កម្មករ កម្មការិនីរោងចក្រកាត់ដេរជាង១០.០០០នាក់បានមកប្រមូលផ្ដុំគ្នានៅឯទីលានប្រជាធិបតេយ្យក្នុងរាជធានីភ្នំពេញពេញមួយថ្ងៃកាលពីម្សិលមិញដើម្បីចូលរួមក្នុងការធ្វើបាតុកម្មឈានចូលថ្ងៃទី១២របស់គណបក្សប្រឆាំង ហើយបានដង្ហែក្បួនទាមទារឲ្យលោកនាយករដ្ឋមន្ត្រី ហ៊ុន សែន ចុះចេញពីតំណែងនិងរៀបចំការបោះឆ្នោតសាឡើងវិញ។
កម្មករកម្មការិនីដែលបានធ្វើកូដកម្មចាប់តាំងពីថ្ងៃអង្គារមកដើម្បីទាមទារឲ្យមានការដំឡើងប្រាក់ខែអប្បបរមាពី៨០ដុល្លារ ទៅ១៦០ដុល្លារនោះបានមកដល់បន្តកន្ទុយគ្នាពេញទីលានប្រជាធិបតេយ្យមុនពេលបាយថ្ងៃត្រង់ជាមួយនឹងសម្រែកយ៉ាងកងរំពង។
កម្មករកម្មការិនីរាប់ពាន់នាក់ក៏បានមកចូលរួមក្នុងការតវ៉ារបស់គណបក្សសង្គ្រោះជាតិផងដែរកាលពីថ្ងៃពុធ ហើយថ្នាក់ដឹកនាំកំពូលរបស់គណបក្សនេះរួមទាំងលោក សម រង្ស៊ី ផង បានចំណាយពេលពេញមួយព្រឹក ចុះតាមរោងចក្រកាត់ដេរនានានៅឯខេត្តកណ្ដាល កំពង់ស្ពឺ និងខេត្តកំពង់ចាម ដើម្បីលើកទឹកចិត្តពួកគេឲ្យមកចូលរួមក្នុងការតវ៉ាឲ្យបានកាន់តែច្រើន។
នៅក្នុងព្រឹកនោះមានការរាំលេងកម្សាន្ត និងការថ្លែងសាទុក្ខបង្ហាញពីការមិនពេញចិត្តចំពោះរដ្ឋាភិបាលលោក ហ៊ុន សែន ព្រមទាំងការអំពាវនាវឲ្យមានការដំឡើងប្រាក់ខែអប្បបរមាឲ្យដល់១៦០ដុល្លារជាបន្ទាន់។
គួរបញ្ជាក់ថា រដ្ឋាភិបាលបានសន្យាថា ខ្លួននឹងដំឡើងប្រាក់ខែអប្បបរមារបស់កម្មករកម្មការិនីរោងចក្រកាត់ដេរឲ្យដល់១៦០ដុល្លារត្រឹមឆ្នាំ២០១៨។
នៅវេលាម៉ោងប្រហែលជា៣និង២០នាទីរសៀល កម្មករកម្មការិនីដែលធ្វើកូដកម្មក្រោមការដឹកនាំរបស់លោក សម រង្ស៊ី និងលោក កឹម សុខា បាននាំគ្នាដង្ហែក្បួនតាមផ្លូវលេខ៥១មុនពេលធ្វើដំណើរឆ្ពោះទៅផ្សារអូរប្ញស្សី និងដើរតាមមហាវិថីកម្ពុជាក្រោម និងមហាវិថីនេរុហ៍ នៅក្នុងដំណើរឆ្ពោះទៅទីលានប្រជាធិបតេយ្យវិញ។ ពេលមកដល់កន្លែងតវ៉ា លោក សម រង្ស៊ី បានប្រាប់កូដករថា ពួកគេមានប្រៀបលើថៅកែរោងចក្រកាត់ដេរនានាដែលលោកនិយាយថា គ្មានកន្លែងណាផ្សេងសម្រាប់ផលិតសម្លៀកបំពាក់ក្រៅពីប្រទេសកម្ពុជាទេ ប្រសិនបើថៅកែរោងចក្រទាំងនោះមិនព្រមផ្ដល់ប្រាក់ខែអប្បបរមា១៦០ដុល្លារនោះ។
លោកបានថ្លែងថា “នៅប្រទេសចិនកំពុងមានបញ្ហារឿងកម្មករកម្មការិនីទាមទារប្រាក់ខែខ្ពស់ជាងមុន ហើយពួកគេក៏បានទទួលប្រាក់ខែទ្វេដងកាលពីប៉ុន្មានខែមុននេះឯង។ ពួកគេ [ថៅកែរោងចក្រចិន] ត្រូវការកម្លាំងពលកម្មកម្ពុជា ដូច្នេះហើយបានជាមានតម្រូវការកម្មករកម្មការិនីខ្មែរខ្ពស់នោះ។ កុំជឿថា ពួកគេនឹងបិទរោងចក្រ ព្រោះពួកគេកំពុងរកប្រាក់ចំណេញបានច្រើនណាស់។ ពេលកម្មករកម្មការិនីមិនធ្វើការ ពួកគេ [ថៅកែរោងចក្រ] បាត់បង់ប្រាក់ចំណេញនេះច្រើនណាស់។
ប្រសិនបើពួកគេមិនចង់បាត់បង់ប្រាក់ចំណេញនេះទេនោះ ពួកគេគួរតែឲ្យយើង១៦០ដុល្លារ”៕ សេរីវុធ