មែកធាងក្នុងស្រុករបស់ក្រុមវាយប្រហារតាមអីុនធើណិត Anonymous ដែលធ្វើសកម្មភាពជុំវិញពិភពលោក បានអះអាងកាលពីម្សិលមិញថា ខ្លួនបានធ្វើឲ្យគេហទំព័ររបស់ក្រសួងការបរទេសគាំងដំណើរការរយៈពេលប្រហែលជាប្រាំម៉ោង ដោយថែមទាំងបានបង្ហោះសារបញ្ឈឺតាមហ្វេសប៊ុករបស់ខ្លួនថា នេះជាអំណោយឆ្នាំថ្មីសម្រាប់រដ្ឋាភិបាលកម្ពុជាទៀតផង។
ក្រុមនេះបានបង្ហោះសារបញ្ឈឺនេះកាលពីព្រឹកម្សិលមិញថា “ Tango Down-25.12.2013 10 AM. Merry Christmas Ministry of Foreign Affairs & International Cooperation” ដែលមានន័យប្រហាក់ប្រហែលគ្នានឹងភាសាខ្មែរថា “១សូន្យ-២៥.១២.២០១៣ ១០AM។ រីករាយថ្ងៃបុណ្យណូអែល ក្រសួងការបរទេស និងសហប្រតិបត្តិការអន្តរជាតិ”។
ខណៈគេហទំព័រនេះគាំងដំណើរការ វាបានបង្ហាញសារមួយថា “ Service Unavailable” ដែលមានន័យថា “ពុំអាចបើកមើលបាន”។ គេហទំព័រនេះអាចបើកមើលវិញបាននៅវេលាម៉ោង២ និង៤៥នាទីរសៀល។ លោក កុយ គួង អ្នកនាំពាក្យក្រសួងការបរទេស បានឲ្យដឹងថា លោកនឹងពិនិត្យមើលបញ្ហានេះ។
ការវាយប្រហារតាមអីុនធើណិតនេះគឺជាផ្នែកមួយនៃប្រតិបត្តិការទ្រង់ទ្រាយធំរបស់ក្រុម Anonymous Cambodia ដែលត្រូវបានឲ្យឈ្មោះថា “ Operation Freedom” ដែលមានន័យថា ប្រតិបត្តិការទាមទារសេរីភាព។ ក្រុមនេះប៉ុនប៉ងវាយប្រហារគេហទំព័រទាំងអស់របស់រដ្ឋាភិបាលរួមទាំងគេហទំព័ររបស់ស្ថាប័នផ្សេងៗទៀតដែលមានទំនាក់ទំនងជិតស្និទ្ធជាមួយគណបក្សប្រជាជនកម្ពុជា។
កាលពីម្សិលមិញនេះដែរ សមាជិកក្រុមនេះបានវាយប្រហារគេហទំព័ររបស់ក្រុមហ៊ុន និងស្ថាប័នក្នុងស្រុកចំនួន១៧ ហើយបានបង្ហោះសារដែលមានខ្លឹមសារថា “រីករាយថ្ងៃបុណ្យណូអែល” ដោយមានរូបក្បាលខ្មោចពាក់មួកតាណូអែលផង៕សេរីវុធ