កាលពីម្សិលមិញ សាលាដំបូងរាជធានីភ្នំពេញបានបើកសវនាការជំនុំជម្រះរឿងក្តីរបស់ឈ្មួញកណ្តាលម្នាក់ដែលត្រូវគេចោទប្រកាន់ពីបទសមគំនិតក្នុងការរៀបផែនការសម្លាប់ថៅកែនាំចេញឈើដែលមានទំនាក់ទំនងយ៉ាងជិតសិ្នទ្ធជាមួយខ្លួន។
លោក សំ ឌីចាម អាយុ៤០ឆ្នាំ មានសញ្ជាតិពីរគឺកម្ពុជា និងឡាវ ត្រូវបានចាប់ខ្លួនកាលពីឆ្នាំ២០១១ ពីបទឆបោក និងរៀបផែនការសម្លាប់អ្នកស្រី ខៃ ណារិន ដែលជាអតីតថៅកែរបស់ខ្លួន។ ដោយសារតែមូលហេតុមិនបានដឹងច្បាស់លាស់ ការចោទប្រកាន់ពីបទរៀបផែនការធ្វើឃាតត្រូវបានរក្សាទុកមួយឡែករហូតមកទល់ពេលឥឡូវ ហើយលោក ឌីចាម ត្រូវបានផ្តន្ទាទោសតែពីបទឆបោកប៉ុណ្ណោះ។ បន្ទាប់ពីផ្តន្ទាទោសរួចលោក ឌីចាម ត្រូវបានជាប់ពន្ធនាគារចាប់តាំងពីខែតុលា ឆ្នាំ២០១១មក។
កាលពីម្សិលមិញលោក គង់ សុវណ្ណ សាក្សីចុងក្រោយនៅក្នុងសំណុំរឿងរៀបផែនការធ្វើឃាតនេះបានប្រាប់តុលាការថា កាលពីឆ្នាំ២០១១ លោក អ៊ូច លីវណ្ណ ជាបុរសម្នាក់ដែលនិយាយថា ខ្លួនត្រូវគេជួលឲ្យអនុវត្តផែនការធ្វើឃាតនេះ បានលាតត្រដាងពីការរៀបចំផែនការសម្លាប់អ្នកស្រី ណារិន។
លោក សុវណ្ណ បានប្រាប់តុលាការថា“ លោក លីវណ្ណ បានប្រាប់ខ្ញុំថា គាត់នឹងទទួលបានប្រាក់១០.០០០ដុល្លារពីលោក ឌីចាម[សម្រាប់ការធ្វើឃាតនេះ] ហេតុដូច្នេះទើបខ្ញុំយករឿងនេះប្រាប់នគរបាល”។
ដោយសារតែទទួលបានដំណឹងពីលោកសុវណ្ណ ទើបនាំឲ្យមានការចាប់ខ្លួនលោក ឌីចាម និងលោក លីវណ្ណ។ លោក លីវណ្ណ ត្រូវបានដោះលែងវិញបន្ទាប់ពីបានសាកសួររួច ហើយទោះបីជាលោកបានសារភាពថា ខ្លួនបានយល់ព្រមអនុវត្តផែនការធ្វើឃាតនេះក៏ដោយ ក៏លោកនៅតែមិនប្រឈមនឹងការចោទប្រកាន់ណាមួយឡើយ។
កាលពីម្សិលមិញ លោក លីវណ្ណ បានបញ្ជាក់ប្រាប់តុលាការម្តងទៀតថា “ ខ្ញុំបានសន្យាជាមួយលោក ឌីចាម ថា នឹងសម្លាប់អ្នកស្រី ណារិន នៅពេលខ្ញុំទទួលបានប្រាក់។
លោក ឌីចាម មានកំហឹងនឹងអ្នកស្រី ណារិន កាលពីឆ្នាំ២០១១ នៅពេលប្រាក់ចំនួន៥០.០០០ដុល្លារបានបាត់ នៅក្នុងកិច្ចព្រមព្រៀងដឹកឈើប្រណិតទៅកាន់ប្រទេសចិន ដែលលោក ឌីចាម ត្រូវបានជួលឲ្យធ្វើជាឈ្មួញកណ្តាល។
លោក ឌីចាម អាចនឹងប្រឈមជាប់ពន្ធនាគារអស់មួយជីវិត ប្រសិនបើត្រូវបានផ្តន្ទាទោសពីបទរៀបផែនការធ្វើឃាតមែននោះ ប៉ុន្តែ លោកនៅតែប្រកែកថា ខ្លួនគ្មានកំហុសឡើយកាលពីម្សិលមិញ។
លោកស្រី ងួន មករា មេធាវីរបស់អ្នកស្រី ណារិន បានទាមទារប្រាក់សំណងជំងឺចិត្ត២០០.០០០ដុល្លារសម្រាប់កូនក្តីរបស់ខ្លួន។
កាលពីឆ្នាំ២០០៧ អ្នកស្រី ណារិន ត្រូវអង្គការ Global Witness កត់ត្រាចូលក្នុងរបាយការណ៍របស់ខ្លួនជាម្ចាស់រោងអារឈើដែលគេរកឃើញថា កំពុងអារឈើខុសច្បាប់នៅជាយក្រុងភ្នំពេញ។
របាយការណ៍នេះដែលមានចំណងជើងថា “ សែស្រឡាយគ្រួសាររបស់ប្រទេសកម្ពុជា: ការកាប់ឈើខុសច្បាប់ និងការរឹបអូសទ្រព្យសម្បត្តិសាធារណៈដោយបុគ្គលមានទ្រព្យសម្បត្តិស្តុកស្តម្ភរបស់ប្រទេសកម្ពុជា” ក៏បានផ្សារភ្ជាប់អ្នកស្រី ណារិន ទៅនឹងគំនរឈើនៅក្នុងព្រៃឡង់ផងដែរ។ គេរកឃើញថា អ្នកស្រីជាម្ចាស់គំនរឈើនេះដោយមានទំនាក់ទំនងជាមួយក្រុមហ៊ុន សេង គៀង។
របាយការណ៍របស់អង្គការ Global Witness បានចាត់ទុកក្រុមហ៊ុនសេងគៀងជា “ ក្រុមហ៊ុនកាប់ឈើដ៏មានអំណាចបំផុតនៅក្នុងប្រទេសកម្ពុជា”។ អ្នកស្រី សេង គៀង គឺជាអតីតភរិយារបស់ឌីចូចដែលត្រូវជាក្មួយប្រុសរបស់លោកនាយករដ្ឋមន្ត្រី ហ៊ុន សែន។
តុលាការគ្រោងនឹងប្រកាសសាលក្រមក្នុងសំណុំរឿងរៀបផែនការធ្វើឃាតនេះនៅថ្ងៃច័ន្ទ៕ ស៊ុយឈាង