កាលពីម្សិលមិញសាលាដំបូងរាជធានីភ្នំពេញបានបើកសវនាការជំនុំជម្រះរឿងក្ដីរបស់យុវជនវៀតណាមអាយុ២២ឆ្នាំម្នាក់ដែលបានធាក់កង់មកប្រទេសកម្ពុជា ហើយបានដុតភ្លើងនៅច្រកចូលស្ថានទូតជប៉ុនក្នុងបំណងជំរុញឲ្យមានការនិរទេសរូបខ្លួនទៅប្រទេសជប៉ុន ដែលជាកន្លែងខ្លួនសង្ឃឹមថា នឹងទទួលបានអនាគតបវររុងរឿង។
យុវជនឈ្មោះ Daing Phutok បានចាកចេញពីប្រទេសវៀតណាមនៅក្នុងខែមិថុនា ដោយប្រើកង់ជាមធ្យោបាយធ្វើដំណើរនិងបានមកដល់រាជធានីភ្នំពេញនៅថ្ងៃទី១ ខែកក្កដា។ នៅពេលមកដល់ រូបគេក៏បានដុតសម្លៀកបំពាក់មួយពំនូកដែលជោគជាំដោយអាល់កុល រួចក៏បោះសម្លៀកបំពាក់ទាំងនេះរំលងរបងស្ថានទូតដែលស្ថិតតាមបណ្ដោយមហាវិថីព្រះនរោត្តម។ អណ្ដាតភ្លើងនេះត្រូវបានពន្លត់វិញភ្លាមៗដោយសន្ដិសុខស្ថានទូតដែលបានឃាត់ខ្លួនរូបគេភ្លាមដែរ។
យុវជនរូបនេះបានប្រាប់តុលាការកាលពីម្សិលមិញថា ខ្លួនខំតែរំពឹងថា សន្ដិសុខនឹងសាកសួរពីមូលហេតុនៃការធ្វើសកម្មភាពបែបនេះ ដោយថែមទាំងបានត្រៀមប្រាប់សន្ដិសុខពីក្ដីស្រមៃក្នុងការរស់នៅជប៉ុនទៀតផង។ ផ្ទុយទៅវិញបែរជាត្រូវបានប្រគល់ឲ្យអាជ្ញាធរកម្ពុជានិងចោទប្រកាន់ពីបទប៉ុនប៉ងបំផ្លិចបំផ្លាញទ្រព្យសម្បត្តិទៅវិញ។
Phutok បាននិយាយថា “ខ្ញុំឮថា ប្រាក់ខែសម្រាប់និយោជិកនៅជប៉ុន គឺខ្ពស់ជាងនៅវៀតណាម។ ខ្ញុំបានដុត [សម្លៀកបំពាក់] នៅស្ថានទូតជប៉ុន ព្រោះខ្ញុំចង់ឲ្យគេចាប់ខ្លួន រួចបញ្ជូនខ្ញុំទៅប្រទេសជប៉ុន”។
Phutok បាននិយាយថា ឥឡូវខ្លួនដឹងខុសហើយ ហើយសុំឲ្យដោះលែងរូបគេ ហើយបញ្ជូនគេទៅវៀតណាមវិញចុះ។
យុវជនរូបនេះបាននិយាយថា “ ខ្ញុំសុំអភ័យទោសចំពោះស្ថានទូតជប៉ុន”។
Phutok ក៏បានស្នើឲ្យតុលាការប្រគល់មកវិញនូវរបស់របរដែលជាកម្មសិទ្ធិរបស់ខ្លួននោពេលធ្វើសកម្មភាពដុតនេះផងដែរ ក្នុងនោះមានកង់មួយគ្រឿង លិខិតឆ្លងដែន ផែនទី ប្រាក់១៣.០០០រៀល និងប្រាក់វៀតណាម១.០០០ដុង។
សាលក្រមនឹងត្រូវបានប្រកាសនៅថ្ងៃទី១៥ ខែមករា។
ប្រសិនបើត្រូវបានរកឃើញពិរុទ្ធភាពដូចការចោទប្រកាន់មែននោះ Phutok អាចជាប់ពន្ធនាគាររហូតដល់ពីរឆ្នាំ និងពិន័យជាប្រាក់ចំនួន១.០០០ដុល្លារ៕សេរីវុធ