កាលពីម្សិលមិញ លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានឲ្យដឹងថា លោក នឹងមិនធ្វើការកែតម្រូវលើការអះអាងខុសដែលលោកបានបង្ហោះនៅលើទំព័រហ្វេសប៊ុករបស់លោកឡើយ។ លោក ខៀវ កាញារីទ្ធបានបង្ហោះរូបភាពដែលបង្ហាញពីព្រះតេជគុណ ប៊ុត ប៊ុនទិញ សកម្មជនជាព្រះសង្ឃដ៏លេចធ្លោបានថើបស្ត្រីម្នាក់។
រូបភាពដែលចែករំលែកដោយលោក ខៀវ កាញារីទ្ធ បន្ទាប់ពីលោកបានទទួលពីអ្នកប្រើហ្វេសប៊ុកផ្សេងម្នាក់ទៀត បានបង្ហាញរូបរបស់ព្រះតេជគុណ ប៊ុត ប៊ុនទិញ ដែលកំពុងគ្រងស្បង់ជីពរថើបស្ត្រីម្នាក់។
ព្រះសង្ឃដែលឱបថើបស្ត្រីម្នាក់នេះការពិតទៅគឺជារូបរបស់ព្រះសង្ឃនៅស្រីលង្កា ហើយរូបភាពដែលលោក ខៀវ កាញារីទ្ធ ចែករំលែកនេះទំនងជាថតចេញពីខ្សែអាត់វីដេអូដែលលេចធ្លាយនៅប្រទេសស្រីលង្កាកាលពីខែកញ្ញា នៅពេលខ្សែអាត់នេះទំនងជាបង្ហាញពីព្រះសង្ឃជាន់ខ្ពស់មួយអង្គនៅទីនោះថើបស្ត្រីអឺរ៉ុបម្នាក់។
អត្ថបទដែលអមជាមួយរូបភាពនៅលើទំព័រហ្វេសប៊ុករបស់លោក ខៀវ កាញារីទ្ធ គឺមានបំណងផ្សារភ្ជាប់ព្រះតេជគុណ ប៊ុត ប៊ុនទិញ ទៅនឹងគណបក្សសង្គ្រោះជាតិ។
អត្ថបទនេះមានខ្លឹមសារថា “ គិតឲ្យបានហ្មត់ចត់អំពីគណបក្សសង្គ្រោះជាតិ។ ពួកគេស្ទើរទាំងអស់គឺជាក្មេងបាតផ្សារ។ ចូលមើលព្រះសង្ឃរូបនេះដែលកំពុងបំផ្លាញព្រះពុទ្ធសាសនាដោយថើបស្ត្រីបរទេស។ ចូលគិតអំពីអ្នកទាំងអស់នោះដែលគាំទ្រគណបក្សសង្គ្រោះជាតិ”។
លោក ខៀវ កាញារីទ្ធ ដែលមានមិត្តចំនួន២៥.៤៥៥នាក់នៅលើទំព័រហ្វេសប៊ុកបានលើកឡើងថា លោកនឹងមិនចេញសេចក្តីកែតម្រូវ ឬក៏ការបញ្ជាក់ដោយពន្យល់ថា រូបភាពដែលលោកបានបង្ហោះនោះមិនមែនជាព្រះសង្ឃកម្ពុជាឡើយ។
លោក ខៀវ កាញារីទ្ធ បានមានប្រសាសន៍ទាក់ទិននឹងរូបភាពនេះថា “ ខ្ញុំបានលុបចោលវាហើយ”។ លោកបានបន្ថែមថា លោកមិនចាំបាច់ត្រូវកែតម្រូវ ឬក៏បញ្ជាក់ពីអ្វីដែលលោកបានបង្ហោះនេះឡើយ ព្រោះព័ត៌មាននៅក្នុងបណ្តាញទំនាក់ទំនងសង្គមមិនជាព័ត៌មានផ្លូវការនោះទេ។ លោក ខៀវ កាញារីទ្ធ បានមានប្រសាសន៍ថា “ ទេ ហ្វេសប៊ុកមិនមែនជាកន្លែងផ្តល់ព័ត៌មានផ្លូវការឡើយ”។
ព្រះតេជគុណ ប៊ុត ប៊ុនទិញ ដែលដឹកនាំបណ្តាញព្រះសង្ឃឯករាជ្យសម្រាប់យុត្តិធម៌សង្គមមានសង្ឃដីកាថា ព្រះតេជគុណមិនចង់ទទួលបានការសូមអភ័យទោសពីលោក ខៀវ កាញារីទ្ធឡើយ។
ព្រះតេជគុណ ប៊ុត ប៊ុនទិញ មានសង្ឃដីកាថា “ ខៀវ កាញារីទ្ធ គឺជារដ្ឋមន្ត្រីអាក្រក់ណាស់”។ ព្រះតេជគុណមានសង្ឃដីកាបន្តថា ព្រះតេជគុណមិនដែលបានប៉ះពាល់ស្ត្រីអស់រយៈពេល២៥ព្រះវស្សាមកហើយចាប់តាំងពីបួសមក។
ព្រះតេជគុណ ប៊ុត ប៊ុនទិញ មានសង្ឃដីកាបន្តទៀតថា “ [ខៀវ កាញារីទ្ធ]គួរតែចំណាយពេលធ្វើការនិងផ្តល់ព័ត៌មានពិតដល់ពលរដ្ឋ មិនមែនមកវាយប្រហារពលរដ្ឋខ្មែរបែបនេះទេ។ នេះមិនមែនតួនាទីរបស់រដ្ឋមន្ត្រីឡើយ”។
លោក មឿន ឈានណារិទ្ធ ប្រធានវិទ្យាស្ថានកម្ពុជាសម្រាប់ការសិក្សាប្រព័ន្ធផ្សព្វផ្សាយបានលើកឡើងថា បើយោងតាមវិជ្ជាជីវៈនិងក្រមសីលធម៌អ្នកសារព័ត៌មានលោក ខៀវ កាញារីទ្ធ គួរតែបញ្ជាក់ថា រូបភាពដែលលោកបានបង្ហោះនៅទំព័រហ្វេសប៊ុករបស់លោកគឺមិនមែនជាព្រះសង្ឃកម្ពុជាឡើយ។
លោក ណារិទ្ធ មានប្រសាសន៍ថា “ ការចេញសេចក្តីកែតម្រូវអាចនឹងកែកំហុសឆ្គងនេះ។ការបង្ហោះរូបភាពព្រះសង្ឃថើបស្ត្រីគឺជារឿងធ្ងន់ធ្ងរណាស់ ព្រោះជាការខុសឆ្គង ហេតុដូច្នេះគួរតែមានការសូមអភ័យទោសប្រសិនបើព្រះសង្ឃស្នើសុំ”៕ ស៊ុយឈាង