អតីតទាហានពិការចំនួនពីរនាក់ដែលត្រូវបានចោទប្រកាន់ពីបទរុះរើនិងចាប់យកដីរបស់កសិករចំនួន៣០គ្រួសារ នៅខេត្តកំពតកាលពីឆ្នាំមុនបានបដិសេធការចោទប្រកាន់ ទាំងនេះ អំឡុងពេលបើកសវនាការជំនំុជម្រះរឿងក្តីរបស់ពួកគេនៅសាលាឧទ្ធរណ៍កាលពីម្សិលមិញ។
លោក ទូច សឿលី អាយុ៥៧ឆ្នាំ និងសមាជិកនៃសមាគមសង្គ្រោះជនពិការកម្ពុជារបស់លោកចំនួន១១នាក់ផ្សេងទៀតត្រូវសាលាដំបូងខេត្តកំពតចោទប្រកាន់កាលពីឆ្នាំមុនពីបទចាប់យកដីទំហំ២០០ហិកតា ដោយប្រើអំពើហិង្សា និងពីបទរុះរើផ្ទះរបស់កសិករចំនួន៣០គ្រួសារដែលធ្វើស្រែនៅទីនោះ ហើយសាលាខេត្តកំពតបានផ្តន្ទាទោសពួកគេឲ្យជាប់ពន្ធនាគារចន្លោះពី ២ឆ្នាំ ទៅ៥ឆ្នាំក្នុងម្នាក់ៗ។
មានតែជនពិការចំនួន៦នាក់ប៉ុណ្ណោះក្នុងចំណោមជនពិការទាំងនេះបានប្តឹងជំទាស់នឹងការចោទប្រកាន់នេះ ហើយមានតែលោក សឿលី និងលោក វ៉ែន វុន ដែលជាសមាជិកម្នាក់ផ្សេងទៀតនៃសមាគសង្គ្រោះជនពិការកម្ពុជាប៉ុណ្ណោះបានមកចូលរួមការបើកសវនាការជំនុំជម្រះរឿងក្តីនៅសាលាឧទ្ធរណ៍កាលពីម្សិលមិញដើម្បីការពារខ្លួន។លោក ឃុន លាងមេ៉ង ចៅក្រមប្រធានក្រុមប្រឹក្សាជំនុំជម្រះបានឲ្យដឹងថា ដើមបណ្តឹងទាំង៣០គ្រួសារក៏មិនបានបង្ហាញខ្លួននៅសាលាឧទ្ធរណ៍ដែរ ព្រោះពួកគ្មានមេធាវី។ តែទោះជាយា៉ងណា ចៅក្រមបានអានលិខិតមួយច្បាប់របស់ដើមបណ្តឹងដែលអះអាងថាពួកគាត់បានរងរបួសនៅពេលសមាជិកសមាគមសង្គ្រោះជនពិការកម្ពុជាបានរុះរើផ្ទះ និងយកដីរបស់ពួកគេ។
លោក សឿលីបានប្រាប់តុលាការថា លោកនិងអតីតទាហានពិការមួយក្រុមផ្សេងទៀត បានទៅរស់នៅលើដីនេះកាលពីឆ្នាំ២០០០ នៅពេលដីនេះស្ថិតនៅក្នុងព្រំដែនខេត្តកំពង់ស្ពឺ ហើយសាលាខេត្តនេះបានផ្តល់ដីទៅឲ្យពួកគេទំហំ ១៦.០០០ ហិកតា កាលពីឆ្នាំ២០០៦។លោកលើកឡើងថា ដីសម្បទានទំហំ២០០ហិកតា ដែលកំពុងតែមានជម្លោះក្នុងពេលឥឡូវនេះ ក្រោយមកត្រូវបានផ្ទេរទៅខេត្តកោះកុង ខេត្តព្រះសីហនុ និងចុងក្រោយគឺខេត្តកំពតក្នុងឆ្នាំ២០១១។
លោក សឿលី បានឲ្យដឹងថា គ្រួសារមួយក្រុមផ្សេងទៀតបានមកតាំងទីលំនៅនៅលើដីមានជម្លោះទំហំ២០០ ហិកតានេះកាលពីឆ្នាំ២០០៨ ហើយលោកបាន ប្តឹងអាជ្ញាធរមូលដ្ឋានជាច្រើនលើកច្រើនសា ប៉ុន្តែលោកបានបដិសេធថា មិនបានគំរាមកំហែង ឬក៏ប្រើអំពើហិង្សាឡើយ។
លោកបាននិយាយថា “ ខ្ញុំមិនបានចេញបញ្ជាឲ្យសមាជិករបស់ខ្ញុំវាយដំប្រជាពលរដ្ឋទេ ហើយខ្ញុំមិនបានដឹងអ្វីអំពីករណីនេះឡើយ ព្រោះខ្ញុំបាននៅរាជធានីភ្នំពេញនៅពេលរឿងនេះកើតឡើងកាលពីខែ កក្កដា ឆ្នាំ២០១២”។ លោកក៏បានបដិសេធថាលោក មិនមែនជាម្ចាស់កាំភ្លើង ដែលនគរបាលបានរកឃើញនៅក្នុងរថយន្តរបស់គាត់ផងដែរ។
លោកព្រះរាជអាជ្ញា អុឹម សុភ័ណ បានឲ្យដឹងថាលោកបានត្រួតពិនិត្យសំណុំរឿងនេះឡើងវិញ ហើយបានរកឃើញថាគ្មានភ័ស្តុតាងណាអាចដាក់បន្ទុកលើចុងចោទទាំងពីរនាក់បានឡើយ។លោកក៏មានការសង្ស័យចំពោះកាំភ្លើងដែលយកចេញពីរថយន្តរបស់លោក សឿលី បីថ្ងៃក្រោយបន្ទាប់ពីការចាប់ខ្លួនរបស់លោកនៅខែកក្កដាឆ្នាំ២០១២ ផងដែរ ព្រោះថាលោកសឿលីមិនមានវត្តមានឡើយអំឡុងនគរបាលឆែកឆេររថយន្តរបស់គាត់។
លោក វ៉ែន វុនដែលជាចុងចោទម្នាក់ផ្សេងទៀត ក៏បានអះអាងដែរថា លោកនៅកន្លែងផ្សេង នៅពេលការប្រឈមមុខដាក់គ្នាដោយអំពើហិង្សាជាមួយដើមបណ្តឹងបានកើតឡើងនោះ។
លោកបាននិយាយថា “ ខ្ញុំមិនដឹងអំពីករណីនេះទេ ព្រោះខ្ញុំបានទៅរស់នៅក្នុងខេត្តព្រះសីហនុ នៅក្នុងឆ្នាំ២០១០ ហេតុដូច្នេះ ខ្ញុំមិនដឹងថា ហេតុអ្វីបានជាគេចោទប្រកាន់ខ្ញុំឡើយ”។
លោកចៅក្រម ឃុន លាងមេ៉ង បានឲ្យដឹងថា លោកនឹងប្រកាសសាលក្រមនៅក្នុងសំណុំរឿងេនះនៅថ្ងៃទី៨ ខែមករា៕
ស៊ុយឈាង