់​ពី​​ពួកគេទាំង​ពីរនាក់​​បើក​ជែង​កាត់​ពីមុខ​​រថយន្ត​ក្រុង​មួយ​គ្រឿង​នៅ​តាម​បណ្តោយ​ផ្លូវ​ជាតិ​លេខ​៥​នៅ​ក្នុង​ក្រុង​ប៉ោយ​ប៉ែត​ ខេត្ត​បន្ទាយ​មាន​ជ័យ​។

លោក អ៊ុំ សុផល នាយ​នគរបាល​ក្រុង​ប៉ោយ​ប៉ែត​បាន​ឲ្យ​ដឹង​ថា ជន​រង​គ្រោះ​ឈ្មោះ ហំ ចន្ធី អាយុ​២០ឆ្នាំ និងអ្នក​​រួម​ដំណើរ​ជា​មួយ​ឈ្មោះ ហួរ វួច អាយុ​២៤ឆ្នាំ​ បានស្លាប់​បន្ទាប់​ពី​​ត្រូវ​​រថយន្ត​ក្រុង​របស់​ក្រុម​ហ៊ុនដឹក​ជញ្ជូន​​កម្ពុជា​ អង្គរ អិចប្រេសបុក​។

លោក​ សុផល បាន​មាន​ប្រសាសន៍​ថា “ ខ្ញុំ​គិត​ថា ជន​រង​គ្រោះ​បាន​បើក​បរ​លឿន​ខ្លាំង​ណាស់​ ហើយ​មិន​បាន​ប្រុង​​ប្រយ័ត្ន”។ លោក​បន្ថែម​ថា រថយន្ត​ក្រុង​មិន​បាន​ឈប់​ឡើយ​បន្ទាប់​ពី​បុក​ម៉ូតូ​មួយ​គ្រឿង​រួច៕ ស៊ុយ​ឈាង

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស