មន្ត្រីកងយោធពលខេមរភូមិន្ទបានឲ្យដឹងថា កងយោធពលខេមរភូមិន្ទ នឹងចាប់ផ្តើមធ្វើសមយុទ្ធយោធាបាញ់គ្រាប់ពិតរយៈពេលប្រាំថ្ងៃ គឺចាប់ផ្តើមនៅថ្ងៃសុក្រ ក្នុងខេត្តកំពង់ស្ពឺ ហើយនេះគឺជាការធ្វើសមយុទ្ធបាញ់គ្រាប់ពិតជាលើកទីពីរហើយក្នុងឆ្នាំនេះ។
នៅក្នុងសេចក្តីថ្លែងការណ៍មួយដែលចុះហត្ថលេខា កាលពីថ្ងៃច័ន្ទ លោក ប៉ុល សារឿន មេបញ្ជាការកងយោធពលខេមរភូមិន្ទបានលើកឡើងថា ទាហាននឹងបាញ់គ្រាប់រ៉ុកកែត BM-21 ពីខាងក្នុងទីបញ្ជាការកងរថក្រោះ ACO ទៅកាន់គោលដៅនៅលើភ្នំក្បែរនោះ។
ឧត្តមសេនីយ៍ឯក ណុប រតនា មេបញ្ជាការនៅមូលដ្ឋាននោះបានឲ្យដឹងថា ទាហាននឹងផ្តល់ដំណឹងដល់អ្នកភូមិឲ្យនៅឲ្យឆ្ងាយពី
តំបន់នោះ។
លោកឧត្តមសេនីយ៍ឯក ណុប រតនា បានមានប្រសាសន៍ថា “ យើងបានចេញបទបញ្ជាឲ្យអភិបាលស្រុកទាំងអស់ប្រាប់អ្នកភូមិកុំឲ្យខ្លាចសំឡេងគ្រាប់រ៉ុកកែតBM-21 និងកុំឲ្យពួកគាត់លែងសត្វពាហនៈរបស់ខ្លួនចូលក្នុងព្រៃ ឬក៏ឡើងលើភ្នំ”។
កងយោធពលខេមរភូមិន្ទបានធ្វើសមយុទ្ធបាញ់គ្រាប់ពិតលើកចុងក្រោយនៅទីតាំងនោះកាលពីខែមេសា។ ការធ្វើសមយុទ្ធនោះគឺជាការធ្វើសមយុទ្ធធំបំផុតក្នុងរយៈពេលបីឆ្នាំចុងក្រោយនេះ ហើយត្រូវបានធ្វើឡើងមុនពេលការបកស្រាយសាលក្រមនៅឯតុលាការអន្តរជាតិក្រុងឡាអេ ដើម្បីកំណត់ពីភាពជាម្ចាស់នៃដីមានជម្លោះរវាងប្រទេសកម្ពុជា និងប្រទេសថៃជុំវិញតំបន់ប្រាសាទព្រះវិហារ។
តុលាការយុត្តិធម៌អន្តរជាតិនៅទីក្រុងឡាអេចាប់តំាងពីពេលនោះមកបានសម្រេចផ្តល់ដីដែលមានជម្លោះមួយផ្នែកធំមកឲ្យភាគីកម្ពុជា៕ស៊ុយឈាង