អង្គការជនពិការអន្តរជាតិបែលហ្សុិកហៅកាត់ថា H.I. ដែលមានបេសកកម្មផ្ដល់ជំនួយដល់ជនពិការនៅក្នុងប្រទេសកំពុងអភិវឌ្ឍ បានឲ្យដឹងកាលពីម្សិលមិញថា ការខកខានរបស់នគរបាលចរាចរក្នុងការអនុវត្តច្បាប់ចរាចរណ៍ចាប់តាំងពីអំឡុងពេលមុនការបោះឆ្នោតខែកក្កដាមកនោះ បានធ្វើឲ្យខូចកិច្ចប្រឹងប្រែងរបស់ខ្លួនក្នុងការធ្វើឲ្យសុវត្ថិភាពតាមដងផ្លូវមានភាពប្រសើរឡើង។
កម្មវិធីសុវត្ថិភាពតាមដងផ្លូវរបស់អង្គការ H.I. ដែលបានចាប់ផ្ដើមក្នុងឆ្នាំ២០០៤នេះបានរួមចំណែកដល់ការធ្វើឲ្យការពាក់មួកសុវត្ថិភាពក្នុងរាជធានីភ្នំពេញ កើនឡើងពី៧ភាគរយក្នុងឆ្នាំ២០០៤ ដល់៧៤ភាគរយក្នុងឆ្នាំ២០១៣នេះ។ អង្គការនេះបានឲ្យដឹងថា ឥឡូវតួលេខនេះកំពុងធ្លាក់ចុះវិញហើយ។
លោក អ៊ា ចរិយា ប្រធានកម្មវិធីសុវត្ថិភាពតាមដងផ្លូវរបស់អង្គការ H.I. បានមានប្រសាសន៍ថា “រយៈពេលប៉ុន្មានឆ្នាំមកនេះ យើងបានព្យាយាមជំរុញរដ្ឋាភិបាលនិងនគរបាលឲ្យពង្រឹងការអនុវត្តច្បាប់ចរាចរណ៍ទាំងពេលថ្ងៃ និងពេលយប់។ យើងបានទទួលលទ្ធផលវិជ្ជមាន ប៉ុន្តែឥឡូវបែរជាមានការបោះជំហានថយក្រោយយ៉ាងធំទៅវិញ។ ការពាក់មួកសុវត្ថិភាពកំពុងមានការធ្លាក់ចុះទៀតហើយ។ នេះគឺជាលទ្ធផលនៃកង្វះការអនុវត្តច្បាប់”។
មុនការបោះឆ្នោតកាលពីខែកក្កដា នគរបាលចរាចរណ៍គឺត្រូវបានបញ្ជាឲ្យផ្អាកការអនុវត្តច្បាប់ចរាចរណ៍ ខណៈមានការធ្វើយុទ្ធនាការឃោសនារកសំឡេងឆ្នោតដោយប្រើទោចក្រយានយន្តជាមធ្យោបាយសម្រាប់ការប្រមូលផ្ដុំគ្នាហែក្បួន។
ទិន្នន័យដែលប្រមូលបានដោយអង្គការ H.I. ពីភ្នំពេញ ខេត្តកណ្ដាល កំពង់ស្ពឺ កំពង់ចាម និងសៀមរាប បង្ហាញថាការពាក់មួកសុវត្ថិភាពបានធ្លាក់ចុះពីចំនួន៦៣ភាគរយក្នុងខែឧសភា មកត្រឹម៤៧ភាគរយក្នុងខែវិច្ឆិកា។
លោក ចរិយា បានឲ្យដឹងកាលពីម្សិលមិញថា នៅពេលកើតមានគ្រោះថ្នាក់ចរាចរណ៍មួកសុវត្ថិភាពអាចជួយសង្គ្រោះជីវិតមនុស្សបាន។
លោកបានមានប្រសាសន៍ថា “លទ្ធផលនៃការសិក្សាបង្ហាញថា ការពាក់មួកសុវត្ថិភាពអាចទប់ស្កាត់ការបាត់បង់ជីវិតដោយសារគ្រោះថ្នាក់ចរាចរណ៍ប្រហែល៤០ភាគរយ និងអាចបញ្ចៀសការរងរបួសធ្ងន់ត្រង់ក្បាល៧០ភាគរយ”។
ថ្មីៗនេះ នគរបាលចរាចរណ៍នៅរាជធានីភ្នំពេញបានបន្តការពង្រឹងការអនុវត្តច្បាប់ចរាចរណ៍វិញហើយ ហើយនៅសប្ដាហ៍នេះនគរបាលចរាចរនៅមហាវិថីព្រះមុនីវង្សនឹងសុធារស ត្រូវគេសង្កេតឃើញធ្វើសកម្មភាពឃាត់អ្នកបើកបរដែលគ្មានមួកសុវត្ថិភាព។
លោក ព្រាប ចាន់វិបុល ប្រធាននាយកដ្ឋានដឹកជញ្ជូនផ្លូវគោកនៃក្រសួងសាធារណៈការនិងដឹកជញ្ជូន បាននិយាយថា ការមិនពង្រឹងការអនុវត្តច្បាប់ចរាចរណ៍គឺដោយសារតែស្ថានភាពនយោបាយបច្ចុប្បន្ននេះ។ លោកបានបង្វែរសំនួរបន្ថែមទៀតទៅលោក ចេវ ហាក់ នាយការិយាល័យនគរបាលចរាចរណ៍ជើងគោករាជធានីភ្នំពេញ ដែលបានបដិសេធមិនធ្វើអត្ថាធិប្បាយ។
មន្ត្រីនគរបាលចរាចរជើងគោកមួយរូបដែលសុំមិនបញ្ចេញឈ្មោះដោយសារតែខ្លួនពុំត្រូវបានអនុញ្ញាតឲ្យនិយាយជាមួយអ្នកយកព័ត៌មាននោះ បានលើកឡើងកាលពីម្សិលមិញថា ខ្លួនធូរចិត្តណាស់ដែលអាចពង្រឹងការអនុវត្តច្បាប់ចរាចរណ៍ជាថ្មីទៀតបានតាមរយៈការផាកពិន័យក្រៅផ្លូវការចំពោះអ្នកបើកបរដែលខ្លួនហៅឲ្យឈប់។
លោកបាននិយាយថា “ខ្ញុំរីករាយណាស់ ព្រោះពីមុនខ្ញុំត្រូវចេញលុយចាក់សាំងខ្លួនឯង ចេញលុយថ្លៃបាយខ្លួនឯង ហើយត្រូវចំណាយទៅលើអ្វីៗសព្វមុខទាំងអស់ហ្នឹង” ដោយលោកបានរំឭកពីរយៈពេលប៉ុន្មានខែមុនពេលខ្លួនគ្មានលទ្ធភាពរកប្រាក់បានពីអ្នករំលោភច្បាប់ចរាចរណ៍។
លោកបានបន្តថា “ដូចប្អូនដឹងស្រាប់ហើយ ប្រាក់ខែខ្ញុំមិនគ្រប់គ្រាន់សម្រាប់ការចំណាយលើអ្វីៗសព្វមុខ និងសម្រាប់ចិញ្ចឹមគ្រួសាររបស់ខ្ញុំទេ”៕ សេរីវុធ