ក្រុមអ្នកតវ៉ាប្រឆាំងការបណ្ដេញចេញដោយបង្ខំប្រហែល៥០នាក់បានបិទមហាវិថីព្រះមុនីវង្ស មុខសាលារាជធានីភ្នំពេញស្ទើរតែពេញមួយថ្ងៃកាលពីម្សិលមិញនេះ ដោយបានព្យាយាមជំរុញឲ្យមានជំនួបជាមួយអភិបាលរាជធានី លោក ប៉ា សុជាតិវង្ស។
អ្នកតវ៉ាភាគច្រើនស្ថិតក្នុងចំណោមប្រជាពលរដ្ឋប្រហែល៣.០០០គ្រួសារ ដែលត្រូវបានបណ្ដេញចេញពីតំបន់បឹងកក់ រាជធានីភ្នំពេញ ហើយចង់ជួបជាមួយអភិបាលរាជធានីរូបនេះដើម្បីទាមទារឲ្យមានការបន្ថែមប្រាក់សំណងឲ្យបានសមរម្យពីលើចំនួនទឹកប្រាក់ដែលខ្លួនទទួលបានសម្រាប់ការចាកចេញពីផ្ទះសំបែងរបស់ខ្លួន។
អំឡុងការតវ៉ានេះ ពួកគេបានប្រើរបាំងឃាំងផ្លូវរបស់អាជ្ញាធរដើម្បីបិទផ្លូវនេះចាប់ពីម៉ោង៩ព្រឹករហូតដល់ម៉ោង៥ល្ងាច ដោយបានចងរបាំងនេះតភ្ជាប់គ្នាជាមួយនឹងបដាប្រឆាំងការបណ្ដេញចេញ។
អ្នកស្រី អឹុម ស្រីតូច ដែលស្ថិតក្នុងចំណោមអ្នកត្រូវគេបណ្ដេញចេញ បាននិយាយតាមឧគ្ឃោសនស័ព្ទថា “ ថ្ងៃនេះយើងបានឃើញច្បាស់នឹងភ្នែកថា លោក ប៉ា សុជាតិវង្ស គ្មានឆន្ទៈ ឬមានលទ្ធភាពដោះស្រាយបញ្ហានេះទេ។ ប្រសិនបើលោក [បា៉ សុជាតិវង្ស] គ្មានលទ្ធភាពជួយប្រជាពលរដ្ឋទេនោះ អ៊ីចឹងយើងពុំត្រូវការលោកទេ”។ ក្រុមអ្នកតវ៉ាក៏បានដុតកង់ឡានមួយចំនួននៅលើផ្លូវដោយបង្កជាផ្សែងខ្មួលខ្មាញ់ពីលើសាលារាជធានីផងដែរ។
នៅវេលាម៉ោងប្រហែលជា៤ល្ងាច លោក សម រង្ស៊ី បានទៅដល់ទីនោះដើម្បីជួបគ្នាជាមួយក្រុមអ្នកតវ៉ា ប៉ុន្តែលោកបានស្នើឲ្យពួកគេចាកចេញពីផ្លូវនេះតាមសំណើរបស់លោក ស ខេង រដ្ឋមន្ត្រីក្រសួងមហាផ្ទៃ។
លោក សម រង្ស៊ី ក៏បានប្រាប់ក្រុមអ្នកតវ៉ាផងដែរថា លោកនឹងនាំកម្មករកម្មការិនីរោងចក្រកាត់ដេររាប់ពាន់នាក់មកចូលរួមការតវ៉ាប្រឆាំងការបណ្ដេញចេញជាមួយពួកគេនៅសាលារាជធានីនៅថ្ងៃនេះ។ ប៉ុន្តែលោកបានបន្ថែមថា ការបញ្ឆេះនគរបាលឲ្យប្រើអំពើហិង្សាគឺអាចបញ្ឆេះឲ្យមានការឆ្លើយតបដោយហិង្សាចំពោះក្រុមអ្នកតវ៉ាប្រឆាំងរដ្ឋាភិបាលរាប់ពាន់នាក់ដែលគណបក្សសង្គ្រោះជាតិប្រមែប្រមូលមកធ្វើបាតុកម្មនៅទីលានប្រជាធិបតេយ្យមិនឆ្ងាយប៉ុន្មានពីទីនោះ។
អ្នកស្រី ទេព វន្នី ដែលស្ថិតក្នុងចំណោមអ្នកតវ៉ាប្រឆាំងការបណ្ដេញនេះមិនបានយល់ស្របជាមួយលោក សម រង្ស៊ី ទេ ហើយបានបដិសេធមិនយករបាំងឃាំងផ្លូវចេញឡើយ។ ទោះជាដូច្នេះក្ដី ក្រុមអ្នកតវ៉ាទាំងនេះបានបញ្ចប់ការបិទផ្លូវនេះរយៈពេលមិនដល់មួយម៉ោងក្រោយមកនៅពេលបុគ្គលិកសាលារាជធានីចប់ម៉ោងធ្វើការ។
ពេលទាក់ទងបាននៅពេលក្រោយមកលោក ប៉ា សុជាតិវង្ស បានអះអាងថា លោកបានអញ្ជើញតំណាងក្រុមអ្នកតវ៉ាឲ្យទៅជួបលោកក្នុងបរិវេនសាសារាជធានីដែរ ក៏ប៉ុន្តែការអញ្ជើញនេះត្រូវបានបដិសេធ។
លោកក៏បានច្រានចោលការទាមទាររបស់ពួកគេឲ្យលោកចុះចេញពីតំណែងផងដែរ។
លោកបានមានប្រសាសន៍ថា “រឿងអីខ្ញុំត្រូវធ្វើតាមសំណើរបស់អ្នកតវ៉ានោះ? ខ្ញុំមិននិយាយពីរឿងនេះទេ”៕ សេរីវុធ